Read Iloko Daniel 8 Bible Online

Daniel 8 - Iloko bible

Daniel 8

¹Iti maikatlo a tawen a panagturay ni Ari Belsazar, adda manen parmatak a kaasping iti immuna.

²Iti parmata, pagammoan la ta nadlawko nga addaak iti nabakudan a siudad ti Susa, iti probinsia ti Elam. Agtaktakderak iti igid ti Karayan Ulai,

³ket nakitak sadiay ti maysa a kalakian a karnero. Adda dua a dadakkel a sarana ngem at-atiddog ti sara a naudi a timmubo.

⁴Binuybuyak ti kalakian a karnero nga agwangwang-it a nakasango iti laud, amianan ken abagatan. Awan ti animal a makaparmek kenkuana wenno makalisi iti pannakabalinna. Inaramidna ti kinaykayatna ket timmangsit.

⁵Idi ut-utobek ti kaipapanan daytoy, pagammoan la ta rimmuar ti maysa a bulog a kalding a naggapu iti laud. Kasta unay ti pardas ti tarayna ket saan a nagdisso dagiti sakana iti daga. Nakaddidillaw ti sarana iti nagbaetan dagiti matana.

⁶Nagturong ti kalding iti karnero nga adda dua a sarana a nakitak iti igid ti karayan sana sinangdo a sirurungsot.

⁷Binuyak ti panangdarupna iti karnero. Kasta unay ti pungtotna a simmangdo ket natukkol dagiti dua a sara ti karnero. Awan ti pigsa ti karnero a makiranget. Natulid ken nabaddebaddekan ket awan ti nakaikaluya kenkuana.

⁸Timmangsit a timmangsit ti kalding, ngem idi kapigsa ti pannakabalinna, natukkol ti sarana. Iti nakaikkatanna, nagtubo ti uppat a dadakkel a sara. Aggigiddiat ti turong ti tunggal sara.

⁹Adda bassit a sara a nagtubo iti maysa kadagitoy uppat a sara. Dimmanon ti pannakabalinna iti abagatan, iti daya ken iti Naikari a Daga.

¹⁰Bimmileg iti kasta unay ket dinarupna ti armada ti langit, dagiti mismo a bituen. Impurruakna ditoy daga ti sumagmamano kadakuada sana binaddebaddek ida.

¹¹Kinaritna pay ti ari ti armada ti langit. Pinasardengna ti pannakaidatag ti inaldaw a daton nga agpaay iti ari. Tinulawanna ti Templo.

¹²Nagbasol sadiay dagiti tattao imbes nga agidatagda kadagiti tumutop nga inaldaw a sakrifisio ket nailupitlupit ti kinapudno. Nagballigi ti sara iti amin nga inaramidna.

¹³Kalpasanna, nangngegko ti maysa nga anghel a nagsaludsod iti sabali nga anghel, “Kasano ti kabayag dagiti napasamak iti parmata? Kasano ti kabayag ti makarimon a basol a suno dagiti inaldaw a daton, ken ti pannakaibaddebaddek ti Templo ken ti armada ti langit?”

¹⁴Nangngegko ti sungbat ti sabali nga anghel, “Agpaut iti 1,150 nga aldaw. Kabayatan dayta a tiempo, awan ti maidatag a daton iti bigat ken malem. Kalpasanna, agsublinton ti sigud a kasasaad ti Templo.”

¹⁵Idi ut-utobek ti kayat a sawen ti parmata, kellaat nga adda nakitak a kasla tao a nakatakder iti sangoanak.

¹⁶Nangngegko ti pukkaw ti maysa a tao iti ballasiw ti Karayan Ulai. Kinunana, “Gabriel, ilawlawagmo iti daytoy a tao ti kaipapanan ti parmata a nakitana.”

¹⁷Immay nagtakder ni Gabriel iti abayko. Napalalo ti butengko ket napasagak. Kinunana kaniak, “Anak ti tao, awatem ti kayatna a sawen. Adda kaipapanan ti parmata kadagiti mapasamak iti panungpalan.”

¹⁸Idi makisasao kaniak, napukawko ti puotko ket natuangak. Ngem iniggamannak sanak pinatakder,

¹⁹ket kinunana, “Ipakaammok kenka ti pagbanaganto ti pungtot ti Dios. Iladawan ti parmata ti tiempo ti panungpalan.

²⁰“Ti nakitam a kalakian a karnero a dua ti sarana, iladawanna dagiti pagarian ti Media ken Persia.

²¹Ti bulog a kalding isu ti pagarian ti Grecia ket ti dakkel a sara iti nagbaetan dagiti matana isu ti umuna nga ari.

²²Dagiti uppat a sara a nagtubo iti nakabungtolan ti umuna a sara isuda dagiti uppat a pagarian a pakabingbingayan dayta a nasion, ngem saandanto a nabileg a kas iti umuna a pagarian.

²³“Inton umadani ti panungpalan dagita a pagarian, ket kasta unayen ti kinadakesda a masapul a madusada, addanto tumaud nga ari a nasukir, nauyong ken manangallilaw.

²⁴Bumilegto, ngem saan a babaen iti bukodna a pannakabalin. Nakaronto ti panagdadaelna ket agballiginto iti amin nga aramidna. Parmekennanto dagiti mamaingel a tattao agraman dagiti tattao ti Dios.

²⁵Gapu ta nasikap, agballiginto kadagiti makaallilaw nga aramidna. Pagpannakkelnanto ti bagina ket papatayennanto ti adu a tao a dida mapakpakadaan. Sukirennanto pay ti Katan-okan nga Ari, ngem madadaelto. Saanto a bileg ti tao ti mangdadael kenkuana.

²⁶Matungpalto ti nailawlawag kenka a parmata maipapan iti panagidaton iti bigat ken rabii. Ngem ilimedmo ti parmata gapu ta mabayag pay ti pannakatungpalna.”

²⁷Kimmapsutak ket nagsakitak iti sumagmamano nga aldaw. Kalpasanna, bimmangonak ket intuloyko ti trabaho nga inted ti ari kaniak, ngem mailablabegak iti parmata a diak maawatan.