Read Iloko Ezekiel 9 Bible Online

Ezekiel 9 - Iloko bible

Ezekiel 9

¹Nangngegko nga impukkaw ti Dios, “Umaykayo, dakayo a nadutokan a mangdusa iti siudad. Itugotyo dagiti igamyo.”

²Dagus a rimmuar ti innem a lallaki iti akinruar nga akin-amianan a ruangan ti Templo. Adda igam ti tunggal maysa. Kaduada ti maysa a tao a nakakawes iti linen ken nakasalikad iti pagsurat. Napanda amin nagtakder iti asideg ti altar a bronse.

³Kalpasanna, nagpangato ti makapurar a lawag a mangipakita iti kaadda ti Dios ti Israel manipud kadagiti nagpayak a parsua a nagsaadanna ket nagdisso iti pagserkan ti Templo. Pinukkawan ti Apo ti tao a nakakawes iti linen.

⁴Kinunana, “Sursorem ti siudad ti Jerusalem, ket markaam ti muging dagiti agasug ken mariribukan gapu iti amin a makarimon a maar-aramid iti siudad.”

⁵Nangngegko met a kinuna ti Dios kadagiti dadduma a lallaki, “Surotenyo nga agsursor iti siudad ket agpapataykayo. Awan ispalenyo. Awan kaasianyo.

⁶Patayenyo dagiti lallakay, babbaro, babbalasang, inna ken ubbing. Ngem diyo sagsagiden dagiti adda marka ti mugingna. Irugiyo ditoy Templok.” Iti kasta, rinugianda ti nagpapatay ket inunada dagiti papangulo nga agtaktakder iti Templo.

⁷Kinuna ti Dios kadakuada, “Tulawanyo ti Templo. Punnoenyo ti paraangan kadagiti bangkay. Rugianyon ti agtrabaho!” Ngarud, rinugianda ti nagpapatay kadagiti tattao iti siudad.

⁸Sisiak ti nabati iti Templo bayat ti panagpapatayda. Nagpaklebak, ket impukkawko, “O Apo a Dios, makapungtotka kadi la unay iti Jerusalem ta papatayem amin a natda nga Israelita?”

⁹Insungbat ti Dios, “Nadagsen dagiti basol dagiti Israelita ken dagiti taga-Juda. Nagpapatayda iti entero a daga ket insaknapda ti kinadakes iti Jerusalem. Kunada, ‘Binaybay-anen ti Apo ti dagatayo. Saannatayo a makita.’

¹⁰Aramidek kadakuada ti inaramidda kadagiti padada a tao.”

¹¹Kalpasanna, nagsubli ti tao a nakakawes iti linen. Kinunana ken ni Yahweh, “Naaramidkon ti imbilinmo kaniak.”