Read Iloko Hosea 4 Bible Online

Hosea 4 - Iloko bible

Hosea 4

¹Adda pammabasol ti Apo kadagiti agnaed iti daga. Israel, dumngegka iti ibagana: “Awan kinapudno wenno panagiinnayat iti daytoy a pagilian ket saandak a bigbigen dagiti tattao a kas Dios.

²Sapataan dagiti tattao ti karida ngem salungasingenda met laeng. Agulbod, agpapatay, agtakaw ken makikamalalada. Umadu ti krimen ket agsasaruno ti pammapatay!

³Daytoy ti gapuna nga agladingit ti daga. Matay amin a sibibiag, amin nga animal ken tumatayab agraman dagiti ikan.”

⁴Kuna ti Apo, “Saan a dagiti tattao ti babalawek no di ket dakayo a padi.

⁵Ti trabahoyo iti aldaw awan serserbina; mairaman met ti profeta nga awan mamaay ti aramidna. Ngarud, dadaelek ti Israel nga inayo.

⁶Gapu ta awan ammoda, madadael dagiti tattaok. Gapu ta linaksidyo ti pannakaammo, ken ti pannursuro ti Dios nalipatanyo, laksidenkayto met agraman dagiti annakyo a kas papadik.

⁷“Umadu dagiti papadi, ngem umadu met ti basolda kaniak; pagbalinek a pakaibabainan ti kinadayagyo.

⁸Bumaknangkayo gapu iti basol dagiti tattaok, ket kayatyo nga umadu pay dagiti basbasolda.

⁹Sagabaenyonto ti isu met la a dusa a sagabaen dagiti tattao!

¹⁰Kanenyonto ti binglayyo kadagiti maidatag a sakrifisio ngem mabisinkayto pay laeng. Agdaydayawkayo kadagiti didiosen ngem dikayto maaddaan iti anak gapu ta tinallikudandak tapno surotenyo dagiti didiosen.”

¹¹Kuna ti Apo, “Gapu iti baro ken daan nga arak, mapukaw ti pannakaawat dagiti tattaok.

¹²Makiumanda iti imahen ta kayatda nga adda maipaltiing kadakuada. Maibaga aya ti sangaputol a kayo ti tarigagayanda a maammoan? Tinallikudandak. Kas iti babai nga agbalin a balangkantis, intedda ti bagida kadagiti sabali a dios.

¹³Kadagiti sagrado a lugar iti tapaw dagiti bantay, agidatagda iti daton a mapuoran ket kadagiti turod, agpuorda iti insenso, gapu ta nasayaat ti linongda. “Ngarud, agserbi dagiti annakyo a babbai a kas balangkantis ket makikamalala dagiti babbai a manugangyo.

¹⁴Ngem diakto dusaen ida gapu ta uray dakayo, kaiddayo dagiti balangkantis iti templo ken kaduayo ida nga agidatag kadagiti sakrifisio. Kas iti pagsasao, ‘Agtungpal iti pannakadadael dagiti tattao nga awanan pannakaawat.’

¹⁵“Israel, uray no saanka a napudno kaniak, saan a mairaman ti Juda iti basolmo. Dika mapan agdaydayaw idiay Gilgal wenno idiay Bethaven. Dika met agkari sadiay iti nagan ni Yahweh a sibibiag.

¹⁶Nasukir dagiti Israelita a kasla kadagiti urbon ti baka a nasubeg. Kasano a taraonak ida a kas kadagiti karnero iti pagaraban?

¹⁷Adda dagiti tattao ti Israel iti pannakabalin dagiti didiosen. Bay-am a surotenda ti kaykayatda.

¹⁸Kalpasan ti panaginumda iti adu nga arak, pagragsakanda iti panagbalangkantisda. Kaykayatda ti maibabain ngem ti maidaydayaw.

¹⁹Maipanawdanto a kas man angin ti mangitayab kadakuada ket ibaindanto dagiti sakrifisioda.