Read Iloko Hosea 1 Bible Online

Hosea 1 - Iloko bible

Hosea 1

¹Daytoy ti mensahe nga impakaammo ni Yahweh ken ni Oseas nga anak ni Beeri. Panawen idi da Ozias, Jotan, Ahaz, Hezekias nga ar-ari iti Juda; ni Jeroboam nga anak ni Joas ti ari idi iti Israel.

²Idi damo nga agsao ni Yahweh iti Israel babaen ken ni Oseas, kinunana, “Mangasawaka; liputannakanto ti asawam ket awanto ti duma kenkuana dagiti annakyo.”

³Nangasawa ngarud ni Oseas ket inkallaysana ti maysa a babai nga agnagan Gomer nga anak ni Diblaim. Nagsikog ni Gomer. Naganak iti lalaki, ket kinuna ni Yahweh ken ni Oseas,

⁴“Panaganam iti ‘Jezreel,’ agsipud ta iti saan a mabayag, dusaek ti ari ti Israel gapu kadagiti pammapatay nga inaramid ni Jehu a kapuonanna idiay Jezreel. Gibusak ti dinastia ni Jehu ket

⁵parmekekto ti bileg ti armada ti Israel idiay Tanap ti Jezreel iti dayta nga aldaw.”

⁶Nagsikog manen ni Gomer ket babai ti impasngayna. Kinuna ni Yahweh ken ni Oseas, “Lo-ruhama ti ipanaganmo kenkuana, ta saankon nga ay-ayaten dagiti tattao ti Israel wenno pakawanen ida.

⁷Ngem ay-ayatekto dagiti tattao ti Juda. Siak, ni Yahweh a Diosda, isalakankonto ida. Ngem diak aramiden daytoy babaen iti gubat—dagiti kampilan, bai wenno babaen kadagiti kabalio wenno nagkabalio a mannakigubat.”

⁸Kalpasan ti pannakapusot ni Lo-ruhama, nagsikog manen ni Gomer, ket naaddaan manen iti anak a lalaki.

⁹Kinuna ni Yahweh ken ni Oseas, “Lo-ammi ti ipanaganmo kenkuana, gapu ta saanko a tattao dagiti tattao ti Israel ket saan met a siak ti Diosda.”

¹⁰Umadunto dagiti Israelita. Kasdanto iti darat ti taaw a saan a marukod wenno mabilang ti kaaduda. Kuna ti Dios kadakuada, “Saan a dakayo dagiti tattaok,” ngem umayen ti aldaw a kunana kadakuada, “Dakayo ti annak ti sibibiag a Dios!”

¹¹Agkaykaysanto manen dagiti tattao ti Juda ken dagiti tattao ti Israel. Mangdutokdanto iti maymaysa a mangipangulo kadakuada, ket rumang-aydanto manen iti dagada. Wen, naindaklanto nga aldaw ti aldaw ti Jezreel!