Read Iloko Daniel 11 Bible Online

Daniel 11 - Iloko bible

Daniel 11

¹Isu ti makaammo a tumulong ken mangsalaknib kaniak.

²Ita, pudno ti ibagak kenka.” Kinuna ti anghel: “Addanto pay tallo nga ari a mangituray iti Persia. Sumarunonto ti maikapat a nabakbaknang ngem isuda amin. Ngem iti kapigsa ti bileg ken kinabaknangna, karitennanto ti pagarian ti Grecia.

³“Kalpasanna, tumaudto ti maysa a maingel nga ari. Nalawanto ti pagarian nga iturayanna, ket aramidennanto ti kaykayatna.

⁴Ngem inton kapigsa ti bilegna, marpuogto ti pagarianna ket mabingbingayto iti uppat a paset. Awanto ti ari nga agtaud iti kaputotanna. Sabalinto dagiti agturay iti lugarna ngem awanto ti bilegda a kas kenkuana.

⁵“Bumilegto ti ari ti Egipto. Nupay kasta, addanto maysa kadagiti heneralna a nabilbileg pay ngem isu. Dakdakkelto a pagarian ti iturayanna.

⁶Kalpasan ti sumagmamano a tawen, agkaduanto ti ari ti Egipto ken ti ari ti Siria. Agasawanto dagiti annakda. Ngem saanto nga agbayag ti panagkaduada. Mapapatayto ti babai, dagiti agserserbi kenkuana, ti anakna agraman ti asawana.

⁷Addanto ari a tumaud kadagiti kabagian ti babai. Darupennanto ti armada ti Siria. Serkennanto ti sarikedkedda ket parmekenna ida.

⁸Ipanawnanto dagiti imahen ti didiosenda agraman dagiti agkakapateg nga alikamen a balitok ken pirak a naidaton kadagitoy a didiosen ket ipanna ida idiay Egipto. Kalpasan ti sumagmamano a tawen nga adda kappia,

⁹rautento ti ari ti Siria ti ari ti Egipto, ngem mapilitto nga agsanud.

¹⁰“Agummongto dagiti lallaki nga annak ti ari ti Siria iti adu a soldado ket agsaganada a makigubat. Maysanto kadakuada ti dumarup a saan a mapasardeng a kas iti layus ket rautennanto ti maysa a sarikedked ti kabusor.

¹¹Iti pungtot ti ari ti Egipto, gubatennanto ti ari ti Siria, ket parmekennanto ti dakkel nga armadana.

¹²Pagpalangguadnanto ti balligina ken dagiti adu a soldado a pinatayna, ngem saanto a kankanayon ti panagballigina.

¹³“Mangummongto manen ti ari ti Siria iti adu a mannakigubat ket maaddaanto iti dakdakkel nga armada. Kalpasan iti sumagmamano a tawen, rumautto manen agraman ti dakkel nga armada a naan-anay ti pannakaarmasna.

¹⁴Adunto ti bumusor iti ari ti Egipto. Ket sumagmamanonto a naranggas a tattao kadagiti kailiam, Daniel, ti sumukir gapu iti parmata a nakitada, ngem maparmekdanto.

¹⁵Ngarud, lakubento ti ari ti Siria ti maysa a nasarikedkedan a siudad ket parmekenna. Saanto nga ituloy dagiti soldado ti Egipto ti pannakigubatda. Uray dagiti kapigsaan kadakuada, awanto ti pigsada a makigubat.

¹⁶Aramidento ti rimmaut a taga-Siria ti kaykayatna kadakuada, ket awanto ti sumaranget kenkuana. Agtakderto iti Naikari a Daga ket iturayannanto nga awan mangsingsinga kenkuana.

¹⁷“Planoento ti ari ti Siria ti rumaut ket aramatennanto ti entero nga armadana. Tapno dadaelenna ti pagarian ti kabusorna, makitulagto nga agkaduada ket ipaasawana ti anakna ngem saanto a matungpal ti panggepna.

¹⁸Kalpasan dayta, rautennanto dagiti nasion iti igid ti baybay, ket adunto ti parmekenna kadakuada. Ngem addanto ganggannaet a pangulo a mangparmek kenkuana, ket gibusannanto ti kinatangsitna.

¹⁹Agsublinto ti ari kadagiti sarikedked iti bukodna a daga, ngem maparmekto, ket daytanto ti kanibusananna.

²⁰“Sabalinto nga ari ti sumukat kenkuana nga agturay. Idadanesnanto dagiti tattao babaen iti panangibaonna kadagiti tattaona nga agsingir iti buis tapno umadu ti kinabaknang ti pagarianna. Iti saan a mabayag, mapapatayto ti ari, ngem saan nga iti paggugubatan.”

²¹Intuloy ti anghel ti panangilawlawagna: “Managdakdakesto a tao ti sumukat nga ari ti Siria. Awan kalinteganna nga agari, ngem umayto a di mapakpakadaan ket agawennanto ti turay babaen iti kinasikap.

²²Madadaelto dagiti armada a bumusor kenkuana. Mapapatayto met ti Nangato a Padi ti Dios.

²³Iti pannakitulagna kadagiti dadduma a nasion, allilawennanto ida, ket bumilegto a bumileg nupay bassit a nasion ti iturayanna.

