Read Iloko Ezekiel 36 Bible Online

Ezekiel 36 - Iloko bible

Ezekiel 36

¹Kinuna ti Apo, “Anak ti tao, agsaoka kadagiti bantay ti Israel ket ibagam a denggenda ti saok

²nga Apo a Dios. Kunak kadakuada, ‘Nagragsak dagiti kabusor ti Israel ket kinunada: Ita, kukuatayon dagita kadaanan a bantay!’

³“Agipadtoka ngarud ket ipakdaarmo ti saok nga Apo a Dios. Sinakup dagiti kabangibang a pagilian dagiti bantay ti Israel, ket dinadaelda a namimpinsan. Gapu iti daytoy, rinabrabak ti tunggal maysa ti Israel.

⁴Isut' gapuna, dakayo a bantay ti Israel, denggenyo ti kunak nga Apo a Dios, kadakayo a bantay ken turod, kadakayo a waig ken tanap, kadakayo a naglangalang a lugar ken kadakayo a napanawan a siudad a nagsamsaman ken rinabrabak dagiti kabangibang a nasion.

⁵“Siak nga Apo a Dios, iti napalalo a pungtotko, nagsaoak iti maibusor kadagiti kabangibang a nasion, nangruna iti Edom. Nagraragsak ken nanglalaisda idi sakupenda ti dagak ket tinagikuada dagiti pagpastoranna.

⁶“Agipadtoka ngarud iti daga ti Israel. Ibagam kadagiti bantay, turod, wawaig ken tantanap a siak nga Apo a Dios kastoy ti kunak gapu iti nakaro a pungtotko iti pananglalais kadakuada dagiti nasion.

⁷“Siak nga Apo a Dios isapatak nga agsagabanto met ti pannakaibabain dagiti kabangibang a nasion.

⁸Ngem kadagiti bantay ti Israel, agbulongto manen dagiti kaykayo ket agbungada iti kanenyo, dakayo a tattaok nga Israelita. Asidegen ti panagsubliyo iti dagayo.

⁹Addaak kadakayo ket ipanamnamak a maaradonto manen ti dagayo ket mamulaan.

¹⁰Paaduekto ti bilangyo. Agnaedkayto kadagiti siudad ket tarimaanenyonto amin a nadadael.

¹¹Paaduekto ti bilang dagiti tattao ken baka. Ad-adukayto ngem idi un-unana ket adunto ti annakyo. Palubosankayto nga agnaed sadiay kas iti sigud ket narangrang-aykayto manen. Ket maammoanyonto a siak ni Yahweh.

¹²Dakayo a tattaok nga Israelita, isublikayto iti daga a pagnaedanyonto manen. Dakayonton ti agtagikua iti daga ket saanton nga agbisin dagiti annakyo.

¹³“Siak nga Apo a Dios kunak a pudno ti ibagbaga dagiti tattao a mangmangan iti tao ti daga ken agal-ala kadagiti annak ti nasion.

¹⁴Ngem manipud ita, saanton a ti agalun-on iti tao ti mangagaw kadagiti annakyo. Siak nga Apo a Dios ti nangibaga iti daytoy.

¹⁵Saanton a masapul a denggen ti daga ti panangrabrabak dagiti nasion ken dinto masapulen a kitaenna ti pananglais kadakuada dagiti tattao. Saanton nga agawen ti daga dagiti annak ti nasion. Siak nga Apo a Dios ti nangibaga iti daytoy.”

¹⁶Nagsao kaniak ti Apo.

¹⁷Kinunana, “Anak ti tao, idi agnanaed dagiti Israelita iti dagada, tinulawanda babaen iti panagbiagda ken aramidda. Imbilangko ti aramidda a narugit a kas iti babai a madama nga agregla.

¹⁸Impariknak kadakuada ti nakaro a pungtotko gapu iti panagpapatayda iti uneg ti pagilian ken gapu kadagiti imahen a pinangtulawda iti daga.

¹⁹Dinusak ida gapu iti wagas ti panagbiag ken aramidda ket inwarasko ida kadagiti ganggannaet a pagilian.

