Read Iloko Daniel 6 Bible Online

Daniel 6 - Iloko bible

Daniel 6

¹Nangdutok ni Dario iti 120 a gobernador iti entero a pagarian.

²Saan la a dayta. Pinilina ni Daniel ken dua a kaduana a mangipangulo kadagiti gobernador ken mangkita iti pagsayaatan ti ari.

³Iti saan a nabayag, impakita ni Daniel a nasaysayaat ti trabahona ngem dagiti dadduma a mangipangulo ken dagiti gobernador. Agsipud ta naisangsangayan ti kabaelanna, pinanggep ti ari nga isaad ni Daniel a mangimaton iti entero a pagarian.

⁴Nagbirbirok dagiti dadduma a pangulo ken dagiti gobernador iti pangbabalawanda ken ni Daniel iti panangimatonna iti pagarian. Ngem awan ti nasarakanda a biddut wenno pakapilawanna, agsipud ta mapagtalkan ket awan ti dakes wenno nakillo nga aramidna.

⁵Kinunada iti tunggal maysa, “Awan ti pambarantayo a mangidarum ken ni Daniel malaksid ti maipapan iti relihionna.”

⁶Iti kasta, dimmatagda iti ari ket kinunada, “Ari Dario, manayon koma ti panagbiagmo!

⁷Nagnunummoanmi amin a papangulo iti pagarian, dagiti mangimaton, dagiti gobernador, dagiti agtuturay ken dagiti dadduma nga ofisiales a dawatenmi kenka, O Ari, a mangipaulogka iti bilin nga inkapilitan ti pannakatungpalna. Ibilinmo nga iti las-ud ti tallopulo nga aldaw manipud ita, awan ti mapalubosan nga agkararag iti uray ania a didiosen wenno tao malaksid kenka, Natan-ok nga Ari. Madusa ti mangsalungasing iti daytoy a bilin, ket maitappuak iti rukib a napno iti leon.

⁸Ita ngarud, O Ari, ipaulogmo koma ti bilin ket firmaam tapno saan a mabalin a baliwan a kas iti linteg dagiti taga-Media ken taga-Persia.”

⁹Finirmaan ngarud ni Ari Dario ti bilin.

¹⁰Nagawid ni Daniel idi madamagna a nafirmaanen ti bilin. Iti akingngato a kadsaaran ti balayna, adda kuarto a tallo ti tawana a sumango iti Jerusalem. Kas iti masansan nga ar-aramidenna, nagparintumeng iti sangoanan dagiti nakalukat a tawa ket nagkararag iti Dios iti mamitlo iti maysa nga aldaw.

¹¹Nagur-uray dagiti kabusor ni Daniel iti gundawayda a mangtiliw kenkuana. Idi natiliwanda nga agkarkararag iti Diosna,

¹²nagkukuyogda a napan iti ari ket indarumda ni Daniel. Kinunada, “Natan-ok nga Ari, adda finirmaam a bilin nga iti uneg ti tallopulo nga aldaw, siasinoman nga agkararag iti uray ania a didiosen wenno tao malaksid kenka, maitappuak iti rukib a napno iti leon.” “Wen,” insungbat ti ari. “Masapul a maannurot ti bilin ta saan a mabaliwan ti linteg dagiti Medos ken Persiano.”

¹³Kinunada iti ari, “Ni Daniel a maysa kadagiti napagtalaw a kas balud idiay Juda, saannaka a raemen a kas ari ket dina tungpalen ti impaulogmo nga bilin. Mamitlo nga agkararag iti maysa nga aldaw.”

¹⁴Napalalo ti pannakariribuk ti ari idi mangngegna ti imbagada. Nagbirok iti pamuspusan a mangispal ken ni Daniel. Nagmalmalem a nagpampanunot no ania ti aramidenna.

¹⁵Ngem dimmatag manen dagiti lallaki iti ari ket kinunada kenkuana, “Pagaammom, O Ari, nga awan ti linteg nga ipaulog ti ari a mabalbaliwan kas mayannurot iti linteg dagiti Medos ken Persiano.”

¹⁶Nagbilin ngarud ti ari a maala ni Daniel ket maitappuak iti rukib dagiti leon. Sakbay a maitappuak ni Daniel, kinuna ti ari kenkuana, “Isalakannaka koma ti Diosmo a pagserserbiam a sipupudno.”

¹⁷Nangalada iti bato ket inserrada iti ngarab ti rukib. Tapno awan ti makaisalakan ken ni Daniel, tinimbrean ti ari iti bukodna a selio, kasta met iti selio dagiti papangulo.

¹⁸Nagawid ti ari iti palasiona. Nagpatpatnag a saan a nakaturog. Saan a nangan ket awan ti naipan iti kuartona a nanglinglingay kenkuana.

¹⁹Iti parbangon, bimmangon ti ari ket nagdardaras a napan iti rukib.

²⁰Idi makaasideg sadiay, sidadanag nga inawaganna ni Daniel, “Daniel nga adipen ti Dios a sibibiag, naisalakannaka kadi kadagiti leon ti Dios a pagserserbiam a sipupudno?”

²¹Insungbat ni Daniel, “Natan-ok nga Ari, manayon koma ti panagbiagmo!

²²Imbaon ti Dios ti anghelna ket pinagkaemna ti ngiwat dagiti leon tapno saandak a dangran. Inaramidna daytoy agsipud ta ammona nga awan basolko kenka, O Natan-ok nga Ari!”

²³Kasta unay ti ragsak ti ari. Imbilinna a mairuar ni Daniel iti rukib. Idi nayaonda ni Daniel, nakitada nga awan a pulos ti dunorna agsipud ta nagtalek iti Dios.

²⁴Kalpasanna, pinatiliw ti ari dagiti amin a lallaki a nangidarum ken ni Daniel ket pinaitappuakna ida iti rukib dagiti leon, agraman dagiti annak ken assawada. Dida pay nagdisso iti rukib, sinikbaben dagiti leon ida. Narumrumek dagiti tulangda.

²⁵Nagsurat ni Ari Dario kadagiti tattao ti nadumaduma a puli ken pagsasao iti entero a daga. Kinunana: “Napateg a kailiak.

²⁶Ibilinko nga iti entero a masakupan ti pagariak, masapul nga agbuteng ken agraem dagiti tattao iti Dios ni Daniel. “Isu ti sibibiag a Dios, ket agturay iti agnanayon. Pulos a dinto madadael ti pagarianna, ket dinto met agpatingga ti pannakabalinna.

²⁷Mangisalakan ken mangispal; agiparang kadagiti nakaskasdaaw ken milagro sadi langit ken ditoy daga. Insalakanna ni Daniel iti panangpatay dagiti leon.”

²⁸Rimmang-ay ni Daniel idi tiempo ti panagturay ni Dario ken iti tiempo ni Ciro a Persiano.