Read Iloko Ezekiel 41 Bible Online

Ezekiel 41 - Iloko bible

Ezekiel 41

¹Kalpasanna, impannak ti lalaki iti akintengnga a kuarto. Rinukodna ti pagnaan: 10 a kadapan ti kaunegna,

²ken 18 a kadapan ti kalawana. Walo a kadapan ti kapuskol ti agsumbangir a didingna. Rinukodna ti kuarto: 68 a kadapan ti kaatiddogna ken 34 a kadapan ti kaakabana.

³Simrek ti lalaki iti maudi a kuarto. Rinukodna ti pagnaan: Tallo a kadapan ti kaunegna, ket 10 a kadapan ti kalawana. Sangapulo ket maysa a kadapan ti kapuskol dagiti agsumbangir a didingna.

⁴Rinukodna ti kuarto. Tallopulo ket uppat a kadapan a kuadrado ti rukodna. Kinunana kaniak, “Daytoy ti Kasantoan a Disso.”

⁵Rinukod ti lalaki ti kapuskol ti akinruar a diding ti Templo: 10 a kadapan. Naikapet iti aglikmut iti Templo ti adu a babassit a kuarto a pito a kadapan ti kaakaba.

⁶Tallo ti kadsaaran dagiti kuarto. Tallopulo a kuarto ti tunggal kadsaaran. Uming-ingpis ti diding ti Templo iti tunggal kadsaaran tapno agsadag dagiti kuarto iti diding uray saanda a maikapet iti diding ti Templo.

⁷Iti kasta, no kitaen manipud iti ruar, kasla agpapada ti kapuskol dagiti diding ti Templo manipud iti baba nga agpangato. Daytoy ti gapuna a mabalin ti mapan iti akintengnga ken akingngato a kadsaaran manipud iti akimbaba a kadsaaran.

⁸Walo a kadapan ti kapuskol ti akinruar a diding dagitoy a kuarto; adda maysa a ruangan a mapan kadagiti kuarto iti akin-amianan a paset ti Templo ken maysa a ruangan nga agturong kadagiti kuarto iti abagatan a paset. Nakitak nga adda nangato a pagnaan iti lawlaw ti Templo; 10 a kadapan ti pagngatngatoenna iti likmut ken katukad ti fondasion dagiti kuarto a naikapet kadagiti diding ti Templo. Iti nagbaetan ti pagnaan ken dagiti patakder nga us-usaren dagiti papadi, adda pagnaan 34 a kadapan ti kaakabana iti lawlaw ti Templo.

¹²Adda patakder iti laud a sumango iti Templo. Sangagasut ket limapulo a kadapan ti kaatiddogna ken 116 a kadapan ti kaakabana. Siam a kadapan ti kapuskol dagiti didingna nga aglawlaw.

¹³Rinukod ti lalaki ti ruar ti Templo. Limapulo a metro ti kaatiddogna. Kasta met ti rukod manipud iti likudan ti Templo agingga iti paraangan a dumanon iti kaadaywan a paset ti patakder iti laud.

¹⁴Limapulo a metro met ti kaadayo ti sangoanan ti Templo agraman ti bakante a lugar iti agsumbangir.

¹⁵Rinukodna ti kaatiddog ti patakder iti laud ti Templo ken dagiti agsumbangir a diding a sumango iti paraangan: 50 met a metro ti kaatiddogna. Ti masungad a kuarto iti Templo, ti Nasantoan a Disso, ken ti Kasantoan a Disso,

¹⁶natapkalan iti kayo manipud iti datar agingga kadagiti tawa. Mabalin a serraan dagiti tawa.

¹⁷Nasaknapan dagiti akin-uneg a diding kadagiti imahen agingga iti kangato dagiti ridaw.

¹⁸Sinan-palma ken sinan-nagpayak a parsua dagiti naikitikit. Nagbibinnallaet a naikitikit ti ladawan dagiti sinan-palma ken dagiti nagpayak nga animal iti diding iti entero a kuarto. Dua ti rupa ti tunggal nagpayak nga animal:

¹⁹rupa ti tao ti maysa a sumango iti palma ken rupa ti leon ti maysa a sumango iti bangir a palma. Kasta ti naikitikit iti aglikmut,

²⁰manipud iti datar agingga iti kangatoan a paset ti ridaw.

²¹Kuadrado dagiti poste ti Nasantoan a Disso. Iti sangoanan ti pagserkan ti Kasantoan a Disso, adda kasla

²²altar a kayo. Maysa ket kagudua a metro ti kangato ken maysa a metro ti kaakabana. Pasig a kayo dagiti poste ti sulina, ti pagbatayanna ken dagiti didingna. Imbaga kaniak ti lalaki, “Daytoy ti lamisaan nga adda iti sangoanan ti Apo.”

²³Adda ridaw iti tunggal dalan nga agturong iti Nasantoan a Disso, kasta met iti dalan nga agturong iti Kasantoan a Disso.

²⁴Aglukat iti tengnga dagiti dua a rikep ti ridaw.

²⁵Kas kadagiti diding, naikitikit kadagiti rikep ti Nasantoan a Disso dagiti ladawan dagiti nagpayak nga animal ken sinan-palma. Adda tapar a kayo iti akinruar a paset ti ridaw a sumrek iti kuarto.

²⁶Adda dagiti tawa iti sikigan daytoy a kuarto, ket naikitikit dagiti sinan-palma kadagiti diding.