Read Iloko Daniel 4 Bible Online

Daniel 4 - Iloko bible

Daniel 4

¹Impatulod ni Ari Nebucadnesar daytoy a mensahena kadagiti amin a tattao ti amin a nasion ken puli iti lubong: “Patpatgek a kailiak:

²Denggenyo ti ipakaammok kadakayo maipapan kadagiti datdatlag ken nakaskasdaaw nga impakita kaniak ti Kangatoan a Dios.

³“Naindaklan dagiti datdatlag nga ipakita ti Dios kadatayo! Nabileg unay dagiti nakaskasdaaw a banag nga aramidenna! Agnanayon ti pagarianna ket agturay iti amin a tiempo.

⁴“Natalna idi ti pakinakemko nga agnanaed iti palasiok, iti baet ti narang-ay ken nabuslon a panagbiag.

⁵Ngem adda nakabutbuteng a tagtagainepko; nakaal-alliaw dagiti parmatak bayat ti pannaturogko.

⁶Pinaayabak dagiti amin a mamasirib iti Babilonia tapno ibagada ti kaipapanan ti tagtagainepko.

⁷Dimmatag ngarud kaniak dagiti mammadles, salamangkero, mammuyon ken astrologo. Sinaritak kadakuada ti tagtagainepko, ngem dida maibaga ti kaipapananna.

⁸Kamaudiananna, immay ni Daniel. (Beltesazar ti sabali a naganna, a kas iti nagan ti didiosek.) Adda kenkuana ti nasantoan nga espiritu dagiti didiosen, isu nga imbagak kenkuana ti tagtagainepko. Kinunak,

⁹Beltesazar, sika a pangulo dagiti mammadles, ammok nga adda kenka ti espiritu dagiti nasantoan a didiosen, ket maawatam dagiti amin a palimed. Daytoy ti tagtagainepko, ket ilawlawagmo kaniak.

¹⁰“Idi matmaturogak, naparmatak ti nakataytayag a kayo iti tengnga ti daga.

¹¹Dimmakkel a dimmakkel agingga a timmukno sadi langit, ket makita ti entero a lubong.

¹²Napintas dagiti bulongna. Nakaad-adu ti bungana nga umdas a kanen dagiti tattao iti entero a lubong. Naglinong dagiti atap nga animal iti sirokna. Nagumok dagiti billit iti sangana ket nangan dagiti amin a nabiag a parsua iti bungana.

¹³“Idi pampanunotek daytoy a parmata, nakitak ti maysa nga anghel a nasiglat ken agsipsiput a bimmaba manipud sadi langit.

¹⁴Impukkawna, ‘Pukanem dayta a kayo ket sip-akem dagiti sangana! Rurosem dagiti bulongna ken iwarawaram dagiti bungana. Bugawem dagiti animal iti sirokna ken dagiti tumatayab kadagiti sangana.

¹⁵Ngem ibatim ti pungdol iti daga. Pulipolam iti landok ken bronse. Ibatim iti karuotan iti tay-ak. “‘Bay-am a malinnaawan daytoy a tao ken agtaeng iti tay-ak a kaduana dagiti animal ken mulmula.

¹⁶Masuktanto ti panunotna ket agpanunotto a kas animal agingga a lumabas ti pito a tawen.

¹⁷Daytoy ti inkeddeng dagiti nasiglat ken managsiput nga angheles. Maammoan koma ngarud dagiti amin a tattao iti amin a lugar nga adda pannakabalin ti Kangatoan a Dios kadagiti pagarian dagiti tattao, ket mabalinna nga ited dagiti pagarian iti siasinoman a pilienna—uray ti kanumoan a tao.’

¹⁸“Daytoy ti natagtagainepko,” kinuna ni Ari Nebucadnesar. “Ita, Beltesazar, ibagam kaniak ti kayatna a sawen. Awan kadagiti mammagbaga iti palasio ti makaibaga kaniak iti kayatna a sawen. Ngem maibagam kaniak agsipud ta adda kenka ti espiritu dagiti nasantoan a didiosen.”

¹⁹Nabayag a nailabeg ni Daniel (a managan pay iti Beltesazar) ket nagdanag iti pampanunotenna. Kinuna ti ari kenkuana, “Beltesazar, saanka a mariribuk gapu iti tagtagainepko ken ti kaipapananna.” Simmungbat ni Beltesazar, “Natan-ok nga Ari, dagiti la koman kabusormo ti pakapasamakan ti kayat a sawen ti tagtagainepmo.

