Read Iloko Daniel 2 Bible Online

Daniel 2 - Iloko bible

Daniel 2

¹Iti maikadua a tawen a panagturay ni Nebucadnesar, adda natagtagainepna a nangriribuk unay kenkuana ken puon ti saanna a nakaturturogan.

²Iti kasta, pinaayabanna dagiti amin a mammuyon, salamangkero, baglan ken managanito tapno ibagada ti kaipapanan ti tagtagainepna. Idi dimmatagda,

³kinuna ti ari kadakuada, “Mariribukanak iti natagtagainepko. Kayatko a maammoan ti kaipapananna.”

⁴Simmungbatda ket kinunada iti pagsasao nga Arameo, “Sapay koma ta agbiag ti Natan-ok nga Ari iti agnanayon! Ibagam ti tagtagainepmo ket ipalawagmi ti kaipapananna.”

⁵Kinuna ti ari kadakuada, “Naikeddengkon a no diyo maibaga kaniak ti tagtagainep ken ti kaipapananna, marangrangkaykayto ket marakrakto pay dagiti balbalayyo.

⁶Ngem no maibagayo kaniak ti tagtagainep ken ti kaipapananna, gunggonaankayo babaen ti pannangtedko kadagiti sagut ken pammadayaw. Ibagayo ngarud kaniak ita ti tagtagainep ken ti kaipapananna.”

⁷Kinunada manen nga insungbat, “Natan-ok nga Ari, no ibagam kadakami ti tagtagainepmo, ipalawagmi kenka ti kaipapananna.”

⁸Gapu iti daytoy, kinuna ti ari, “Husto tay kunak. Kayatyo a dadaelen ti tiempo agsipud ta makitayo a naikeddengkon ti rumbeng a mapasamak.

⁹No saanyo a maibaga ti tagtagainepko, agpapada ti dusayo. Nagnunumoanyo nga ulbodendak bareng no agbaliw ti panunotko. Ibagayo ngarud kaniak ti tagtagainep; iti kasta, maammoak no kabaelanyo pay nga ibaga ti kaipapananna.”

¹⁰Simmungbat dagiti mammagbaga, “Awan ti tao ditoy rabaw ti daga a makaibaga iti kalikagumam, O Ari. Awan pay ari, uray pay isu ti katan-okan ken kabilgan, a nagdawat iti kastoy kadagiti mammuyon, salamangkero, wenno baglan.

¹¹Natan-ok nga Ari, awan ti makaibaga iti sungbat ti saludsodmo malaksid dagiti didiosen, ngem saanda met a makipagtaeng kadagiti tattao.”

¹²Gapu iti dayta, kasta unay ti pungtot ni Nebucadnesar, ket imbilinna a mapapatay amin a mammagbaga iti ari iti Babilonia.

¹³Naipaulog ti bilin a mapapatayda amin agraman ni Daniel ken dagiti gagayyemna.

¹⁴Napan ni Daniel ken ni Arioc a kapitan dagiti guardia ti ari ken nabilin a mangipatungpal iti pannakapapatay dagiti mamasirib iti Babilonia.

¹⁵Sinaludsodna ken ni Arioc no apay a nangipaulog ti ari iti kasta a bilin. Iti kasta, imbaga ni Arioc kenkuana ti napasamak.

¹⁶Dinagdagus ni Daniel ti napan iti ari ket kiniddawna ti ad-adu a tiempo tapno maibagana kenkuana ti kaipapanan ti tagtagainep.

¹⁷Kalpasanna, nagawid ni Daniel ket impakaammona kada Hananias, Misael ken Azarias ti napasamak.

¹⁸Imbagana kadakuada nga agdawatda iti kaasi ti Dios ti langit tapno ipaltiingna kadakuada ti tagtagainep ket saanda a mairaman a mapapatay kadagiti mammagbaga iti Babilonia.

¹⁹Iti dayta a rabii, babaen iti maysa a parmata, naipakaammo ken ni Daniel ti nasao a palimed. Iti kasta, dinaydayawna ti Dios ti langit. Kinunana:

²⁰“Masirib ken mannakabalin ti Dios! Madaydayaw iti agnanayon awan inggana.

²¹Iturayanna dagiti panawen ken tiempo; isu ti mangisaad ken mangikkat kadagiti ari. Ikkanna dagiti tattao iti sirib ken pannakaawat.

²²Ipakaammona dagiti nauneg ken nalimed a banag; ammona dagiti nailemmeng iti nasipnget, ket ti Dios nalawlaw iti lawag.

²³Agdaydayaw ken agraemak kenka, O Dios dagidi kapuonak. Inikkannak iti sirib ken pigsa; impangagmo ti kararagko, ket impakaammom kadakami ti tagtagainep ti ari.”

²⁴Napan ngarud ni Daniel ken ni Arioc a dinutokan ti ari a mangpapatay kadagiti mamasirib ti Babilonia. Kinunana, “Dimo patpatayen ida. Itulodnak iti ari ta ibagak kenkuana ti kaipapanan ti tagtagainepna.”

²⁵Dinardaras ni Arioc nga impan ni Daniel iti sangoanan ni Nebucadnesar. Kinunana iti ari, “Adtoy ti maysa kadagiti Judio a napagtalaw a kas balud a nasarakak a makaibaga kenka iti kaipapanan ti tagtagainepmo.”

