Read Iloko Daniel 1 Bible Online

Daniel 1 - Iloko bible

Daniel 1

¹Iti maikatlo a tawen a panagturay ni Jehoyakim nga ari ti Juda, rinaut ni Nebucadnesar nga ari ti Babilonia ti Jerusalem, ket linakubna ti siudad.

²Binay-an ti Apo a matnag ni Ari Jehoyakim iti pannakabalin ni Nebucadnesar; ket pinalubosanna nga agsamsam kadagiti gameng iti Templo. Impan ni Nebucadnesar iti templo dagiti didiosenna idiay Babilonia dagiti innalana a balud. Inkabilna met dagiti gameng iti pagiduldulinan ti templo.

³Binilin ti ari ni Aspenaz, ti kangatoan nga ofisialna, a pumili iti sumagmamano a balud nga Israelita a nagtaud iti familia ti ari ken kadagiti dadduma a natan-ok a familia.

⁴Masapul nga agtutubo ken nataer dagiti pilienna; awan depekto ti bagida, masirib, nasanay ken nalaka a makasursuro tapno maikarida nga agserbi iti palasio. Isuro ida ni Aspenaz nga agbasa ken agsurat iti lengguahe dagiti taga-Babilonia.

⁵Imbilin pay ti ari a maikkanda iti inaldaw a taraon ken arak, kas kadagiti kamkameng iti palasio. Tallo a tawen nga agsanayda sakbay a maidatagda iti ari.

⁶Kadagiti napili, mairaman da Daniel, Hananias, Misael ken Azarias. Taga-Judada amin.

⁷Binaliwan ni Aspenaz ti naganda. Beltesazar ti impanaganna ken ni Daniel; Sedrac ken ni Hananias; Mesac ken ni Misael; ken Abednego ken ni Azarias.

⁸Inkeddeng ni Daniel a saan a mangan iti taraon ken uminum iti arak nga aggapu iti palasio tapno saan a matulawan. Nagpatulong ken ni Aspenaz.

⁹Indalan met ti Dios ti ofisial a makipagrikna ket palugodanna ni Daniel.

¹⁰Nupay kasta, kinuna ni Aspenaz ken ni Daniel, “Mabutengak iti natan-ok nga ari. Imbilinna no ania ti kanen ken inumem, ket no saanka a nasalun-at a kas kadagiti dadduma nga agtutubo, amangan no papapataynak.”

¹¹Napan ngarud ni Daniel iti guardia a dinutokan ni Aspenaz a mangaywan kenkuana ken kadagiti tallo a gagayyemna.

¹²Kinunana, “Paliiwennakami iti uneg ti sangapulo nga aldaw. Ikkannakami laeng iti natnateng a taraon ken danum nga inumen.

¹³Kalpasanna, idilignakami kadagiti agtutubo a mangmangan iti taraon ti ari, ket no anianto ti makitam a langami, isunto ti pangibatayam iti pangngeddengmo.”

¹⁴Immannugot ti guardia a padasenda ti kasta iti uneg ti sangapulo nga aldaw.

¹⁵Kalpasan ti 10 nga aldaw, nakitana a nasalsalun-at ken naluklukmegda ngem dagiti agtutubo a nangan iti nabaknang a taraon ti ari.

¹⁶Manipud idin, impalubos ti guardia nga ituloyda ti agsida iti natnateng a saan ket a ti taraon ti ari.

¹⁷Pinaraburan ti Dios dagiti uppat nga agtutubo iti kinasirib iti amin a kita ti sursuro iti literatura ken filosofia. Saan la a dayta, pinaraburanna pay ni Daniel iti laing a mangibaga iti kaipapanan ti parmata ken tagtagainep.

¹⁸Naggibus ti tallo a tawen nga intuding ti ari. Innala ni Aspenaz dagiti amin nga agtutubo a lallaki ket indatagna ida ken ni Nebucadnesar.

¹⁹Kinasao amin ida ti ari ket awan nasarakanna a nalalaing ngem da Daniel, Hananias, Misael ken Azarias. Iti kasta, nagbalinda a kamkameng dagiti agserserbi iti palasio.

²⁰Uray ania ti saludsoden ti ari kadakuada, wenno uray ania a problema ti saludsodenna, natakuatanna a dagiti uppat nalalaingda nga amang ngem ti uray siasinoman a mammuyon wenno salamangkero iti entero a pagarian.

²¹Nagserbi ni Daniel iti palasio agingga a sinakup ni Ciro nga emperador ti Persia ti Babilonia.