Read Iloko Ezekiel 38 Bible Online

Ezekiel 38 - Iloko bible

Ezekiel 38

¹Nagsao ti Apo kaniak.

²Kinunana, “Anak ti tao, babalawem ni Gog, iti daga ti Magog. Isu ti kangatoan a turayen dagiti pagilian ti Mesec ken Tubal. Babalawem

³ket ibagam a siak nga Apo a Dios ti kabusorna.

⁴Pagbaw-ingek ket kawitak dagiti pangalna sako uloden a yadayo agraman dagiti soldadona. Dakkel ti armadana a buklen dagiti kabalio ken naka-uniforme a soldado a nagsakay kadagiti kabalio ket sikakalasag ken sikakampilan ti tunggal maysa.

⁵Nakikuyog kenkuana dagiti taga-Persia, Etiopia ken Libia; nakakalasag ken nakahelmetda amin.

⁶Kaduana dagiti mannakigubat iti Gomer ken Bet Togarma a naggapu iti amianan, kasta met dagiti naggapu iti adu a nasion.

⁷Ibagam kenkuana nga agsagana, kasta met a pagsaganaenna amin a soldadona nga ipanguloanna.

⁸Kalpasan ti adu a tawen, pasakupkonto kenkuana ti maysa a pagilian a pagnaedan dagiti tattao a nagsubli manipud iti adu a nasion ken panagnaedda sadiay nga awan panagbutengda iti idadateng ti gubat. Sakupennanto dagiti bantay ti Israel a naglangalang ken nabaybay-an iti nabayag, ngem itan, natalgeden ti panagbiag dagiti tattao.

⁹Dumarupto a kasla bagio, agraman ti armadana ken dagiti adu a nasion a kimmuyog kenkuana, ket agsaknapdanto a kasla ulep iti daga.”

¹⁰Daytoy ti kuna ti Apo a Dios ken ni Gog, “Inton dumteng dayta a tiempo, rugiamto ti agpanunot iti dakes a panggep.

¹¹Ikeddengmonto a rauten ti awan gawayna a pagilian a pagnanaedan dagiti tattao a natalna ken natalged, kadagiti awan bakud ken sarikedkedna nga ili.

¹²Samsamenyo dagiti sanikua dagiti tattao nga agnanaed kadagiti narba idi a siudad. Naummongda manipud kadagiti nasion, ket ita, adun ti taraken ken sanikuada ket agnaedda iti nagsasabatan dagiti dalan ti daga.

¹³Saludsodento kenka dagiti taga-Seba ken Dedan ken dagiti agtagtagilako a taga-Tarsis, ‘Inummongmo kadin ti armadam ket rimmautka tapno agsamsam ken agagawda? Panggepmo kadi ti agala iti pirak ken balitok, iti baka ken sanikua, ket italawmo dagita amin a sinamsammo?’”

¹⁴Iti kasta, imbaonnak ti Apo a Dios a mangibaga ken ni Gog iti daytoy a saona kenkuana, “Ita ta natalgeden dagiti tattaok nga Israelita, rummuarkanto

¹⁵iti lugarmo iti adayo nga amianan. Ipanguloamto ti adu a mannakigubat iti adu a pagilian. Nakakabalioda amin a mangbukel iti dakkel ken nabileg nga armada.

¹⁶Rautemto dagiti tattaok nga Israelita; kaskanto la bagio nga aglasat iti daga. Inton dumteng dayta a tiempo, ibaonkanto a mangsakup iti dagak tapno maiparangarang kadagiti nasion no siasinoak ken tapno maipakita ti kinasantok iti panangaramatko kenka.

¹⁷Sika ti sinarsaritak idi un-unana, idi impakdaarko babaen kadagiti adipenko a profeta ti Israel, nga iti masakbayan mangibaonakto iti mangraut iti Israel.” Daytoy ti sao ti Apo a Dios.

¹⁸Kuna ti Apo a Dios, “Iti aldaw a panangraut ni Gog iti Israel, sumgedto ti pungtotko.

¹⁹Iti gumilgil-ayab a pungtotko, ipakaammokto nga addanto nakaro a ginggined iti entero nga Israel.

²⁰Mabutengto kaniak dagiti amin nga ikan, tumatayab, animal, babassit man wenno dadakkel ken amin a tao iti rabaw ti daga ket agtigergerda. Margaayto dagiti bantay ken turod, ket matuangto dagiti amin a bakud.

²¹Butbutngekto ni Gog babaen iti panangyegko iti amin a kita ti didigra. Siak ti Apo a Dios, ti nangibaga iti daytoy. Agpipinnatayto dagiti soldadona babaen iti kampilan.

²²Dusaekto babaen iti angol ken gubat. Idissuorkonto kenkuana ti bumayakabak a tudo, uraro, apuy ken asufre, kasta met iti armadana ken iti adu a nasion a kakaduana.

²³Kastoyto ti panangipakitak kadagiti amin a nasion ti kinatan-ok ken kinasantok. Ket maammoandanton a siak ni Yahweh.”