²⁶Sinaludsod ti ari ken ni Daniel (a napanagan pay iti Beltesazar), “Maibagam kadi kaniak ti natagtagainepko ken ti kaipapananna?”

²⁷Simmungbat ni Daniel, “Natan-ok nga Ari, awan ti baglan, salamangkero, mammuyon wenno astrologo a makaibaga iti dayta.

²⁸Ngem adda Dios sadi langit a makaibaga kadagiti palimed. Impakaammona kenka, Natan-ok nga Ari, ti mapasamak iti masakbayan. Daytoy ti tagtagainep, ti parmatam idi matmaturogka.

²⁹“Idi matmaturogka, O Natan-ok nga Ari, natagtagainepmo ti maipapan iti masakbayan; ket ti Dios a mangipakaammo kadagiti palimed impakitana kenka ti mapasamakto.

³⁰Ita, naipaltiing kaniak ti palimed, saan a gapu ta masirsiribak ngem ti siasinoman a tao, no di ket tapno maipakaammo kenka ti kaipapanan ti tagtagainepmo ket maawatam dagiti pampanunot a dimteng kenka.

³¹“Natagtagainepmo, O Ari, ti maysa a dakkel nga estatua a naraniag ken agrimrimat. Nagtakder iti sangoanam ket nakabutbuteng a matmatan.

³²Puro a balitok ti ulona. Pirak ti barukong ken takkiagna, ket bronse ti tian ken dagiti luppona.

³³Landok dagiti gurongna; landok ken damili dagiti sakana.

³⁴Idi kitkitaem ti estatua, adda dakkel a bato a nagreggaay iti bantay. Nagdisso ti bato kadagiti landok ken damili a saka ti estatua, ket naburburakda.

³⁵Dagus a narumrumek ti landok, damili, bronse, pirak ken balitok; nagbalinda a kasla tapok iti pagtaltagan no tiempo ti kalgaw. Nayanginda amin ket pulos nga awan ti nabati a paset ti estatua. Ngem nagbalin a dakkel a bantay daydi bato a nagdisso iti estatua, ket nadappatanna ti entero a daga.

³⁶“Daytoy ti tagtagainepmo ket daytoy met ti kaipapananna.

³⁷Sika, Apo, ti katan-okan kadagiti amin nga ari. Pinagbalinnaka ti Dios ti langit nga ari ket inikkannaka iti pannakabalin, bileg ken dayaw.

³⁸Pinagturaynaka iti amin a tao, animal ken tumatayab iti amin a lugar. Sika ti ulo a balitok.

³⁹Kalpasan ti panagturaymo, tumaudto ti sabali nga imperio, ngem saanto a mannakabalin a kas iti pagariam. Kalpasanna, addanto tumaud a maikatlo nga imperio a bronse a mangituray iti entero a daga.

⁴⁰Natangkento met a kas iti landok ti maikapat a pagarian. No kasano ti panangburak ken panangdadael ti landok iti amin, kastanto ti panangburak ken panangrumek daytoy a pagarian kadagiti immun-una a pagarian.

⁴¹Nakitam met a naglaok a damili ken landok dagiti saka ken ramayna. Kayatna a sawen, a mabingbingayto a kas imperio. Ngem natangkento a kas iti landok, uray no naglaok a landok ken damili.

⁴²Kastoy met ti kayat a sawen ti sakana a naaramid iti naglaok a landok ken damili: napigsanto ti pagarian, ngem nalakanto a marpuog.

⁴³Nakitam pay a naglaok ti landok ken damili. Kayatna a sawen a padasento dagiti agtuturay a pagkaykaysaen dagiti familiada babaen iti panagiinnasawada, ngem didanto agtalinaed iti kasta a kasasaad kas iti saan a mabalin a panaglaok ti landok ken damili.

⁴⁴Iti panawen dagitoy nga agturay, mangipasdekto ti Dios ti langit iti pagarian a pulos a dinto agpatingga. Saanto a maparmek dayta a pagarian ngem gibusannanto dagiti amin a pagarian. Isu laeng ti agpaut iti agnanayon.

⁴⁵Nakitam a nargaay ti bato manipud iti bantay ket rinumrumekna ti estatua a landok, bronse, damili, pirak ken balitok. Ipakaammo ti naindaklan a Dios iti Natan-ok nga Ari ti mapasamak iti masakbayan. Imbagak ti pudno a tagtagainepmo ken ti napaypayso a kaipapananna.”

⁴⁶Nagpakleb ni Ari Nebucadnesar kas pammadayawna ken ni Daniel. Kalpasanna, imbilinna a maidatag ken ni Daniel dagiti sakrifisio ken daton.

⁴⁷Kinuna ti ari ken ni Daniel, “Ti Diosmo ti katan-okan kadagiti amin a didiosen, ti Apo dagiti ar-ari. Isu ti mangipalgak kadagiti palimed agsipud ta naipalawagmo daytoy a palimed.”

⁴⁸Insaadna ni Daniel iti nangato a pagtakeman. Inikkanna iti adu a sagut ket pinagbalinna a gobernador iti entero a probinsia ti Babilonia. Isu pay ti insaadna a pangulo dagiti amin a mammagbaga iti pagarian.

⁴⁹Pinatgan ti ari ti kiddawna a madutokan da Sedrac, Mesac ken Abednego a mangimaton kadagiti aramid iti probinsia ti Babilonia. Nagbati ni Daniel iti palasio.