Read Iloko Ezekiel 7 Bible Online

Ezekiel 7 - Iloko bible

Ezekiel 7

¹Nagsao ti Apo kaniak.

²Kinunana, “Anak ti tao, kastoy ti kunak nga Apo a Dios iti daga nga Israel: Dumtengen ti panungpalan ti entero nga Israel!

³“Israel, dimtengen ti panungpalam. Mariknamto ti pungtotko ta ukomenka gapu kadagiti aramidmo. Balsenkanto gapu iti amin a makarimon nga aramidmo.

⁴Dikanto pakawanen wenno kaasian. Dusaenkanto gapu kadagiti makarimon nga aramidmo tapno maammoam a siak ni Yahweh.”

⁵Kastoy ti kuna ti Apo a Dios, “Agsasarunonto a didigra ti agdissuor kenka.

⁶Nalpasen! Daytoyen ti panungpalan. Daytoyen ti kanibusanam!

⁷Dumtengen ti panungpalanyo, dakayo a tattao nga agnaed iti daga nga Israel. Asidegen ti tiempo nga awanton ti panagrarambak kadagiti pagdaydayawan iti bantay, ket pasigto aminen a pannakariribuk.

⁸“Iti saan a mabayag, mariknayonton ti amin a dawel ti pungtotko, ta ukomenkayto gapu kadagiti aramidyo. Balsenkayto gapu iti makarimon nga aramidyo.

⁹Dikayto pakawanen wenno kaasian. Dusaenkayto gapu kadagiti aramidyo. Iti kasta, maammoanyonto a siak ni Yahweh, ket siak ti mangdusa kadakayo.”

¹⁰Dumtengen ti aldaw ti didigra. Umad-adun ti kinaranggas. Nakaro unayen ti kinatangsit.

¹¹Ad-adu a kinadakes ti patauden ti kinadawel. Awanto ti agtalinaed a kukuada; mapukawto ti kinabaknangda, ti dayagda wenno kinaraniagda.

¹²Dumtengen ti tiempo. Asidegen ti aldaw nga awanton ti serserbi ti panaggatang ken panaglako, ta agdissuorton ti pungtot ti Dios kadagiti amin a tattao.

¹³Awanton ti agtagtagilako nga agpaut ti panagbiagna tapno mapasublina ti napukawna ta agdissuoren ti pungtot ti Dios iti tunggal maysa. Saan a makalasat dagiti managdakdakes.

¹⁴Mapuyotto dagiti trumpeta ket agsagananto ti amin ngem awan ti mapan makigubat ta agdissuor ti pungtot ni Yahweh iti tunggal maysa.

¹⁵Adda agraranget kadagiti kalsada, ket kadagiti balbalay adda sakit ken bisin. Matayto iti ranget dagiti adda iti away, ket dagiti adda iti siudad, mataydanto iti sakit ken bisin.

¹⁶Addanto dagiti agkamang kadagiti bambantay a kasla napabutngan a kalapati manipud kadagiti tanap. Agsasainnekdanto gapu kadagiti basbasolda.

¹⁷Agkapsutto dagiti imada, ket agkutukotto dagiti tumengda.

¹⁸Agarruatdanto iti nakersang a lupot. Agtigergerdanto. Makuskosanto dagiti uloda ket maibabaindanto.

¹⁹Ibellengdanto a kas basura dagiti balitok ken pirakda iti kalsada, agsipud ta saan ida a maisalakan ti balitok ken pirak inton idissuor ni Yahweh ti pungtotna. Saanda a mabalin nga aramaten dagitoy a panggun-od iti tarigagayda wenno pangep-ep iti bisinda. Dagiti balitok ken pirak ti nakaigapuan ti panagbasolda.

²⁰Pinagparammagda dagiti napintas nga alahasda, ket inaramidda ida a makarimon nga imahen. Isut' gapuna a pinagbalin ni Yahweh a karimonda dagiti sanikuada.

²¹Kuna ni Yahweh, “Palubosakto dagiti ganggannaet nga agsamsam kadagiti sanikuada. Agawento dagiti managdakdakes ti kinabaknangda ket tulawanda.

²²Diakto bumibiang uray no rabngisenda ti Templok, uray no serken dagiti mannanakaw ket tulawanda.

²³“Awanen ti urnos. Adu unayen ti mapappapatay ket napnon dagiti siudad iti kinaranggas.

²⁴Yegkonto ditoy dagiti kadaksan a nasion, ket ipaluboskonto a tagikuaenda dagiti balbalayyo. Mapukawton dagiti napipigsa a lallaki ti panagtalekda kadagiti bagbagida inton palubosak dagiti nasion a mangtulaw kadagiti lugar a pagdaydayawanyo.

²⁵Mapukawen ti namnama. Birokenyonto ti talna ket pulos a diyonto masarakan.

²⁶Agsasarunonto a dumteng ti didigra, kasta met ti dakes a damag. Agpakpakaasikayto kadagiti profeta nga ipakaammoda dagiti mapasamak iti masakbayan. Awanto ti maisuro dagiti papadi kadagiti tattao. Awanto met ti maibalakad dagiti panglakayen.

²⁷Agladingitto ti ari, mapukawto ti namnama ti prinsipe, ket agtigergerto dagiti tattao gapu iti buteng. Dusaenkayto gapu kadagiti amin nga inaramidyo, ket ukomenkayto a kas iti panangukomyo kadagiti sabali a tattao. Daytoyto ti mangipakita a siak ni Yahweh.”