Read Iloko Ezekiel 47 Bible Online

Ezekiel 47 - Iloko bible

Ezekiel 47

¹Insublinak ti lalaki iti pagserkan ti Templo. Adda ubbog nga aggapu iti sirok ti pagserkan ket agpadaya ti ayusna, iti lugar a sinangoan ti Templo. Agpababa ti ayusna a lumasat iti akin-abagatan a paset ti altar.

²Inruarnak ti lalaki iti masakupan ti Templo ket impagnanak iti akin-amianan a ruangan sanak inturong iti akinruar a ruangan a sumango iti daya. Adda bassit nga ubbog, nga agay-ayus iti akin-abagatan a paset ti ruangan.

³Babaen iti pagrukodna, nangrukod iti 500 a metro nga agpababa iti daya ket pinapagnanak iti agay-ayus a danum. Pagatlipaylipayko laeng ti danum.

⁴Nangrukod manen iti 500 a metro ket pagattumengko ti danum. Nangrukod manen iti 500 a metro ket pagatsiketko ti danum.

⁵Nangrukod pay iti 500 a metro; immadalem ti danum ket diak matukod. Adalem unay ket saan a maballasiw malaksid no langoyen.

⁶Kinunana kaniak, “Anak ti tao, tandaanam amin dagitoy.” Insublinak iti igid ti karayan,

⁷ket idi dumtengak sadiay, nakitak ti nakaad-adu a kayo iti agsumbangir.

⁸Kinunana kaniak, “Agayus daytoy a danum iti daga nga agturong iti daya ket agtarus iti Tanap ti Jordan ken iti Natay a Baybay. Inton dumanon iti Natay a Baybay, pasayaatenna ti raman ti danum.

⁹Sadinoman a pagayusan daytoy a karayan, maaddaan iti amin a kita ti animal ken ikan. Pasayaaten daytoy a danum ti raman ti danum ti Natay a Baybay. Mangted iti biag iti sadinoman a pagayusanna.

¹⁰Manipud iti Ubbog ti Engedi agingga iti Ubbog ti Eneglaim, addanto dagiti mangngalap iti igid ti baybay ket ibilagdanto dagiti iketda sadiay. Adunto a kita ti ikan ti masarakan sadiay kas iti masarakan iti Taaw Mediterranean.

¹¹Ngem agtalinaedto a naapgad dagiti kadandanuman ken libtong iti asideg iti igid ti baybay tapno adda pagtaudan ti asin.

¹²Iti agsumbangir nga igid ti karayan, agtubonto ti amin a kita ti kayo a mangted iti taraon. Dinto malaylay dagiti bulongda ket didanto agsardeng nga agbunga. Binulanto nga adda nasayaat a bungada gapu ta kanayon a maay-ayusanda iti danum nga aggapu iti Templo. Agpaayto a taraon dagiti bunga ket maaramat met nga agas dagiti bulongda.”

¹³Kinuna ti Apo a Dios, “Dagitoy dagiti beddeng ti daga a pagbibingayan dagiti 12 a tribu. Duanto a paset ti bingay ti tribu ni Jose.

¹⁴Insapatak kadagiti kapuonanyo nga itedko daytoy a daga kadakuada; ita, pagpapadaenyo ti bingay ti tunggal maysa.

¹⁵“Agpadaya ti beddeng iti amianan. Mangrugi iti Taaw Mediterranean, agturong iti siudad ti Hetlon, mapan iti Bessang ti Hamat, iti siudad ti Zedad,

¹⁶kadagiti siudad ti Berota ken Sibraim (addada iti nagbaetan ti beddeng ti pagarian ti Damasco ken ti pagarian ti Hamat), sa dumanon iti siudad ti Ticon (iti asideg ti beddeng ti pagarian ti Hauran).

¹⁷Mangrugi iti amianan a beddeng, aggapu iti Mediterranean nga agpadaya a mapan iti siudad ti Enon. Ket iti amiananna, dagiti beddeng ti Damasco ken Hamat.

¹⁸“Agpa-abagatan ti beddengna iti daya. Mangrugi iti nagbaetan ti sakup ti Damasco ken Hauran. Ti Karayan Jordan ti nagbaetan ti daga ti Israel iti laud ken Galaad iti daya agingga iti Tamar iti Natay a Baybay.

¹⁹“Agpa-abagatan-a-laud ti beddengna iti abagatan. Mangrugi iti Tamar agingga kadagiti nalangto a karuotan ti Kades Meriba sa agpa-amianan-a-laud iti igid ti beddeng ti Egipto agingga iti Taaw Mediterranean.

²⁰“Ti beddengna iti laud, mangrugi iti Taaw Mediterranean ket agpa-amianan agingga iti laud ti Bessang ti Hamat.

²¹“Pagbibingayan dagiti tribuyo daytoy a daga.

²²Kukuayo daytoy iti agnanayon. Inton bingayenyo, maikkan met iti bingay dagiti ganggannaet a makipagnaed kadakayo, agraman dagiti annakda a nayanak ditoy. Maibilangda a pudno nga umili nga Israelita ket makibinnunotda met iti bingayda iti daga a kas kadagiti tribu ti Israel.

²³Tunggal ganggannaet, awatenna ti bingayna iti tribu a pakipagnaedanna.” Daytoy ti sao ti Apo a Dios.