Read Iloko Ezekiel 48 Bible Online

Ezekiel 48 - Iloko bible

Ezekiel 48

¹Agpadaya ti akin-amianan a beddeng ti daga; mangrugi iti Taaw Mediterranean agingga iti siudad ti Hetlon sa aglayon iti Bessang ti Hamat, iti siudad ti Enon ket dumanon iti beddeng dagiti pagarian ti Damasco ken Hamat. Umawat ti tunggal tribu iti maysa a paset ti daga a mangrugi iti akindaya a beddeng nga agpa-laud iti Taaw Mediterranean iti kastoy a panagsasaganad manipud amianan agingga iti abagatan: Dan Aser Neftali Manases Efraim Ruben Juda

⁸Mailasin ti sumaruno a paset ti daga nga agpaay iti naisangsangayan a pakausaran. Sangapulo ket dua a kilometro ti kaakabana manipud amianan agingga iti abagatan ket pumada ti kaatiddogna manipud daya nga agpa-laud, kas kadagiti paset a naited kadagiti tribu. Mabangonto ti Templo iti daytoy a lugar.

⁹Iti tengnga daytoy a lugar, adda naisangsangayan a paset a maidaton ken ni Yahweh; 12 a kilometro ti kaatiddog ken sangapulo a kilometro ti kaakaba.

¹⁰Adda bingay dagiti papadi iti daytoy nasagradoan a lugar. Manipud iti daya nga agpa-laud agrukod iti 12 a kilometro; manipud amianan nga agpa-abagatan, lima a kilometro. Mabangonto ti Templo ni Yahweh iti tengnga daytoy a lugar.

¹¹Agpaay kadagiti papadi a kaputotan ni Zadok daytoy nasantoan a lugar. Nagserbida a sipupudno kaniak ket saanda a tinulad dagiti dadduma nga Israelita a nagaramid iti dakes kas kadagiti dadduma a kaputotan ni Levi.

¹²Isut' gapuna a maikkanda iti naisangsangayan a disso a dumna iti bingay dagiti Levita. Isunto ti kasantoan a lugar.

¹³Addanto met naisangsangayan a daga dagiti Levita iti abagatan ti bingay dagiti papadi. Sangapulo ket dua a kilometro manipud daga nga agpa-laud ken lima a kilometro manipud amianan nga agpa-abagatan.

¹⁴Ti paset a maidaton ken ni Yahweh ti kapintasan iti daga. Awan ti mailako a pasetna, wenno maisukat wenno maited iti sabali. Nasantoan ken kukua ni Yahweh.

¹⁵Saan a nasantoan ti paset a natda nga agrukod iti 12 a kilometro ti kaatiddogna ken dua ket kagudua a kilometro ti kaakabana. Maaramatto daytoy nga agpaay iti sapasap. Mabalinda a pagnaedan wenno mulaan. Mabangonto ti siudad iti tengngana.

¹⁶Kuadradonto nga aglawa iti 2,250 a metro.

¹⁷Iti likmut ti siudad, addanto bakante a lugar nga agakaba iti 125 a metro.

¹⁸Kalpasan ti pannakaipasdek ti siudad, addanto mabati a paset a dumna iti nasantoan a disso. Naituding daytoy a talonen dagiti tattao nga agnaed iti siudad. Lima a kilometro nga agpadaya ken lima a kilometro nga agpa-laud.

¹⁹Mabalin ti siasinoman nga agtrabaho iti siudad ti agtalon sadiay, uray ania a tribu ti nagtaudanna.

²⁰Ngarud, kuadrado ti entero a paset a nailasin ket agrukod iti 12 a kilometro ti tunggal bangir. Mairaman iti daytoy ti nakabangonan ti siudad.

²¹Iti dayaen ken iti lauden iti daytoy a lugar a pagyanan ti Templo, ti daga dagiti papadi, ti daga dagiti Levita ken ti siudad, kukua ti prinsipe a madama nga agturay ti natda a daga. Dumanon iti daya ti akindaya a beddeng ken iti laud iti Taaw Mediterranean ket nabeddengan iti amianan iti lugar a kukua ti Juda ken iti abagatan iti kukua ti tribu ni Benjamin.

²³Iti abagatan daytoy naisangsangayan a lugar, umawat dagiti dadduma a tribu iti maysa a paset ti daga a mangrugi iti akindaya a beddeng agingga iti akinlaud a beddeng iti kastoy a panagsasaganad manipud amianan agingga iti abagatan: Benjamin Simeon Issacar Zebulon Gad

²⁸Iti bangirna ti abagatan ti daga a naited iti tribu ti Gad, agpa-abagatan nga agpa-laud ti beddeng manipud iti Tamar agingga iti nalangto a karuotan ti Kades sa agpa-amianan nga agpa-laud iti beddeng ti Egipto agingga iti Taaw Mediterranean.

²⁹Kinuna ti Apo a Dios, “Kastoy ti pannakabingbingay ti daga a maited kadagiti tribu ti Israel ken ipatawidda kadagiti kaputotanda.”

³⁰Agdagup iti 12 dagiti ruangan ti siudad. Tallo ti ruangan ti tunggal bakud nga agrukod iti 2,500 a metro; napanaganan ti tunggal ruangan iti nagan ti maysa a tribu. Napanaganan dagiti ruangan iti akin-amianan a bakud iti Ruben, Juda ken Levi; dagiti adda iti akin-abagatan a bakud, Simeon, Issacar ken Zebulon; ket dagiti adda iti laud a bakud, Gad, Aser ken Neftali.

³⁵Agdagup iti 9,000 a metro ti kaatiddog ti bakud a nanglikmut iti siudad. “Adda-Ditoy-ti-Apo” ti nagan ti siudad manipud idin.