Read Iloko Hosea 2 Bible Online

Hosea 2 - Iloko bible

Hosea 2

¹Awaganyo ngarud dagiti padayo nga Israelita iti “Tattao ti Dios” ken “Ay-ayaten ti Apo.”

²Annakko, kasaoyo ni inayo— uray no ibilangkon a saanko nga asawa ket saan metten a siak ti asawana. Agpakpakaasikayo kenkuana nga isardengnan ti pannakikamkamalalana ken panagbalbalangkantisna.

³No dina isardeng ti aramidna, labusak ket bay-ak a lamolamo a kas iti daydi nga aldaw a pannakaipasngayna, a kas iti aldaw a pannakayanakna. Pagbalinek a natikag a daga nga awan ti agtubo a mula, ket matayto iti waw.

⁴Diak kaasian dagiti annakna; balangkantis nga awan babainna ti inada. Mismo nga isu ti nagkuna, “Surotek dagiti kaayan-ayatko, isuda a mangted kaniak iti inumen ken taraonko, pagan-anay a de lana ken linen, lana ken arak.”

⁶Daytoy ti gapuna nga aladak iti siitsiitan, bakudak ti pagnaanna tapno isardengnan dagiti aramidna.

⁷Surotennanto dagiti kaayan-ayatna, dinanto makamakam ida. Birokennanto ida ngem awanto ti masarakanna kadakuada. Kalpasanna, kunananto, “Agsubliak ken ni asawak, ta nasaysayaat ti kasasaadko idi iti dennana ngem ita.”

⁸Pulos a dina bigbigen a siak ti mangmangted idi kenkuana iti trigo, arak, ti lana ken amin a balitok ken pirak nga inusarna iti panagdaydayawna ken ni Baal a didios.

⁹Daytoy ti gapuna nga iti tiempo ti panagapit, alaekto met laeng ti trigo ken ti arakko. Alaekto met laeng ti intedko a pagan-anayna a de lana ken linen.

¹⁰Iti sango dagiti kaayan-ayatna ikkatek amin a kawesna agingga a lamolamo ket awanto ti makaisalakan kenkuana iti pannakabalinko.

¹¹Gibusakon dagiti parambakna— fiestana iti lutuad, dagiti Aldaw a Panaginana a ngilinenna, ken amin a nangayed a gimongna.

¹²Dadaelekto dagiti kaubasan ken kaigosanna a kinunana nga inted dagiti kaayan-ayatna, kas tangdanna iti panagserbina kadakuada. Pagbalinek a kabakiran dagiti kaubasan ken minuyoganna; dadaelento ida dagiti atap nga ayup.

¹³Wen, dusaekto tapno ikarona dagidi tiempo a nalipatannak, idi nagpuor iti insenso kas datonna ken ni didiosen a Baal, idi agar-aritos ken agkukuentas a nangsurot kadagiti kaayan-ayatna. Siak, ni Yahweh, ti nangibaga iti daytoy.

¹⁴Isut' gapuna nga ipankonto manen iti let-ang. Magun-odkonto manen ti panagayatna babaen kadagiti makaay-ayo a sarita.

¹⁵Isublikto kenkuana dagiti kaubasanna, ket pagbalinekto ti Tanap ti Akor a ruangan ti namnama. Sungbatannakto sadiay a kas idi agtutubo pay laeng, idi rimmuar idiay Egipto.

¹⁶Iti dayta nga aldaw, “Asawak,” kunananto kaniak. Dinakton awagan iti “Baalko.”

¹⁷Dinanton baliksen wenno mangngegan, ti nagan dagiti Baal.

¹⁸Iti dayta a tiempo, makitulagakto kadagiti amin nga atap nga ayup ken tumatayab tapno dida an-anoen dagiti tattaok. Ikkatekto amin nga armas a pakigubat iti daga, amin a kampilan ken bai tapno agbiag a natalna ken natalged dagiti tattaok.

¹⁹Israel, pagbalinenkanto nga asawak; Napudnoakto ket dikanto baybay-an; Ipakitakto kenka ti di agbalbaliw nga ayat ken panangngaasi ket agnanayonto a kukuaka.

²⁰Tungpalekto ti karik ta kukuaka ket bigbigennakto a kas Apo.

²¹Iti dayta a tiempo, ipangagkonto dagiti kararag dagiti Israelita. Pagtudoekto ket agtubonto ti adu a trigo, ubas, ken olibo.

²³Ipasdekkonto dagiti tattaok iti pagilian ket parang-ayekto ida. Ipakitakto ti panagayatko kadagiti makunkuna a “Saan a Maay-ayat” ken kadagiti makunkuna a “Dakayo ti tattaok.” Kunakto, “Dakayo dagiti tattaok,” ket isungbatdanto, “Sika ti Diosmi.”