Read Iloko Ezekiel 43 Bible Online

Ezekiel 43 - Iloko bible

Ezekiel 43

¹Impannak ti lalaki iti pagserkan a sumango iti daya.

²Sadiay, nakitak ti idadateng ti dayag ti Dios ti Israel manipud iti daya. Kasla daranudor ti dalluyon ti baybay ti timek ti Dios, ket nagraniag ti daga iti makapurar a lawag.

³Umasping daytoy a parmata iti nakitak idi narebbek ti Jerusalem ken iti nakitak idi idiay igid ti Karayan Kebar. Nagpaklebak.

⁴Limmasat ti makapurar a lawag iti akindaya a pagserkan ket napan iti Templo.

⁵Impangatonak ti espiritu ti Apo ket impannak iti akin-uneg a paraangan. Nakitak sadiay ti Templo a napno iti dayag ti Apo.

⁶Sadiay, nagtakder ti lalaki iti abayko, ket nangngegko ti Apo a nakisao kaniak manipud iti Templo.

⁷Kinunana, “Anak ti tao, daytoy ti tronok. Makipagnaedak ditoy kadagiti Israelita ket iturayak ida iti agnanayon. Saanton a tulawan dagiti Israelita ken dagiti arida ti nasantoan a naganko babaen iti panagdaydayawda kadagiti didiosen wenno babaen iti panangipasdekda iti monumento dagiti natay nga arida.

⁸Indekket dagiti ari dagiti inaramidda a dapian ken baotek ti palasioda kadagiti dapian ken baotek ti Templok. Diding laeng ti nagbabaetanmi. Tinulawanda ti nasantoan a naganko kadagiti makarimon nga aramidda ket gapu iti pungtotko, dinadaelko ida.

⁹Ita, masapul nga isardengdan ti panagdaydayawda kadagiti didiosen ken dadaelenda dagiti monumento dagiti arida. No aramidenda ti kasta, makipagnaedakto kadakuada iti agnanayon.”

¹⁰Ket intuloy ti Apo, “Anak ti tao, iladawam ti Templo kadagiti Israelita. Ibagam nga adalenda ti planona. Ibagam kadakuada nga agbainda iti dakes nga aramidda.

¹¹No agbainda, ilawlawagmo kadakuada ti plano ti Templo: ti langana, dagiti pagserkan ken dagiti pagruaranna, ti sukogna, ti pannakaurnos dagiti alikamenna ken dagiti amin nga alagaden ken linteg a maannurot iti Templo. Isuratmo amin dagitoy tapno makitada ti pannakaurnos ti amin nga adda iti Templo ken tapno ammoda a tungpalen dagiti amin nga alagaden.

¹²Daytoy ti linteg iti Templo: Nasagradoan ken nasantoan ti amin a lugar iti lawlawna iti tapaw ti bantay.”

¹³Daytoy ti rukod ti altar, segun ti pagrukod a naaramat iti pannakarukod ti Templo. Iti aglikmut iti puon ti altar, adda pagayusan a 50 a sentimetro ti kaunegna ken 50 a sentimetro ti kaakabana. Adda leblebna a 25 a sentimetro ti kangatona.

¹⁴Uppat a kadapan ti katayag ti kababaan a paset ti altar. Limapulo a sentimetro ti kangato ti sumaruno a tukad a naipasanud iti duapulo a pulgada manipud igidna nga aglawlaw. Ti sumaruno naipasanud met manipud iti igid iti duapulo a pulgada nga aglawlaw ket pito a kadapan ti kangatona.

¹⁵Ditoy kangatoan a tukad ti pakapuoran dagiti daton. Dua a metro ti kangatona. Nangatngato dagiti uppat a sulina ngem ti dadduma a paset ti rabawna.

¹⁶Kuadrado ti rabaw ti altar. Innem a metro ti tunggal sikigan.

¹⁷Kuadrado met ti akintengnga a tukad. Pito a metro iti tunggal sikigan. Naun-uneg iti 25 a sentimetro ngem ti nakaisaadanna a tukad. (Limapulo a sentimetro ti kalawa ti pagayusanna.) Adda iti akindaya a paset ti agdan nga agpangato iti altar.

¹⁸Kinuna ti Apo a Dios kaniak, “Anak ti tao, denggem ti ibagak kenka. Inton malpas ti altar, masapul nga ikonsagrarmo babaen ti panangidatagmo iti daton a mapuoran iti rabawna ken ti panangwarsim iti dara dagiti animal a maidaton.

¹⁹Dagiti laeng Levita a papadi a kaputotan ni Zadok ti umay dumatag nga agserbi kaniak. Siak, ti Apo a Dios, ti mangibilin iti daytoy. Ikkamto ida iti bumaro a baka nga idatagda a kas daton gapu iti basol.

²⁰Mangalaka iti dara ti baka ket ipulagidmo kadagiti uppat a suli iti rabaw ti altar ken kadagiti uppat a suli ti akintengnga a tukad ti altar ken iti aglikmut nga ikingna. Kastoy nga annongem ti seremonia ti pannakadalus ken panangikonsagrarmo iti altar.

²¹Alaem ti baka a naidaton gapu iti basol ket puoram iti naituding a lugar iti ruar ti Templo.

²²Iti sumuno nga aldaw, mangalaka iti bulog a kalding nga awan pakapilawanna ket idatagmo a kas daton gapu iti basol. Annongem ti seremonia ti pannakadalus ti altar babaen iti dara dayta a kalding a kas iti inaramidmo iti dara ti baka.

²³Kalpasanna, mangalaka iti bumaro a baka ken iti kalakian a karnero nga awan pakapilawanda.

²⁴Idatagmo ida kaniak. Warakiwakan dagiti papadi dagitoy nga animal iti asin sada puoran a kas daton kaniak.

²⁵Iti las-ud ti pito nga aldaw, inaldaw a mangidatagka iti daton gapu iti basol: maysa a kalakian a kalding, maysa a bumaro a baka ken maysa a kalakian a karnero. Masapul nga awan ti pakapilawanda.

²⁶Pito nga aldaw nga ikonsagrar dagiti papadi ti altar ket isaganada ti pannakausarna.

²⁷Iti maikawalo nga aldaw, irugi dagiti papadi ti agidatag kadagiti daton a mapuoran ken daton a pakikappia dagiti tattao iti rabaw ti altar. Iti kasta, maragsakanakto kadakayo amin. Siak, ti Apo a Dios, ti agsasao.”