Read Iloko Daniel 3 Bible Online

Daniel 3 - Iloko bible

Daniel 3

¹Nagpaaramid ni Ari Nebucadnesar iti estatua a balitok nga agtayag iti 27 a metro ken tallo a metro ti kaakabana. Pinaipasdekna daytoy iti tanap ti Dura, iti probinsia ti Babilonia.

²Kalpasanna, imbilinna a maummong dagiti ofisiales—dagiti agtuturay, dagiti gobernador, dagiti diputado, dagiti mammagbaga, dagiti tesorero, dagiti hues, dagiti kamkameng ti konseho ken amin nga ofisiales ti probinsia. Masapul a tumabunoda iti pannakaidaton ti estatua nga impasdek ni Ari Nebucadnesar.

³Idi naguummongen dagitoy nga ofisiales, nagtakderda iti sangoanan ti estatua.

⁴Impukkaw ti agipakpakdaar, “Tattao iti amin a nasion, puli ken pagsasao!

⁵Mangngegyonto ti uni ti trumpeta, flauta, lira, sakabutse, ken arpa a sarunoen a danggayan dagiti dadduma a kita ti instrumento. Apaman a mangrugi ti tokar, agpakleb ken agdaydayawkayo iti estatua a balitok nga impasdek ni Ari Nebucadnesar.

⁶No adda saan nga agpakleb ken di agdaydayaw, maitappuakto a dagus iti gumilgil-ayab nga urno.”

⁷Ngarud, idi mangngeg dagiti tattao ti uni dagiti instrumento, nagpakleb dagiti tattao iti amin a nasion, puli ken pagsasao ket nagdaydayawda iti estatua a balitok nga impasdek ni Ari Nebucadnesar.

⁸Sumagmamano kadagiti taga-Babilonia ti nangala iti daytoy a gundaway a nangbabalaw kadagiti Judio.

⁹Kinunada ken ni Ari Nebucadnesar, “Natan-ok nga Ari, manayon koma ti panagbiagmo.

¹⁰Imbilinmo, O Ari, nga apaman a mangrugi ti tokar, masapul nga agpakleb dagiti amin a tattao ket agdaydayawda iti balitok nga estatua.

¹¹Siasinoman a di agrukbab ken agdaydayaw, maitappuak iti gumilgil-ayab nga urno.

¹²Adda sumagmamano a Judio a dinutokam a mangimaton iti probinsia ti Babilonia—da Sedrac, Mesac ken Abednego—a di nangtungpal iti bilinmo, O Ari. Saanda nga agdaydayaw iti diosmo ket saanda met nga agrukbab iti estatua nga impasdekmo.”

¹³Gapu iti daytoy, nagpungtot ni Nebucadnesar, ket pinaayabanna da Sedrac, Mesac ken Abednego.

¹⁴Kinunana kadakuada, “Agpayso kadi, Sedrac, Mesac ken Abednego, a diyo kayat ti agdaydayaw iti diosko ken diyo kayat ti agrukbab iti balitok nga estatua nga impasdekko?

¹⁵Ita ngarud, apaman a mangngegyo ti uni ti trumpeta, flauta, lira, sakabutse ken arpa, ken dagiti dadduma nga instrumento, agrukbab ken agdaydayawkayo iti estatua. Ngem no dikay agdaydayaw, maitappuakkayo a dagus iti gumilgil-ayab nga urno. Kitaek man no adda dios a makaisalakan kadakayo.”

¹⁶Simmungbat da Sedrac, Mesac ken Abednego, “Natan-ok nga Ari, saan a masapul nga ikalinteganmi dagiti bagbagimi.

¹⁷No ti Dios a pagserserbianmi mabalinnakami nga isalakan iti gumilgil-ayab nga urno ken iti pannakabalinmo, aramidenna dayta.

¹⁸Ngem uray no dinakam isalakan, ammoem, O Natan-ok nga Ari, a dikam agdaydayaw iti diosmo, ket dikam agrukbab iti estatua a balitok nga impasdekmo.”

¹⁹Limmabbaga ti rupa ni Nebucadnesar gapu iti napalalo a pungtotna kada Sedrac, Mesac ken Abednego. Imbilinna a marubroban ti urno iti mamimpito a kapudot ti sigud a pudotna.

²⁰Binilinna met dagiti kapigsaan a soldadona a reppetenda dagiti tallo a lallaki sada itappuak ida iti gumilgil-ayab nga urno.

²¹Rineppetda ngarud ida a sikakawes—bado, kagay, kallugong ken amin nga adda iti bagida—ket impurruakda ida iti gumilgil-ayab nga urno.

²²Gapu iti bilin ti ari, kasta unay ti pudot ti urno ket natay iti gil-ayab ti apuy dagiti nangitappuak kada Sedrac, Mesac ken Abednego.

²³Kabayatanna, natnag dagitoy a tallo iti gumilgil-ayab nga apuy. Sirereppetda pay laeng.

²⁴Pagammoan, uray la napalagto ni Nebucadnesar gapu iti siddaawna. Sinaludsodna kadagiti ofisialesna, “Saan aya a tallo a lallaki ti rineppettayo nga intappuak iti gumilgil-ayab nga urno?” “Wen, O Natan-ok nga Ari,” insungbatda.

²⁵“Apay ngarud nga uppat a lallaki ti makitak a magmagna iti apuy?” sinaludsod ti ari. “Saanda a nareppet, ken saanda met a maan-ano—ket kalanglanga ti maysa nga anghel ti maikapat.”

²⁶Iti kasta, napan ni Nebucadnesar iti ruangan ti gumilgil-ayab nga urno ket impukkawna, “Sedrac, Mesac ken Abednego nga adipen ti Kangatoan a Dios, rummuarkayo!” Dinagdagus dagiti tallo ti rimmuar iti urno.

²⁷Naguummong dagiti turayen, dagiti gobernador, dagiti diputado ken dagiti dadduma nga ofisiales ti ari tapno kitaenda dagiti tallo a lallaki a di inan-ano ti apuy. Saan a nasiraman ti buokda, saan a naan-ano dagiti pagan-anayda ket saanda nga agat-asuk.

²⁸Kinuna ni Nebucadnesar, “Madaydayaw ti Dios da Sedrac, Mesac ken Abednego! Imbaonna ti anghelna a mangisalakan kadagitoy a lallaki nga agserbi ken agtalek kenkuana. Kinaykayatda a salungasingen ti bilinko ket impustada ti biagda ngem iti agrukbab ken agdaydayaw iti sabali a dios malaksid iti Diosda.

²⁹“Ita, ibilinko a no adda siasinoman iti uray ania a nasion, puli wenno pagsasao nga agsao iti maibusor iti Dios da Sedrac, Mesac ken Abednego, marangrangkayda ken marakrak ti balayda. Awan ti sabali a dios a makaisalakan iti kastoy.”

³⁰Ket impangato ti ari ti saad da Sedrac, Mesac ken Abednego iti probinsia ti Babilonia.