Read Iloko Ezekiel 5 Bible Online

Ezekiel 5 - Iloko bible

Ezekiel 5

¹Kinuna ti Apo, “Anak ti tao, mangalaka iti natadem a kampilan, ket aramatem a pangkuskos iti barbas ken buokmo. Timbangem dagiti buok samo pagkatloen.

²Puoram ti apagkatlo ti buok iti uneg ti siudad inton malpas ti pannakalakubna. Babaen iti kampilanmo, putputdem ti maysa nga apagkatlo bayat ti panangsursormo iti ruar ti siudad. Ipurruakmo iti angin ti natda nga apagkatlo, ket asutek ti kampilanko bayat ti panangkamatko kadakuada.

³Mangiteddaka iti sangkabassit a buok, ket balkotem iti gayadan ti kagaymo.

⁴Kalpasanna, mangiruarka manen iti sangkabassit samo ipurruak iti apuy. Isudanto ti pagtaudan ti apuy a manguram iti entero a pagilian ti Israel.”

⁵Kinuna ti Apo a Dios: “Kitaem ti Jerusalem. Binangonko iti tengnga ti lubong, a linikmut dagiti pagilian.

⁶Ngem sinukir ti Jerusalem dagiti bilinko ket impakitana a dakdakes ngem dagiti sabali a nasion, a nasuksukir ngem dagiti pagilian a kabangibangna. Linaksid ti Jerusalem dagiti bilinko ket dina kayat a salimetmetan dagiti lintegko.

⁷Ita, Jerusalem, denggem ti saok nga Apo Dios. Gapu ta dika nagtulnog kadagiti lintegko ken dimo sinalimetmetan dagiti bilbilinko, ad-adu ti pinarnuaymo a dakes ngem dagiti nasion iti lawlawmo. Tinuladmo ti ugali dagiti sabali a pagilian.

⁸Iti kasta, siak nga Apo a Dios, ibagak kenka a busorenka. Dusaenka iti imatang dagiti amin a tattao.

⁹Gapu kadagiti amin nga inaramidmo a kagurak, dusaekto ti Jerusalem iti nakaro, dusa a diak pay indissuor ket diakto met sunotanen nga idissuor.

¹⁰Pagangayanna, idiay Jerusalem, sidaento dagiti amma ken inna dagiti annakda, ket sidaento met dagiti annak dagiti nagannak kadakuada. Dusaenkayto, ket iwarawarakto dagiti natda a sibibiag iti amin a suli ti lubong.

¹¹“Ngarud, agsipud ta siak, ni Yahweh, ti sibibiag a Dios, ken agsipud ta tinulawam ti templok kadagiti amin nga inaramidmo a dakes ken makarimon, awanto ti asik a mangpukaw kenka. Daytoy ti sao ti Apo a Dios.

¹²Apagkatlo dagiti tattaom ti matay iti sakit ken bisin iti uneg ti siudad. Matayto met ti apagkatlo iti gubat iti ruar ti siudad; iwarawarakto ti sabali nga apagkatlo iti amin a lugar ket kamatekto ida iti kampilan.

¹³“Mariknamto ti dagsen ti unget ken pungtotko agingga a mapnekak. Inton mapasamak amin dagitoy, mamatikanton a siak, ni Yahweh, ti nagsao a sipupungtot gapu iti saanmo a panagtalinaed a napudno.

¹⁴Amin a tao nga aglabas nga aggapu kadagiti nasion iti lawlawmo, laisendakanto ket adaywandakanto.

¹⁵“No kaunget ken kapungtotka ket dusaenka, agbutengto dagiti amin a nasion iti lawlawmo. Karimondakanto a kitaen ket pagang-angawandakanto.

¹⁶Isardengkonto ti pannakaited ti taraonmo ket bay-ankanto a matay iti bisin. Mariknamto ti saem ti bisin a kasla natadem a pana a naibiat a mangdadael kenka.

¹⁷Yegkonto ti bisin, ket ibaonkonto dagiti narungsot nga animal a mangpapatay kadagiti annakmo. Yegkonto ti sakit, ranggas ken gubat a mangpapatay kenka. Siak, ni Yahweh, ti nagsao iti daytoy.”