Read Iloko Ezekiel 45 Bible Online

Ezekiel 45 - Iloko bible

Ezekiel 45

¹Inton mabingbingay ti daga ket maikkan ti tunggal tribu iti bingayna, maysa a paset ti maidaton iti Apo. Sangapulo ket dua ket kagudua a kilometro ti kaatiddog ken 10 a kilometro ti kaakabana. Maibilang a nasantoan ti entero a paset.

²Iti daytoy a disso, mailasin ti 250 a metro a kuadrado a pakabangonan ti Templo ken nalikmut iti bakante a lugar a 25 a metro ti kaakaba.

³Kagudua daytoy a disso ti mailasin a pakaipatakderan ti Templo, ti kasantoan a lugar; sangapulo ket dua ket kagudua a kilometro ti kaatiddog ken lima a kilometro ti kaakabana.

⁴Nasantoanto daytoy a paset ti pagilian a mailasin nga agpaay kadagiti papadi nga agserbi iti Apo iti Templona. Ditoyto ti pakabangonan dagiti balbalayda ken pakaipatakderan ti Templo.

⁵Ti sabali a kagudua ket mailasin a kukua dagiti Levita nga agserbi iti Templo. Addanto il-ili sadiay a pagnaedanda.

⁶Addanto met disso a mailasin a pakabangonan ti siudad a dumna iti nasantoan a lugar. Agrukod iti 12 ket kagudua a kilometro ti kaatiddog ken dua ket kagudua a kilometro ti kaakabana. Mabalinto ti siasinoman nga Israelita ti agnaed sadiay.

⁷Masapul nga adda met daga a mailasin nga agpaay iti prinsipe nga agturay. Manipud iti akinlaud a beddeng iti nasantoan a disso, agpa-laud iti Taaw Mediterranean; manipud iti akindaya a beddeng dumanon iti akindaya a beddeng ti pagilian. Pumada ti kaatiddogna iti kaatiddog ti maysa kadagiti disso a naituding kadagiti tribu ti Israel.

⁸Daytoyto a disso ti bingay ti prinsipe nga agturay iti daga ti Israel tapno dinanton idadanes dagiti tattao ket ipalubosna ti dadduma a paset ti pagilian a tagikuaen dagiti tribu ti Israel.

⁹Kinuna ti Apo a Dios, “Nabayag unayen nga agbasbasolkayo, dakayo a turayen ti Israel! Isardengyon ti kinaranggas ken panangidadanesyo kadagiti tattao. Aramidenyo ti tumutop ken nalinteg. Masapul a diyon pagtalawen dagiti tattaok iti dagada. Siak, ni Yahweh, a Dios ti mangibagbaga kadakayo iti daytoy.

¹⁰“Masapul nga agusar tunggal maysa iti husto a pagtimbangan ken pagsukatan.

¹¹“Ti efa ti mausar kadagiti namaga a sukaten ket pumada ti bat a mausar iti likido. Ti omer isu ti mausar a pagibasaran. Adtoy dagiti sukat: 1 omer = 10 efa = 10 bat

¹²“Dagiti pagtimbanganyo isu dagitoy: 20 gera = maysa a siklo 60 siklo = maysa a mina

¹³“Daytoy ti pangibasaranyo kadagiti daton nga idatagyo: Trigo: apagkanem a pulo a paset ti apityo. Sebada: apagkanem a pulo a paset ti apityo. Lana ti olibo: apagkasangagasut ti maibunga dagiti kayoyo. (Sukatenyo iti bat: 10 bat = maysa nga omer = 1 kaor.) Karnero: maysa a karnero ti tunggal duagasut manipud iti pagaraban ti Israel. “Mangidatagkayo iti daton a makan, animal a mapuoran a sibubukel, animal a daton a pakikappia, tapno mapakawan dagiti basbasolyo. Siak nga Apo a Dios ti mangibilin iti daytoy.

¹⁶“Maipan dagitoy a daton iti prinsipe a madama nga agturay ti Israel.

¹⁷Pagrebbenganna ti mangted iti animal a mapuoran a sibubukel, dagiti daton a makan ken dagiti daton a mainum a maipaay iti entero nga Israel iti Fiesta ti Lutuad, dagiti Aldaw a Panaginana, ken dadduma a fiesta. Isu ti mangted iti daton a pakapakawanan ti basol, iti daton a makan, dagiti daton a sibubukel a mapuoran ken kadagiti daton a pakikappia tapno mapakawan ti basol dagiti tattao ti Israel.”

¹⁸Kinuna ti Apo a Dios, “Iti umuna nga aldaw iti umuna a bulan, mangidatonka iti toro a baka nga awan pakapilawanna, ket aramidem ti seremonia ti pannakadalus ti Templo.

¹⁹Mangala ti padi iti dara ti animal a daton gapu iti basol ket ipulagidna kadagiti baotek ti ruangan ti Templo, kadagiti uppat a suli ti altar ken kadagiti adigi ti pagserkan nga agturong iti akin-uneg a paraangan.

²⁰Kastoyto manen ti aramidem iti maikapito nga aldaw iti dayta met la a bulan a maipaay iti siasinoman a nagbasol a dina igagara wenno dina ammo. Iti kasta, mapagtalinaedmo a nasantoan ti Templo.

²¹Iti maika-14 nga aldaw iti umuna a bulan, irugim a rambakan ti Fiesta ti Paskua. Pito nga aldaw a manganto dagiti tattao iti tinapay nga awan lebadurana.

²²Iti umuna nga aldaw ti fiesta, masapul a mangidatag ti prinsipe a madama a turayen iti toro a baka a kas daton gapu kadagiti basolna ken gapu kadagiti basol dagiti amin a tattao.

²³Iti las-ud ti pito nga aldaw ti fiesta, inaldaw a mangidatag kaniak iti daton a mapuoran: pito a toro a baka, pito a kalakian a karnero nga awan pakapilawanda. Mangidatag pay iti maysa a bulog a kalding iti inaldaw kas daton gapu iti basol.

²⁴Iti tunggal baka ken karnero a maidaton, mapakuyogan iti kagudua a salup ti daton a makan ken tallo nga apagkapat a galon ti lana ti olibo.

²⁵“No maipapan iti Fiesta dagiti Abong-abong, mangrugi iti maika-15 nga aldaw ti maikapito a bulan. Inaldaw a mangidatag ti prinsipe a madama nga agturay iti daton gapu iti basol, daton a mapuoran a sibubukel ken daton a makan ken lana ti olibo. Kastoy ti aramidenna iti unos ti pito nga aldaw.”