²⁰Ngem iti sadinoman a napananda, imbabainda ti nasantoan a naganko gapu ta kuna dagiti tattao, ‘Tattao ida ti Apo, ngem pimmanawda iti daga nga inted ti Diosda kadakuada.’

²¹Daytoy ti gapuna a sinalaknibak ti nasantoan a naganko, ta imbabain dagiti Israelita iti sadinoman a napananda.

²²“Ita ngarud, ibagam kadagiti Israelita ti mensahek nga Apo a Dios: ‘Saan a gapu kadakayo nga Israelita nga aramidek daytoy, no di ket gapu iti nasantoan a naganko a tinulawanyo iti tunggal nasion a napananyo.

²³Inton iparangarangko kadagiti nasion ti kinasanto ti naindaklan a naganko—ti naganko a tinulawanyo kadakuada—maammoandanto a siak ti Apo.’ Siak nga Apo a Dios ti nangibaga iti daytoy. Aramatenkayto a mangipakita kadagiti nasion iti kinasantok.

²⁴Iruarkayto kadagiti pagilian, ket isublikayto iti bukodyo a daga.

²⁵Warsiankayto iti nadalus a danum ket madalusankayto iti amin nga didiosen ken amin a nangtulaw kadakayo.

²⁶Ikkankayto iti baro a puso ken iti baro nga espiritu. Ikkatekto ti bimmato a pusoyo, ket suktakto iti manangngaasi a puso.

²⁷Ikabilkonto ti bukodko nga espiritu kadakayo ikagumaak nga annurotenyo dagiti bilinko ken salimetmetanyo dagiti lintegko nga intedko kadakayo.

²⁸Agnaedkayto iti daga nga intedko kadagiti kapuonanyo. Dakayto dagiti tattaok ket siakto ti Diosyo.

²⁹Ispalenkayto iti amin a mangtulaw kadakayo. Paaduekto ti trigo tapno dikayton agbisin.

³⁰Paaduekto ti bunga dagiti kayoyo ken ti apit dagiti talonyo tapno awanton ti bisin a pakaumsianyo iti imatang dagiti nasion.

³¹Malagipyonto dagiti amin a dakes nga aramidyo ken dagiti biddutyo. Guraenyonto dagiti bagbagiyo gapu kadagiti basolyo ken dakes nga aramidyo.

³²Israel, kayatko a maammoanyo nga ar-aramidek dagitoy saan a gapu kadakayo. Kayatko a mariknayo ti bain ken pannakaipababayo gapu kadagiti aramidyo. Siak nga Apo a Dios ti nangibaga iti daytoy.”

³³Kuna ti Apo a Dios, “Inton madalusankayo iti amin a basolyo, pagnaedenkayto manen kadagiti siudadyo ket bangonenyonto manen dagiti narnarpuog.

³⁴Matalonto manen dagiti nagkaruotan ken langalang a dagayo ket saanton a kasamekan kas makita dagiti masansan nga aglabas.

³⁵Saritaento ti amin ti panagbalbaliw daytoy a daga! Langalang idi ngem nagbalinen a kas iti Hardin ti Eden; narba dagiti siudad, nasamsam dagiti sanikuada ket nabaybay-anda a rebba ngem addan agnaed ken nasarikedkedanda.

³⁶Maammoanto dagiti nakalasat a nasion iti likmutyo a siak, ni Yahweh ti mangtarimaan kadagiti narnarba a siudad ken mangmula manen kadagiti nabaybay-an a talon. Siak, ni Yahweh, ti nangikari iti daytoy ket tungpalek a tungpalen.”

³⁷Kuna ti Apo a Dios, “Palubosakto manen dagiti Israelita nga agpatulong kaniak. Paaduekto ida a kas iti arban dagiti karnero.

³⁸Mapnonto iti tattao dagiti narba a siudad; mapnodanto a kas iti pannakapno ti Jerusalem kadagiti karnero a mapuoran a kas daton iti aldaw ti fiesta. Ket maammoandanto a siak ni Yahweh.”