²⁰Timmukno sadi langit ti natayag ken natibker a kayo, ket makita ti amin a tao ditoy lubong.

²¹Napipintas dagiti bulongna ket umdas dagiti bungana a taraon ti sangalubongan. Naglinong dagiti atap nga animal iti sirokna ken nagumok dagiti tumatayab kadagiti sangana.

²²“Natan-ok nga Ari, sika ti kayo. Nagbalinka a naindaklan ken nabileg ket matuknom ti langit. Dumanon ti pagturayam kadagiti adayo a paset ti lubong.

²³Idi buybuyaem ti kayo, Natan-ok nga Ari, adda anghel a naggapu sadi langit. Imbagana a pukanem ti kayo ket dadaelem, ngem ibatim ti pungdolna ken parautam iti landok ken bronse. Imbagana pay a bay-am nga agyan daytoy a tao iti tay-ak ken malinnaawan ken makipagyan kadagiti animal iti uneg ti pito a tawen.”

²⁴“Daytoy ti kaipapananna ti tagtagainepmo, Natan-ok nga Ari. Kastoy ti inkeddeng ti Kangatoan a Dios a mapasamakto kenka.

²⁵Maibellengkanto iti tay-ak ket agyankanto sadiay a kaduam dagiti atap nga animal. Pitonto a tawen a mangmanganka iti ruot a kas iti baka ken maturog iti ruar a malinlinnaawan. Kalpasanna, annugotemto nga iturayan ti Dios a Kangatoan ti amin a pagarian ti tao ken mabalinna nga isaad nga ari ti siasinoman a pilienna.

²⁶Naibilin a mabati ti pungdol iti daga. Kayatna a sawen a maisaadkanto met la nga ari inton bigbigem a ti Dios ti agturay iti sangalubongan.

²⁷Ipangagmo ngarud, Natan-ok nga Ari, daytoy balakadko: Isardengmon ti panagbasolmo, agaramidka iti naimbag, ket kaasiam dagiti napanglaw tapno manayonto ti kinarang-aymo.”

²⁸Napasamak amin dagitoy ken ni Ari Nebucadnesar.

²⁹Limmabas ti maysa a tawen. Iti naminsan, magmagna iti atep ti palasiona idiay Babilonia.

³⁰Kinunana, “Anian a nagpintas ti Babilonia! Binangonko a kabeserak a pakakitaan iti pannakabalin ken bilegko, iti dayag ken kinatan-okko.”

³¹Agsasao pay laeng ti ari idi adda timek a naggapu sadi langit. Kinunana, “Ari Nebucadnesar, naikkaten kenka ti saadmo a kas ari.

³²Mapagtalawkanto iti arpad dagiti tattao. Pitonto a tawen a makipagnaedka kadagiti atap nga animal ket mangankanto iti ruot a kas iti baka. Kalpasanna, annugotemto nga iturayan ti Kangatoan a Dios ti amin a pagarian dagiti tattao ket mabalinna nga ited dagitoy a pagarian iti siasinoman a pilienna.”

³³Iti dayta met la a kanito, napasamak daytoy ken ni Nebucadnesar. Napagtalaw iti arpad dagiti tattao ket nangan iti ruot a kas iti baka. Nalinlinnaawan. Immatiddog dagiti buokna a kasla iti dutdot ti agila, ket immatiddog ti kukona a kas iti kuko ti tumatayab.

³⁴Kinuna ti ari, “Kalpasan ti pito a tawen, timmangadak sadi langit ket nagsubli ti sigud a panunotko. Indaydayawko ti Kangatoan a Dios ket impaayko ti dayaw ken dayag iti agnanayon a sibibiag. Kinunak, “Agturay iti agnanayon, agpautto ti pagarianna iti amin a tiempo.

³⁵Ibilangna dagiti tattao ti daga a kasla awan serserbida; iturayanna dagiti angheles sadi langit ken dagiti tattao ditoy daga. Awan ti sumupring iti pagayatanna, wenno mangbabalaw iti aramidna.

³⁶“Idi nagsubli ti sigud a panunotko, naisubli kaniak ti dayag ti pagariak, ti dayawko ken ti kinatan-okko. Siraragsak dagiti ofisialesko ken dagiti natan-ok a tattaok a nangawat kaniak. Naisubli manen ti turayko a kas ari, ket ad-adda ti pannakabalinko ngem idi.

³⁷“Ita, siak a Nebucadnesar, idayaw ken itan-okko ti Ari ti langit. Umno ken nainkalintegan amin nga aramidna ket mabalinna nga ipababa ti siasinoman a napalangguad.”