Read Iloko Ezekiel 30 Bible Online

Ezekiel 30 - Iloko bible

Ezekiel 30

¹Nagsao manen ti Apo.

²Kinunana, “Anak ti tao, agipadtoka ket ipakaammom a siak nga Apo a Dios, kastoy ti kunak. Ipukkawmo: Dumtengen ti aldaw a nakaal-alliaw!

³Asidegen ti aldaw, Wen, ti aldaw a panagtignay ti Apo. Nalidemto dayta nga aldaw, Aldaw a pannakadusa dagiti nasion.

⁴Bumtakto ti gubat idiay Egipto, Ket addanto dakkel a didigra idiay Etiopia. Adunto ti mapapatay idiay Egipto, Masamsamto ti sanikua ti pagilian Ket mabaybay-anto nga aglangalang.

⁵“Iti dayta a gubat, mapapatayto dagiti natangdanan a soldado ti Etiopia, Put, Lud, Arabia, Kub ken uray dagiti tattaok.”

⁶Kuna ni Yahweh, “Matayto iti gubat dagiti amin a mangsalsalaknib iti Egipto, manipud Migdol iti amianan agingga iti Siene iti abagatan. Maparmekto ti napalangguad nga armada ti Egipto. Siak nga Apo a Dios ti nagsao.

⁷Tinto dagada ti kakaroan iti pannakadadaelna iti entero a lubong. Marbanto a mamimpinsan dagiti siudadna.

⁸Inton puorak ti Egipto ket mapapatay amin a mangsalsalaknib kenkuana, maammoandanton a siak ni Yahweh.

⁹“Inton dumteng dayta nga aldaw, ibaonkonto dagiti tattaok nga aglugan kadagiti barko tapno riingendanto dagiti awan annadda a tattao ti Etiopia. Kasta unayto ti butengda gapu iti pannakadadael ti Egipto. Dumtengen dayta nga aldaw!”

¹⁰Kuna ti Apo a Dios, “Ninto Nebucadnesar nga ari ti Babilonia ti aramatek a panggibus iti kinabaknang ti Egipto.

¹¹Kaduananto ti naranggas nga armadana nga umay mangdadael iti daga. Sikakampilandanto a mangraut iti Egipto ket mapnonto ti daga kadagiti bangkay.

¹²Pagmagaekto ti Karayan Nile ket iturayanto dagiti managdakdakes a tattao ti Egipto. Dadaelento dagiti ganggannaet ti entero a daga.” Daytoy ti kuna ti Apo.

¹³Kuna ti Apo a Dios, “Dadaelekto dagiti imahen, kasta met dagiti sinan-dios idiay Memfis. Awanton ti mangituray iti Egipto ket pagbutngekto dagiti amin a tattao.

¹⁴Pagbalinekto a langalang ti akin-abagatan nga Egipto ket puorakto ti siudad ti Zoan iti amianan. Dusaekto ti kangrunaan a siudad ti Tebes.

¹⁵Ipariknakto ti pungtotko iti siudad ti Pelusium, ti agdindinamag a sarikedked ti Egipto. Dadaelekto ti kinabaknang ti Tebes.

¹⁶Puorakto ti Egipto ket agsagabanto ti Pelusium. Marbanto dagiti bakud ti Tebes ket malayusto ti siudad.

¹⁷Matayto iti gubat dagiti agtutubo kadagiti siudad ti Heliopolis ken Bubastis ket maitalawto a kas balud dagiti dadduma a tattao.

¹⁸Agsipngetto ti init idiay Tafnes inton dadaelek ti pannakabalin ti Egipto ket gibusak ti bilegna a pagtangtangsit dagiti tattao. Addanto ulep a mangkumot iti Egipto ket maitalawto dagiti tattao iti amin a siudad.

¹⁹Kastoyto ti panangdusak iti Egipto ket maammoandanto a siak ni Yahweh!”

²⁰Iti maikapito nga aldaw iti umuna a bulan, iti maika-11 a tawen, nagsao ti Apo kaniak.

²¹Kinunana, “Anak ti tao, tinukkolko ti takkiag ti ari ti Egipto. Saankonto a pagimbagen tapno dinanto kabaelan ti agiggem iti kampilan.

²²Ngarud, siak nga Apo a Dios kastoy ti kunak: ‘Siak ti kabusor ti ari ti Egipto. Tukkolek dagiti dua a takkiagna—ti saan pay a natukkol ken ti natukkolen, ket maibbatannanto ti kampilan.

²³Iwarawarakto dagiti Egipcio kadagiti nasnasion.

²⁴Kalpasanna, papigsaekto dagiti takkiag ti ari ti Babilonia ket ipaiggemkonto kenkuana ti kampilanko. Ngem tukkolekto dagiti takkiag ti ari ti Egipto ket agasugto agingga a matay iti sangoanan ti kabusorna.

²⁵Wen, pakapsutekto ti ari ti Egipto; ngem papigsaekto ti ari ti Babilonia ket inton itedko kenkuana ti kampilanko ket ilayatna iti Egipto, maammoanto ti amin a siak ni Yahweh.

²⁶Iwarawarakto dagiti Egipcio iti entero a lubong. Iti kasta, maammoandanto a siak ni Yahweh.’”