²⁴Kellaatto a rautenna ti maysa a nabaknang a probinsia, ket aramidennanto dagiti banag a saan nga inaramid dagiti kapuonanna. Ibunongnanto kadagiti pasurotna dagiti sanikua a sinamsamna iti gubat. Kayatnanto a darupen dagiti sarikedked, ngem aggibuston dagiti aldawna.

²⁵“Situturedto a mangummong iti dakkel nga armada a mangdarup iti Egipto a sisasagana met ti dakkel ken nabileg nga armadana a sumaranget kenkuana. Ngem maallilawto ti ari ti Egipto ket dinto agballigi.

²⁶Dadaelento dagiti kaasitgan a mammagbaga kenkuana. Mapapatayto ti adu a soldadona, ket maikisapto ti armadana.

²⁷Maymaysanto a lamisaan ti panganan dagiti dua nga ari, ngem dakesto ti panggepda. Aginnulboddanto. Didanto magun-od ti tarigagayanda, ta di pay dimteng ti tumutop a tiempo.

²⁸Agsublinto ti ari ti Siria iti bukodna a pagilian ket yawidnanto dagiti amin a sinamsamna. Ngem sakbay nga agawid, sipapasneknanto a dadaelen ti nasantoan a tulag. Aramidennanto ti kaykayatna santo agsubli iti bukodna a daga.

²⁹“Iti saan a mabayag, rautennanto manen ti Egipto, ngem saanto a mapasamak ti kas iti napasamak idi.

³⁰Dumtengto dagiti taga-Roma a nakasakay kadagiti barko tapno sarangtenda ket agbutengto. “Sipupungtotto nga agawid ket padasennanto a dadaelen ti nasantoan a tulag. Tungpalennanto ti balakad dagiti nangtallikud iti nasantoan a tulag.

³¹Ibaonnanto ti sumagmamano kadagiti soldadona tapno tulawanda ti Templo. Pagsardengendanto ti inaldaw a panagidatag iti daton ket isaaddanto ti Nakabutbuteng a Mangdadael.

³²Aramatento ti ari ti panangallilaw tapno maguyugoyna a makikadua dagiti mangtallikud iti relihionda, ngem sumarangetto dagiti tattao a napudno iti Dios.

³³Dagiti tattao a masirib, ibingaydanto ti kinasiribda kadagiti dadduma. Ngem iti las-ud ti sumagmamano nga aldaw, addanto dagiti matay kadakuada iti gubat ken iti apuy. Matakawan ken maibaludto ti dadduma kadakuada.

³⁴Addanto tumulong kadakuada bayat ti panagpapatay, nupay dakes ti panggep ti kaaduan a timmipon kadakuada.

³⁵Mapapatayto ti dadduma kadagiti masirib, ngem gapu iti daytoy, magugoran ken madalusanto dagiti tattao. Agtuloyto daytoy agingga a dumteng ti panungpalan, ti tiempo nga intuding ti Dios.

³⁶“Aramidento ti ari ti Siria ti kaykayatna. Ipasindayagnanto a natantan-ok ngem iti uray ania a didiosen ket itangsitnanto a nabilbileg ngem ti Kangatoan a Dios. Maaramidnanto daytoy agingga iti tiempo a panangdusa ti Dios kenkuana. Aramidento ti Dios dagiti inkeddengna nga aramiden.

³⁷Dinto ikankano ti ari ti didiosen a nagdaydayawan dagiti kapuonanna ken ti didiosen nga ay-ayaten dagiti babbai. Kinapudnona, dinanto bigbigen dagiti amin a didiosen, agsipud ta ipagarupna a natantan-ok ngem dagiti didiosen.

³⁸Padayawannanto ketdi ti didiosen a mangsalsalaknib kadagiti sarikedked. Agidatagto kadagiti balitok, pirak ken alahas ken dadduma a napapateg a sagut iti didiosen a saan a nagdaydayawan dagiti kapuonanna.

³⁹Tapno masalaknibanna dagiti sarikedkedna, usarennanto dagiti tattao nga agdaydayaw iti ganggannaet a didiosen. Dakkelto a pammadayaw ti itedna kadagiti umawat kenkuana a kas agturay. Isaadnanto ida iti nangato nga akem, ket ikkannanto ida iti daga a kas gunggonada.

⁴⁰“Inton dandani dumteng ti panungpalan ti ari ti Siria, darupento ti ari ti Egipto. Sarangtennanto iti amin a bilegna babaen kadagiti lugan a pakigubat, kabalio ken adu a barko. Kaslanto layus a mangsakup iti adu a pagilian.

⁴¹Rautennanto met ti Naikari a Daga ket patayennanto ti rinibribu a tattao. Ngem makalasatto ti pagilian ti Edom, Moab ken ti nabati a paset ti Ammon.

⁴²Inton rautenna dagita a pagilian, saanto a makalisi uray ti Egipto.

⁴³Ipanawnanto dagiti nailemmeng a gameng a balitok ken pirak ken amin a napateg a sanikua ti Egipto. Sakupennanto ti Libia ken ti Etiopia.

⁴⁴Ngem agbutengto gapu iti damag nga aggapu iti daya ken iti amianan. Sipupungtotto a makigubat ket adunto a tattao ti papatayenna.

⁴⁵Bangonennanto pay dagiti dadakkel a toldana a kas ari iti nagbaetan ti baybay ken ti bantay a nakabangonan ti Templo. Ngem matayto, ket awanto sadiay ti tumulong kenkuana.”