Read Iloko Ezekiel 32 Bible Online

Ezekiel 32 - Iloko bible

Ezekiel 32

¹Iti umuna nga aldaw, iti maika-12 a bulan iti maika-12 a tawen, nagsao ti Apo kaniak.

²Kinunana, “Anak ti tao, ballaagam ti ari ti Egipto. Ibagam kenkuana ti saok, ‘Arigmo ti leon iti baet dagiti nasion. Ngem ad-adda a kaskala buaya iti karayan a mangkibkibur iti danum. Libegem ti danum ket rugitam dagiti karayan.

³Inton aguummong ti adu a nasion, sarwagankanto iti iketko. Sakonto bilinen ida a mangisang-at kenka.

⁴Itinnagkanto iti daga; ipurruakkanto iti tay-ak ket yegkonto amin a tumatayab ken animal iti lubong nga agkaan kenka.

⁵Makumotanto dagiti bantay ken tanap iti agruprupsa a bangkaymo.

⁶Ibuyatkonto ti daram agingga a malayus dagiti bantay ket mapno dagiti waig.

⁷Inton dadaelenka, abbongakto ti tangatang ket saanto nga agraniag dagiti bituen. Maulpanto ti init ket dinto agraniag ti bulan.

⁸Diakto pagraniagen dagiti amin a silaw ti langit ket pagsipngetekto ti lubongmo.’ Daytoy ti sao ti Apo a Dios.

⁹“Adunto a nasion ti makigtot inton isaknapko ti damag kadagiti pagilian a dimo pay nadamdamag maipapan iti pannakadadaelmo.

¹⁰Makigtotto ti adu a nasion gapu iti aramidek kenka. Inton iwasawasko ti kampilanko, agkullayawto iti buteng dagiti ari. Inton aldaw a pannakarpuogmo, agpigergerdanto amin iti buteng gapu iti mapasamak iti biagda.”

¹¹Kuna ti Apo a Dios iti ari ti Egipto: “Sangoemto ti kampilan ti ari ti Babilonia.

¹²Bay-akto dagiti mannakigubat a naggapu kadagiti naranggas a nasion a mangasut kadagiti kampilanda tapno patayenda amin a tattaom. Ikisapdanto dagiti amin a pagtangtangsitmo ken amin a tattaom.

¹³Papatayekto dagiti animalmo iti tunggal igid ti danum. Awanton ti tao wenno animal a manglibeg iti danum.

¹⁴Pagarinsaedekto ti danummo ket aglitnawto. Nalinakto ti panagayus dagiti karayanmo. Daytoy ti imbagak, siak nga Apo a Dios.

¹⁵Inton paglangalangek ti Egipto ket ikisapko ti amin nga agnaed sadiay, maammoandanto a siak ni Yahweh.

¹⁶Agbalinto a dung-aw daytoy a ballaag. Kantaento dagiti babbai nga umili kadagiti nasion a pangdung-awda iti Egipto ken kadagiti amin a tattaona. Siak nga Apo a Dios ti nangibaga iti daytoy.”

¹⁷Iti maika-15 nga aldaw, iti umuna a bulan iti maika-12 a tawen, nagsao ti Apo kaniak.

¹⁸Kinunana, “Anak ti tao, dung-awam dagiti adu a tattao ti Egipto. Ibaonmo ida iti lubong dagiti natay agraman dagiti dadduma a nabileg a nasion.

¹⁹Ibagam kadakuada: Ipagarupmo nga awan umartap ti kinapintasmo? Inka agidda iti tanem dagiti awanan Dios.

²⁰“Mairaman a mapasag dagiti Egipcio kadagiti mapapatay iti paggugubatan. Adda kampilan a nakasagana a mangpatay kadakuada amin.

²¹Mapanto dagiti Egipcio iti lubong dagiti natay ket siaayatto a pasangbayen ida dagiti katurdan a bannuar agraman dagiti kaduada a nakigubat. Ipukkawdanto, ‘Bimmaban dagiti awan diosna a napapatay iti gubat ket ditoy ti pagyananda!’

²²“Adda sadiay ti Asiria a nalikmut kadagiti tanem dagiti soldadona a pasig a napapatay iti gubat.

²³Adda dagiti tanemda iti kaunggan a paset ti lubong dagiti natay. Napapatay dagiti amin a soldadona iti dangadang ket nalikmut ti tanemna kadagiti tanemda. Isuda idi ti nangisaknap iti buteng iti daga dagiti sibibiag.

²⁴“Adda sadiay ti Elam a nalikmut kadagiti tanem dagiti soldadona. Napapatayda amin iti paggugubatan ket naipababada, a saan a nakugit, iti lubong dagiti natay. Idi sibibiagda, insaknapda ti buteng ngem ita, natay ken naipababadan.

²⁵Naitanem ti Elam kadagiti napapatay iti paggugubatan ket nalikmut kadagiti tanem dagiti soldadona. Saanda a nakugit ken napapatayda amin iti paggugubatan. Idi sibibiagda, insaknapda ti buteng ngem ita, natay ken naipababada. Sagabaenda met ti sagabaen dagiti napapatay iti paggugubatan.

²⁶“Adda sadiay ti Mesec ken ti Tubal a nalikmut kadagiti tanem dagiti soldadoda. Saanda a nakugit ken napapatayda amin iti paggugubatan. Isuda idi ti nangisaknap iti buteng iti daga dagiti sibibiag.

²⁷Saan a nangayed ti pannakaitabonda a kas kadagiti bannuar idi un-unana a siaarmas a napan iti lubong dagiti natay. Nagpungananda ti kampilanda ket naiparabaw dagiti kalasagda iti bangkayda. Nabileg idi dagitoy a bannuar a namutbuteng kadagiti sibibiag.

²⁸“Kastanto ti pannakapasag dagiti Egipcio a mairaman kadagiti saan a nakugit a napapatay iti paggugubatan.

²⁹“Adda sadiay ti Edom agraman dagiti ari ken agtuturayna. Nabilegda idi a mannakigubat ngem ita addadan iti lubong dagiti natay a kaduada dagiti saan a nakugit a napapatay iti paggugubatan.

³⁰“Adda sadiay dagiti amin a prinsipe iti amianan kasta met dagiti Sidonio. Ti bilegda idi ti nangisaknap iti buteng ngem ita maipababada a maibabain. Kaduada dagiti napapatay iti paggugubatan ket maitanemda a di nakugit. Mairamanda iti pannakaibabain dagiti maitappuak iti lubong dagiti natay.

³¹“Pakaragsakanto ti ari ti Egipto ken ti armadana iti pannakakitada amin dagitoy a natay iti paggugubatan,” kuna ti Apo a Dios.

³²“Imbaonko ti ari ti Egipto a mangbutbuteng kadagiti sibibiag ngem isu ken ti amin a soldadona mapapataydanto ket maitanemda a mairaman kadagiti amin a di nakugit a matay iti paggugubatan.” Daytoy ti kuna ti Apo a Dios.