Read Iloko Daniel 10 Bible Online

Daniel 10 - Iloko bible

Daniel 10

¹Iti maikatlo a tawen a panagturay ni Ciro a kas emperador ti Persia, adda naipaltiing ken ni Daniel a managan pay iti Beltesazar. Pudno ti mensahe ngem narigat a maawatan. Nailawlawag kenkuana babaen iti parmata.

²Iti dayta a tiempo, tallo a lawasen nga agay-ayunarak.

³Diak nangan iti uray ania a naimas a taraon wenno nagsida iti karne wenno imminum iti arak wenno nagsagaysay agingga a saan a nalpas ti tallo a lawas.

⁴Iti maika-24 nga aldaw ti umuna a bulan ti tawen, agtaktakderak idi iti igid ti dakkel a Karayan Tigris.

⁵Timmangadak ket nakitak ti maysa a tao a nakakawes iti linen ken nakabarikes iti puro a balitok.

⁶Naraniag ti bagina a kas iti alahas. Naraniag met ti rupana a kasla kimat. Kasla gumilgil-ayab nga apuy dagiti matana. Kasla napasileng a bronse dagiti takkiag ken saksakana. Kasla met arimbangaw ti umariwekwek a tattao ti timekna.

⁷Siak laeng ti nakakita iti parmata. Saan a nakita dagiti lallaki a kinakuyogko ngem nagbutengda iti napalalo. Nagtatarayda a naglemmeng ket

⁸nabatiak a mangbuybuya iti daytoy nakaskasdaaw a parmata. Nariknak a kimmapsutak; nagbalbaliw ti rupak ket awan ti makabigbig kaniak.

⁹Nagsao ti tao ket natuangak nga awan ti puotko.

¹⁰Kalpasanna, adda ima a nangpatakder kaniak; agtigtigergerak pay laeng.

¹¹Kinuna ti anghel kaniak, “Daniel, ay-ayatennaka ti Dios. Tumakderka ket denggem a naimbag ti ibagak. Naibaonak nga umay kenka.” Idi mangngegko daytoy, timmakderak nga agtigtigerger pay laeng.

¹²Kinunana kaniak, “Dika agbuteng, Daniel. Impangag ti Dios ti kararagmo manipud pay idi immuna nga aldaw a panangikeddengmo nga agpakumbabaka tapno maaddaanka iti pannakaawat. Immayak a kas sungbat ti kararagmo.

¹³Binusornak ti prinsipe iti pagarian ti Persia iti uneg ti 21 nga aldaw. Ngem immaynak tinulongan ni Miguel a maysa kadagiti pangulo nga anghel, agsipud ta sisiak ti nabati iti Persia.

¹⁴Immayak tapno ipalawagko kenka ti mapasamakto kadagiti kailiam. Maysa a parmata daytoy maipapan iti masakbayan.”

¹⁵Idi naisaonan daytoy, napadumogak nga awan ti nasaok.

¹⁶Pagammoan, sinagid ti anghel dagiti bibigko. Kinunak kenkuana, “Apo, pagkapsutennak daytoy a parmata, ket diak magawidan ti pigergerko.

¹⁷Kaslaak la tagabu nga agtaktakder iti sangoanan ti apona. Kasano ti pannakisaok kenka? Awanen ti pigsa ken angesko.”

¹⁸Iniggamannak manen ket pimmigsaak.

¹⁹Kinunana, “Dungdungngoennaka ti Dios, isut' gapuna nga awan koma ti pagdanagam wenno pagbutngam. Pakirdem ta pakinakemmo.” Idi nasaona daytoy, ad-adda pay a pimmigsaak ket kinunak, “Apo, ibagam ti kayatmo nga ibaga kaniak. Pinasayaatmo ti riknak.”

²⁰Kinunana, “Ammom kadi no apay a naibaonak kenka? Immayak tapno ipakaammok kenka ti nailanad iti Libro ti Kinapudno. Ita, masapul nga agsubliak ket gubatek dagiti anghel a guardia ti Persia. Kalpasan dayta, agparangto ti anghel a mangbambantay iti Grecia. Awan ti makatulong kaniak malaksid ken ni Miguel, ti anghel a guardia ti Israel.