Read Iloko Ezekiel 42 Bible Online

Ezekiel 42 - Iloko bible

Ezekiel 42

¹Inkuyognak ti lalaki a napan iti akinruar a paraangan ket nagtuloykam iti maysa a patakder iti akin-amianan a paset ti Templo iti saan nga adayo iti patakder nga adda iti akinlaud a pungto ti Templo.

²Agatiddog daytoy a patakder iti 168 a kadapan ken 84 a kadapan ti kaakabana.

³Iti maysa a bangir, sumango iti bakante a lugar nga agrukod iti 34 a kadapan iti abay ti Templo. Iti maysa a bangir, sumango iti dalan iti akinruar a paraangan. Naaramid a tallo a katukad ti patakder, tunggal maysa naisanud ti pannakaipasdekna iti nakaituonanda.

⁴Adda dalan a 16 a kadapan ti kaakabana ken 168 a kadapan ti kaatiddogna iti akin-amianan a bangir. Adda dagiti pagserkan iti dayta a bangir.

⁵Ak-akikid dagiti akingngato a kuarto ngem dagiti akimbaba ken akintengnga a kuarto agsipud ta naipasanudda.

⁶Dagiti kuarto kadagiti tallo a katukad, natukantukadda ket awan ti adigida a kas kadagiti patakder iti paraangan.

⁷Iti akimbaba a kadsaaran, iti akinruar a diding ti patakder, buhos ti 84 a kadapan ti kaatiddogna ket adda kukuarto ti nabati nga 84 a kadapan. Iti akingngato a kadsaaran, adda kukuarto iti entero a kaatiddog ti patakder.

⁹Iti akindaya a pungto ti patakder a pangrugian ti diding, adda dagiti ridaw nga agturong iti akinruar a paraangan. Iti abagatan a paset ti Templo, adda umasping a patakder a saan nga adayo iti patakder nga adda iti akinlaud a pungto ti Templo.

¹¹Adda dalan iti sangoanan dagiti kuarto a kas iti dalan nga adda iti bangirna ti amianan. Pumada ti rukod ti pannakaaramid ken ti kita dagiti pagserkanna.

¹²Adda ridaw ti babaen dagiti kuarto iti bangirna ti abagatan ti patakder, iti akindaya a pungto a pangrugian ti diding.

¹³Kinuna ti lalaki kaniak, “Nasantoan dagitoy dua a patakder a panganan dagiti papadi kadagiti kasantoan a daton no dumatagda iti sangoanan ti Apo. Gapu ta nasantoan dagiti kuarto, ikabil dagiti papadi dagiti kasantoan a sagut sadiay: dagiti daton a makan, daton a pakapakawanan ti basol wenno daton gapu iti basol.

¹⁴No rummuar dagiti papadi iti Templo, ket kayatda ti mapan iti akinruar a paraangan, masapul nga ibatida kadagitoy a kuarto dagiti nasantoan a pagan-anay nga inusarda bayat ti panagserbida iti Apo. Agkawesdanto kadagiti sabali a pagan-anay sakbay a rummuarda iti paguummongan dagiti tattao.”

¹⁵Idi narukoden ti lalaki ti uneg ti Templo, rimmuarkami iti pagserkan a sumango iti daya sana rinukod ti ruar ti Templo.

¹⁶Iti bangirna ti daya, agrukod iti 840 a kadapan; kastoy met ti rukod iti bangirna ti amianan, abagatan ken laud ti Templo.

²⁰Iti kasta, sakupen ti bakud ti 840 a kadapan a kuadrado. Agserbi ti bakud a kas baet ti nasantoan a lugar ken ti saan a nasantoan.