Read Iloko Hosea 11 Bible Online

Hosea 11 - Iloko bible

Hosea 11

¹Kuna ti Apo, “Inayatko ti Israel idi ubing pay. Inayabak ti anakko manipud Egipto.

²No tunggal ayabak ida, umadayoda kaniak. Nagidatagda kadagiti daton. Datonda kadagiti didiosen a Baal. Nagpupuorda iti insenso para kadagiti imahen.

³Siak ti nangisuro iti Israel a magna; inub-ubbak dagiti tattaok kadagiti takkiagko. Ngem dida bigbigen a siak ti nangtaripato kadakuada.

⁴Indalanko ida babaen iti panangipateg ken panagayat. Inubbak ida nga inyasideg iti pingpingko. Nagrukobak a mangpakan kadakuada.

⁵“Dida kayat ti agsubli kaniak, isu a masapul nga agsublida iti Egipto ket iturayanto ida ti Asiria.

⁶Addanto gubat nga agdakiwas kadagiti siudadda, ket marpuogto dagiti sarikedkedda. Madadaelto dagiti tattaok gapu ta sinurotda ti ammoda a nasayaat.

⁷Ipapilitda ti panangtallikudda kaniak. Umasugdanto gapu iti sangol nga awitda, ngem awanto ti makaisalakan kadakuada.

⁸“Israel, kasano nga isinaka? Kasano a baybay-anka? Kasano a dadaelenka a kas iti Adma? Kasano a pagbalinenka a kas iti Zeboim? Diak maaramid daytoy, ta timmaud ti panangngaasik.

⁹Dikanto dusaen gapu iti pungtotko. Diakton dadaelen ti Israel. Diosak ngamin, ket saanak a tao. Siak ti Nasantoan nga adda kadakayo. Saanak nga umay a sipupungtot kadakayo.

¹⁰“Surotendakto dagiti tattaok inton ngerngerak a kas iti leon dagiti kabusorda. Agdardarasto nga umay kaniak dagiti tattaok manipud laud.

¹¹Manipud Egipto, kasdanto la tumatayab nga agpigpigerger nga umay. Manipud Asiria, kasdanto la kalapati a sumangpet. Agnaeddanto manen kadagiti balbalayda. Siak, ni Yahweh, ti nangibaga iti daytoy.”

¹²Kuna ti Apo, “Linawlawnak ti Israel iti kinaulbod ken kinamanangallilaw. Suksukirendak pay laeng dagiti tattao ti Juda, siak a Dios a napudno ken nasantoan.