Read Iloko Hosea 5 Bible Online

Hosea 5 - Iloko bible

Hosea 5

¹“Denggenyo daytoy, dakayo a papadi! Dumngegkayo, dakayo nga Israelita! Dumngegkayo a nalaing, dakayo a kameng ti familia ti ari! Dakayo ti mangukom a mangyetnag koma iti hustisia ngem dakayo met laeng ti pagdissuoran ti dusa! Naipakatkayo a palab-og idiay Mizpa, maysa a silo idiay Bantay Tabor,

²nagsukirkayo ket nailumlomkayo iti basol, ngem dusaenkayo amin.

³Sigud nga am-ammok ti Israel—dinak mabalin nga ilemmengan. Saan a napudno kaniak ket saan a maikari nga agdaydayaw kaniak dagiti tattaona.”

⁴Gapu iti dakes nga inaramid dagiti tattao, saanda a makasubli iti Dios. Saanda a maikkat ti panagdaydayawda kadagiti didiosen ket dida bigbigen ni Yahweh.

⁵Natangsit dagiti tattao ti Israel ket daytoyto ti pakadusaanda. Matnagdanto gapu kadagiti basolda ket kaduadanto a matnag ti Juda.

⁶Alaenda dagiti baka ken karneroda a puoran a kas sakrifisio ken ni Yahweh ngem awan serserbina. Saanda a mabirokan ni Yahweh ta pinanawanna ida.

⁷Saanda a napudno kenkuana; saanna a kukua dagiti annakda. Ngarud, madadaeldanto, kasta met dagiti dagada.

⁸Puyotenyo ti tangguyob idiay Gabaa! Pagunienyo ti trumpeta idiay Rama! Ipukkawyo ti ikkis ti gubat idiay Bethaven! Inkayo makigubat, dakayo a tattao ti Benjamin!

⁹Dumtengen ti aldaw ti pannakadusa ket mamimpinsanto a madadael ti Israel. Tattao ti Israel, awan dudua a mapasamak daytoy!

¹⁰Kuna ni Yahweh, “Makapungtotak gapu ta sinakup dagiti agtuturay ti Juda ti Israel, ket innalada ti sumagmamano a paset ti dagana. Ngarud, agdissuorto kadakuada ti pungtotko, kas iti maysa a layus.

¹¹“Agsagsagaba ti Israel gapu iti pannakaidadanesna; napukawna ti daga a kukuana iti imatang ti linteg. Ngamin, impapilitna ti napan nagpatulong kadagiti awan maitulongna kenkuana.

¹²Rebbaek ti Israel ket dadaelekto dagiti tattao iti Juda.

¹³Idi makita ti Israel ti sakitna, ken makita ti Juda dagiti sugatna, napan ti Israel idiay Asiria tapno agpatulong iti natan-ok nga emperador ngem dina ida maagasan wenno mapaimbag dagiti sugatda.

¹⁴Narungsotakto a kas iti leon a mangdarup kadagiti tattao ti Israel ken Juda. Panawakto ida kalpasan ti panangrangrangkayko kadakuada. Ulodekto a yadayo ida ket awanto ti makaispal kadakuada.

¹⁵“Panawakto dagiti tattaok agingga nga umdas ti panagsagabada gapu kadagiti basbasolda. Nalabit nga iti panagsagabada, ikagumaandakto a biroken.”