Read Iloko Ezekiel 6 Bible Online

Ezekiel 6 - Iloko bible

Ezekiel 6

¹Nagsao ti Apo kaniak.

²Kinunana, “Anak ti tao, kitaem dagiti bambantay ti Israel, ket ipakaammom kadakuada ti mensahek.

³Ibagam kadagiti bambantay ti Israel a denggenda ti sao ti Apo a Dios. Daytoy ti saok kadagiti bantay, turod, derraas ken tanap: Mangyegakto iti kampilan a mangdadael kadagiti luglugar a pagdaydayawan dagiti tattao kadagiti imahen.

⁴Marbanto dagiti altar ket madadaelto dagiti pagpuoranyo iti insenso. Mapapatayto dagiti amin a tattao sadiay iti sangoanan dagiti imahenda.

⁵Iwalangkonto ti bangkay dagiti Israelita; iwarawarakto dagiti tulangda iti lawlaw dagiti altar.

⁶Marebbekto dagiti amin a siudad ti Israel. Iti kasta, madadaelto dagiti amin a lugar a pagdaydayawanda kadagiti imahen. Marumrumekto dagiti amin nga altar ken imahenda, maburakto dagiti pagpuoranda iti insenso, ket mapukawto dagiti amin nga inaramidda.

⁷Mapapatayto dagiti tattao iti amin a lugar ket dagiti makalasat, bigbigendanto a siak ni Yahweh.

⁸“Ilisikto iti pannakapapatay ti sumagmamano ket iwarawarakto ida kadagiti nasion a pagnaedandanto.

⁹Sadiay, agbiagdanto a kas napagtalaw a balud. Malagipdakto ket maammoandanto a dinusak ken imbabainko ida, agsipud ta tinallikudandak ket ad-adda a kinayatda dagiti imahen ngem siak. Kaguradanto dagiti bagbagida gapu kadagiti dakes ken nakababain nga inaramidda.

¹⁰Maammoandanto a siak ni Yahweh, ket saan nga ang-angaw dagiti ballaagko.”

¹¹Kuna ti Apo a Dios, “Danogem ti imam, agtabbugaka ket agsangitka gapu iti amin a dakes ken makarimon nga aramid dagiti Israelita. Mataydanto iti gubat, bisin ken sakit.

¹²Agsakit ken matayto dagiti adda iti adayo; ket dagiti adda iti asideg mataydanto iti gubat. Matayto iti bisin dagiti makalasat. Mariknadanto ti nakaro a pungtotko.

¹³Maiwalangto dagiti bangkay iti ayan dagiti imahen ken iti lawlaw dagiti altar. Maiwarawaradanto pay kadagiti nangato a turod, iti tapaw dagiti bantay, iti sirok ti nalangto a kayo ken dadakkel a lugo, ken iti amin a lugar a nagpuoranda kadagiti daton nga agpaay kadagiti imahen. Iti kasta, maammoanton ti amin a tao a siak ni Yahweh.

¹⁴Wen, dissoakto ida ket dadaelekto dagiti pagilianda. Paglangalangekto manipud iti disierto iti abagatan agingga iti siudad ti Ribla iti amianan, ket awanto ti labsak a lugar a pagnaedan dagiti Israelita. Ket maammoanton ti amin a tao a siak ni Yahweh.”