Read Iloko Ezekiel 4 Bible Online

Ezekiel 4 - Iloko bible

Ezekiel 4

¹Kinuna ti Dios, “Anak ti tao, mangalaka iti ladrilio, ket ikabilmo iti sangom samo uged-ugedan a mangiladawan iti siudad ti Jerusalem.

²Iladawam ti pannakalakub ti siudad. Mangugedka iti sinan-sarikedked, sinan-torre a pagwanawanan, sinan-kampo ken kadagiti sinanmaso a pagrakrak iti lawlawna.

³Mangalaka iti landok a pariok, ket ikabilmo a kas bakud a nagbaetan ti lugar nga ayanmo ken ti siudad. Sangoem ti siudad a kasla sika ti manglaklakub. Agpaayto daytoy a pagilasinan ti pagilian dagiti Israelita.

⁴“Agiddaka nga agsikig iti makannigidmo ket ipatayko kenka ti basol ti Israel. Iti las-ud ti 390 nga aldaw, agyankanto sadiay ket agsagabakanto gapu kadagiti basbasolda. Sinentensiaanka iti maysa nga aldaw iti tunggal tawen a panagpaut ti dusada.

⁶Inton aggibus dagitoy nga aldaw, agballikidkanto iti makannawanmo, ket sagabaem ti basol ti Juda iti 40 nga aldaw—maysa nga aldaw ti tunggal tawen ti dusada.

⁷“Dimo isina ti panagkitam iti pannakalakub ti Jerusalem. Layatam, ket agipadtoka iti maibusor iti siudad.

⁸Parautanka tapno saanka a makapagballikid agingga a malpas ti pannakalakub ti siudad.

⁹“Ita, mangalaka iti trigo, sebada, utong, patani, miho ken espelta. Paglalaokem ida amin, ket agaramidka iti tinapay. Daytoyto ti kanem bayat ti 390 nga aldaw a panagiddam a nakasikig iti kannigid.

¹⁰Walo nga onsa ti tinapay ti maipalubos a kanem iti tunggal aldaw, ket masapul a mayanay agingga iti sumuno nga aldaw.

¹¹Makedngan pay ti inumem. Dua a baso ti danum laeng iti inaldaw.

¹²Mangpuorkanto iti namaga a takki ti tao ket usaremto ti beggangna a pangluto iti bibingka a sebada. Kanemto ti bibingka iti imatang dagiti tattao.”

¹³Kinuna ti Apo, “Inton iwarawarak dagiti Israelita iti nadumaduma a pagilian, kastoyto ti wagas ti pannanganda iti taraon a saan a nadalus.”

¹⁴Ngem insungbatko, “Saan, Apo Dios! Diak pay tinulawan ti bagik. Manipud kinaubingko, diak pay nagsida iti karne ti animal a natay wenno pinatay ti narungsot nga animal. Diak pay nangan iti taraon a maibilang a narugit.”

¹⁵Iti kasta, kinuna ti Dios, “Ala wen, palubosanka a mangusar iti takki ti baka a panglutom iti tinapaymo.”

¹⁶Kinunana pay, “Anak ti tao, isardengkonto ti pannakaited ti taraon dagiti agnanaed idiay Jerusalem. Madanagan ken mariribukanto dagiti tattao sadiay bayat ti panangsukatda iti taraon ken inumenda.

¹⁷Wen, maibusandanto iti kanen ken inumen. Mapukawdanto ti namnamada. Main-inutdanto a mapukaw gapu kadagiti basolda.”