Read Iloko Ezekiel 34 Bible Online

Ezekiel 34 - Iloko bible

Ezekiel 34

¹Nagsao ti Apo kaniak.

²Kinunana, “Anak ti tao, babalawem dagiti agtuturay iti Israel. Ibagam kadakuada a siak nga Apo a Dios, kastoy ti kunak: ‘Naitudingen ti dusayo, dakayo nga agpaspastor ti Israel. Dagiti la bagbagiyo ti asikasoenyo ngem bay-anyo met dagiti karnero.

³Inumenyo ti gatasda, aramidenyo a badoyo ti duddotda ken partien ken sidaenyo ti kalukmegan a karnero. Ngem pulos a diyo asikasoen dagiti karnero.

⁴Diyo tinaripato dagiti agkakapsut. Diyo inagasan dagiti masakit. Diyo binedbedan dagiti nadunor. Diyo sinapul dagiti nayaw-awan wenno binirok dagiti napukaw. Naranggaskayo ketdi kadakuada.

⁵Gapu ta awan ti mangipastor kadagiti karnero, nawarawarada, ket pinatay ken linamut ida dagiti narungsot nga animal.

⁶Ngarud, nagtawataw dagiti karnerok kadagiti nangato a turod ken kabambantayan. Naiwaraswarasda iti rabaw ti daga ket awan ti nangbirok wenno nangsapul kadakuada.’

⁷“Ita, dakayo nga agpaspastor, denggenyo ti kunak kadakayo.

⁸Isapatak iti naganko a Dios a sibibiag a masapul a denggendak: ‘Dinarup dagiti narungsot nga animal dagiti karnerok, ket pinatay ken linamutda ida agsipud ta awan ti mangaywan kadakuada. Saan a binirok dagiti pagpaspastorek dagiti karnero. As-asikasoenda dagiti bagbagida a saan ketdi a dagiti karnerok.

⁹Ipangagdak ngarud, dakayo nga agpaspastor.

¹⁰Siak nga Apo a Dios ipakaammok a siak ti kabusoryo. Alaek dagiti karnerok nga ay-aywananyo ket diakton ipaaywan ida kadakayo. Diakon ipalubos a dagiti laeng bagbagiyo ti asikasoenyo. Ispalek dagiti karnerok tapno diyo lamuten ida.’”

¹¹“Siak nga Apo a Dios ibagak kadakayo a siak a mismo ti mangsapul kadagiti karnerok ket siak ti mangaywan kadakuada,

¹²kas iti panangaywan ti agpaspastor kadagiti nawarawara a karnerona a naummong manen. Alaekto ida kadagiti amin a lugar a nakaiwarawaraanda iti daydi nasipnget ken nakabutbuteng nga aldaw.

¹³Iruarkonto ida kadagiti ganggannaet a pagilian, ummongekto ida ket isublikto ida iti bukodda a daga. Isublikto ida kadagiti kabambantayan ken kadagiti agay-ayus a danum ti Israel ket ipaarabko ida kadagiti nalangto a karuotan.

¹⁴Agarabdanto nga awan pagbutnganda kadagiti bakras ti bantay ken tantanap ken iti amin a nalangto a pagaraban iti daga ti Israel.

¹⁵Siakto a mismo ti mangipastor iti arbanko. Ibirokakto ida iti paginanaanda. Siak nga Apo a Dios ti nangibaga iti daytoy.

¹⁶“Birokekto dagiti napukaw, yawidkonto dagiti nagtawataw, bedbedakto dagiti nadunor, ken agasakto dagiti masakit. Ngem patayekto dagiti nalukmeg ken nasalun-at agsipud ta maysaak a pastor nga agaramid iti naimbag.

¹⁷“Ita ngarud, arbanko, kastoy ti kunak nga Apo a Dios: Ukomekto ti tunggal maysa ket isinakto dagiti naimbag kadagiti dakes, dagiti karnero kadagiti kalding.

¹⁸Saan a mapnek ti sumagmamano kadakayo nga agarab kadagiti kasayaatan a ruot. Baddebaddekenyo pay dagiti teddayo. Uminumkayo iti nalitnaw a danum ket libegenyo ti naginumanyo.

¹⁹Kapilitan nga araben dagiti dadduma a karnerok ti binaddebaddekyo a ruot ken inumenda ti danum a linibegyo.

²⁰“Ngarud, siak nga Apo a Dios, ibagak kadakayo nga ukomekto dagiti nalukmeg ken dagiti nakuttong a karnero.

²¹Induronyo dagiti masaksakit ket sinangdosangdoyo ida agingga a nayadayoda iti arban.

²²Ngem ispalekto dagiti karnerok ket diakton ipalubos a maparparigatda.

²³Itedkonto kadakuada ni David nga adipenko a pastorda a kakaisuna ket aywanannanto ida.

²⁴Siakto, ni Yahweh, ti Diosda ket ninto David nga adipenko ti mangituray kadakuada.” Daytoy ti sao ni Yahweh.

²⁵“Makitulagakto kadakuada. Daytoyto ti mangpatalged nga awan ti pakaan-anoanda. Paksiatekto dagiti narungsot nga animal iti daga tapno mapakapagnaed a sitatalged dagiti karnerok iti taltalon ken mabalinda ti maturog iti kabakiran.

²⁶“Bendisionakto ida ket palubosakto ida nga agnaed iti likmut ti nasantoan a turodko. Pagtudoekto iti tiempo a kasapulanda.

²⁷Agbunganto dagiti kayo, adunto ti maapit kadagiti taltalon ket agnaedto a sitatalged ti tunggal maysa iti bukodna a daga. Inton wayawayaak dagiti tattaok kadagiti nangtagabu kadakuada, inton pugsatek dagiti kawarda, maammoandanton a siak ni Yahweh.

²⁸Saanton a samsaman ida dagiti awan diosna a pagilian. Saanto metten a patayen ken lamuten ida dagiti narungsot nga animal. Natalgedto ti panagbiagda ket awanto ti mangbutbuteng kadakuada.

²⁹Ikkakto ida kadagiti nadam-eg a talon ket gibusakton ti bisin iti daga. Saanton a laisen ida dagiti sabali a nasion.

³⁰Maammoanto ti amin a salsalaknibak ti Israel ket isuda dagiti tattaok. Siak nga Apo a Dios ti nangibaga iti daytoy.

³¹“Dakayo a karnerok, ti arban a tartaraonak, tattaokayo ket siak ti Diosyo,” kuna ti Apo a Dios.