Read Iloko Daniel 5 Bible Online

Daniel 5 - Iloko bible

Daniel 5

¹Iti maysa a rabii, inawis ni Ari Belsazar ti sangaribu nga ofisialesna a dumar-ay iti dakkel a padaya, ket nagiinumda iti arak.

²Idi agiinumda, pinaala ni Belsazar dagiti alikamen a balitok ken pirak a sinamsam ni tatangna a Nebucadnesar iti Templo idiay Jerusalem. Pinaalana ida tapno paginumanda kadagiti ofisialesna, dagiti assawa ken kamalalana.

³Dagus a naipan dagiti alikamen a balitok ken pirak, ket naginumanda,

⁴bayat ti panagdaydayawda kadagiti didiosen a naaramid iti balitok, pirak, bronse, landok, kayo ken bato.

⁵Pagammoan, nagparang ti ima ti maysa a tao ket nagsurat iti napalitadaan a diding ti palasio, iti lugar a maraniagan unay ti silaw. Nakita ti ari ti ima nga agsursurat.

⁶Bimsag gapu iti kasta unay a butengna, ket uray la nagkutokot dagiti tumengna.

⁷Iti napigsa a timek, pinaayabanna dagiti salamangkero, dagiti mammadles ken dagiti astrologo. Idi dumtengda, kinuna ti ari kadakuada, “Ikkak iti pammadayaw ti siasinoman a makabasa iti naisurat ken makailawlawag iti kayatna a sawen. Makawesanto iti napateg a lupot a nalabaga, maukkoranto iti kuentas a balitok ken maisaadto a maikatlo a kangatoan nga agturay iti pagarian.”

⁸Immasideg dagiti mammagbaga iti ari ngem awan makabasa iti naisurat wenno makaibaga iti ari iti kaipapananna.

⁹Gapu iti daytoy, immad-adda manen ti bessag ken danag ni Ari Belsazar. Saan nga ammo dagiti ofisialesna ti aramidenda.

¹⁰Nangngeg ti reyna nga ina ni Belsazar ti panagsasarita ti ari ken dagiti ofisialesna, ket simrek iti kuarto a pagrarambakanda. Kinunana, “Manayon koma ti panagbiag ti ari! Dika koma agdanag ken bumsag.

¹¹Adda lalaki ditoy pagariam a naparaburan iti espiritu dagiti nasantoan a didiosen. Idi ni tatangmo ti ari, impakita daytoy a tao a naparaburan iti nasayaat a pannakaawat, pannakaammo ken sirib a kas iti sirib dagiti didiosen. Daytoy ti gapuna a dinutokan idi ni Ari Nebucadnesar a tatangmo a mangipangulo kadagiti mammadles, salamangkero, mammuyon ken astrologo.

¹²Adda naisangsangayan a kabaelanna ket masirib. Nalaing a mangibaga iti kaipapanan ti tagtagainep, mangipalawag kadagiti burburtia ken mangilawlawag kadagiti palimed. Paayabam ngarud daytoy a tao, ni Daniel (a pinanaganan ti ari iti Beltesazar) ket paipalawagmo kenkuana ti kaipapan amin dagitoy.”

¹³Dagus a naidatag ni Daniel iti sangoanan ti ari. Kinuna ti ari, “Sika kadi ni Daniel a maysa kadagiti Judio a napagtalaw nga innala ni amak idiay Juda?

¹⁴Nadamagko nga adda kenka ti espiritu dagiti didiosen ket nalaingka, addaanka iti pannakaawat ken sirib.

¹⁵Naayaban dagiti mammagbaga ken salamangkero tapno basaen ken ibagada ti kayat a sawen ti naisurat ngem dida naibaga ti kaipapananna.

¹⁶Ita adda agkuna a kabaelam nga ibaga dagiti nailemmeng a kaipapanan ken ammom nga ilawlawag dagiti palimed. No mabasam ti naisurat ket ibagam kaniak ti kaipapananna, ikkanka iti pammadayaw. Makawesankanto iti napateg a lupot a nalabaga, makuentasankanto iti balitok ken maisaadkanto a maikatlo a kangatoan iti turay iti pagarian.”

¹⁷Insungbat ni Daniel iti ari, “Saandak nga ikkan iti sagut, Natan-ok nga Ari, wenno itedmo laengen iti sabali ti gunggona nga itedmo. Basaek ti naisurat ket ilawlawagko kenka ti kaipapananna.

¹⁸“Pinagbalin ti Kangatoan a Dios ni tatangmo a Nebucadnesar a naindaklan nga ari. Inikkanna iti tan-ok ken dayag.

¹⁹Gapu iti nagpaiduma a pannakabalinna, nagbuteng ken nagtigerger iti sangoananna dagiti amin a tattao ti nadumaduma a puli ken pagsasao. Pinapatayna dagiti kayatna a mapapatay ket inispalna dagiti kayatna a maispal. Intan-okna dagiti kayatna nga itan-ok ket impababana dagiti kayatna nga ipababa.

²⁰Ngem gapu ta nagbalin a natangsit, napalangguad ken naranggas, naikkat a kas ari ket napukawna ti nadayag a saadna.

²¹Napagtalaw iti gimong dagiti tattao. Nagbalin ti panunotna a kas iti panunot ti animal. Nakipagtaeng kadagiti atap nga asno. Nangan iti ruot a kas iti baka. Naturog iti ruar ket nalinlinnaawan. Kamaudianna, binigbigna nga iturayan ti Kangatoan a Dios ti amin a pagarian dagiti tattao, ket isaadna nga ari ti siasinoman a pilienna.

²²“Ngem sika nga anakna, dika nagpakumbaba nupay ammom amin dagitoy.

²³Nagaramidka iti maibusor iti Apo ti langit ket innalam dagiti tasa ken malukong iti Templona. Inusarmo ida a naginumam iti arak a kaduam dagiti ofisialesmo, dagiti assawam ken dagiti kamalalam. Nagdaydayawkayo kadagiti didiosen a naaramid iti balitok, pirak, bronse, landok, kayo ken bato, didiosen a di makakita wenno makangngeg ken awan ammona. Ngem dimo pinadayawan ti Dios a mangtengtengngel iti biagmo ken iti amin nga aramidmo.

²⁴Daytoy ti gapuna nga imbaon ti Dios ti ima a nangisurat kadagitoy a sao.

²⁵“Dagitoy ti naisurat: ‘Mene, mene, tekel, parsin.’

²⁶Ket kastoy ti kaipapananna: mene, nabilangen ti Dios dagiti aldaw a panagpaut ti pagariam ket inkeddengnan a gibusan.

²⁷Tekel, natimbangkan ket nasarakan a kurang ti dagsenmo.

²⁸Parsin, nabingayen ti pagariam ket naited kadagiti taga-Medo ken taga-Persia.”

²⁹Imbilin a dagus ni Belsazar a maikkan ni Daniel iti pammadayaw. Nakawesan iti napateg a lupot a nalabaga, naukkoran iti kuentas a balitok ket naisaad a maikatlo a kangatoan iti turay iti pagarian.

³⁰Iti dayta met la a rabii, napapatay ni Belsazar nga ari ti Babilonia.

³¹Inagaw ni Dario a taga-Media ti pagarian. (Agtawen idi ni Dario iti 62.)