Read Iloko Ezekiel 8 Bible Online

Ezekiel 8 - Iloko bible

Ezekiel 8

¹Iti maikalima nga aldaw ti maikanem a bulan ti maikanem a tawen ti pannakaitalawmi a kas balud, agtugtugaw a makisarsarita kaniak iti balayko dagiti papangulo dagiti naitalaw a taga-Juda. Pagammoan, immay kaniak ti pannakabalin ti Apo a Dios.

²Timmangadak ket nakitak iti parmata ti umap-apuy a kasla tao. Manipud iti siket nga agpababa, kasla apuy ti bagina. Manipud iti siket nga agpangato naraniag a kasla napasileng a bronse.

³Inyunnatna ti kasla ima ti tao ket ginammatanna ti buokko. Iti daytoy a parmata, impangatonak ti espiritu ti Dios ket impannak idiay Jerusalem. Indissonak iti akin-uneg a pagserkan iti akin-amianan a ruangan ti Templo nga ayan ti maysa nga imahen a makarimon iti Dios.

⁴Nakitak sadiay ti makapurar a lawag a mangipakita iti kaadda ti Dios ti Israel, kas iti nakitak idi addaak iti igid ti Karayan Kebar.

⁵Kinuna ti Dios kaniak, “Anak ti tao, kumitaka iti amianan.” Kimmitaak, ket iti asideg ti altar iti ruangan a pagserkan nakitak ti estatua a makarimon iti Dios.

⁶Kinuna ti Dios kaniak, “Anak ti tao, makitam kadi ti ar-aramiden dagiti Israelita? Kitaem dagiti makarimon nga ar-aramidenda ditoy a pakaigapuan ti pannakayadayok iti nasantoan a lugarko. Ad-adunto pay ti makitam a dakdakes ngem dagitoy.”

⁷Impannak iti pagserkan ti akinruar a paraangan, ket impakitana kaniak ti maysa nga abut iti bakud.

⁸Kinunana, “Anak ti tao, palawaem dayta nga abut.” Tinubtobak ti bakud, ket nakitak ti maysa a ruangan.

⁹“Sumrekka,” kinunana, “ket kitaem ti agkakadakes ken makarimon nga ar-aramidenda ditoy.”

¹⁰Simrekak ngarud ket kinitak. Napno dagiti diding kadagiti naikur-it a ladawan dagiti uleg ken sabsabali nga animal a maibilang a narugit ken dagiti dadduma a banag a pagdaydayawan dagiti Israelita.

¹¹Pitopulo a papangulo nga Israelita ti adda sadiay, agraman ni Jaazanias nga anak ni Safan. Siiiggem ti tunggal maysa iti pagpuoran iti insenso, ket umasimbuyok ti asuk ti insenso.

¹²Sinaludsod ti Dios kaniak, “Anak ti tao, makitam dagiti nalimed nga ar-aramiden dagiti papangulo dagiti Israelita? Addada amin nga agdaydayaw iti maysa a kuarto a napno kadagiti imahen. Kunada nga ipambar, ‘Saannatayo a makita ti Apo. Binaybay-anen ti Apo ti pagilian.’”

¹³Kalpasanna, kinuna ti Apo kaniak, “Makitamto ida nga agaramid kadagiti makarimon a banag a dakdakes ngem dagita.”

¹⁴Iti kasta, impannak iti akin-amianan a pagserkan ti Templo ket impakitana kaniak dagiti babbai nga agsasangit gapu iti ipapatay ni didiosen a Tammuz.

¹⁵Sinaludsodna, “Anak ti tao, makitam dayta? Ad-adunto pay ti makitam a makarimon.”

¹⁶Iti kasta, inserreknak iti akin-uneg a paraangan ti Templo. Adda agarup 25 a lallaki iti pagserkan ti santuario, iti nagbaetan ti altar ken ti pagnaan. Nakatallikudda iti santuario, ket agtamtamedda iti daya nga agdaydayaw iti lumlumgak nga init.

¹⁷Kinuna ti Apo kaniak, “Anak ti tao, makitam dayta? Saan a mapnek dagitoy a tattao ti Juda nga agar-aramid kadagiti makarimon a bambanag kas makitam ditoy, ken iti panangisaknapda ti kinaranggas iti entero a pagilian. Wen, saanda a mapnek. Masapul nga umayda ditoy mismo a Templo ket degdeganda ti pungtotko. Kitaem no kasano ti panangpabainda kaniak iti kadaksan a wagas!

¹⁸Mariknadanto ti amin a dawel ti pungtotko. Diakto pakawanen wenno kaasian ida. Uray no ipukkawda ti kararagda iti ingga ti kabaelanda, diakto ipangag ida.”