Read Iloko Hosea 7 Bible Online

Hosea 7 - Iloko bible

Hosea 7

¹“Tunggal panggepko nga agasan dagiti tattaok nga Israelita tapno rumang-ayda manen, awan sabali a maiparangarang kaniak no di ti kinadakesda ken ti saan a nasayaat nga aramidda. Agiinnulbodda; serkenda dagiti balbalay tapno agtakawda; kadagiti kalsada, agsaneb dagiti tulisan.

²Dida pampanunoten nga ammok ti amin a kinadakesda. Ngem, nalikmutda kadagiti dakes nga aramidda, ket awan duadua a makitak dagiti basolda.”

³Kuna ti Apo, “Babaen iti panangisikat dagiti tattao, allilawenda ti ari ken dagiti ofisialesna.

⁴Saanda a napudno ket manangliliputda. Umasimbuyok a kas iti apuy ti urno ti gurada; wen, kas iti apuy a rubroban ti panadero no naisaganan a maluto ti masa.

⁵Iti aldaw a nagkasangay ti ari, binartekda ti ari ken dagiti ofisialesna.

⁶Wen, immapuyda a kas iti urno idi nagisikatda. Nagpatpatnag nga immasimbuyok ti pungtotda agingga a gimmil-ayab iti kabigatanna.

⁷“Iti kapudot ti pungtotda, pinatayda dagiti panguloda. Nagsasaruno a napapatay dagiti arida, ngem awan nagkararag nga agpatulong kaniak.”

⁸Kuna ti Apo, “Arig dagiti tattao ti Israel iti kankanen a nakusel. Agpannurayda kadagiti pagilian iti lawlawda

⁹ket saanda a mabigbig a daytoy a panagtalek kadagiti ganggannaet ti nangibus iti pigsada. Aggibusen dagiti aldawda, ngem saanda pay nga ammo.

¹⁰Natangsit ti Israel. Saksinto daytoy a maibusor kenkuana. Uray no napasamak amin dagitoy, saanda a nagsubli kaniak, siak, ni Yahweh a Diosda.

¹¹“Kalapati ti kayarigan ti Israel. Maag ken saan a makaaw-awat. Pasaray umawag dagiti tattaona iti Egipto. No dadduma, agkamangda iti Asiria.

¹²Ngem uray sadino ti pagturonganda, isarruagkonto ti iketko a mangtiliw kadakuada. Dusaekto ida gapu iti kinadakes nga inaramidda.

¹³“Nakakaasinto ti pagbanaganda! Pinanawandak ket sinukirdak. Madidigradanto ta sinupringdak. Kayatko nga ispalen ida, ngem saanda a napudno iti panagdaydayawda kaniak.

¹⁴Dida ipapuso ti agkararag kaniak; agiikkisda ketdi a kasda la pagano tunggal agkararagda. No agdawatda iti trigo ken arak, sugatsugatenda ti bagbagida.

¹⁵Tinulongak ken pinapigsak ida. Ngem nagpanggepda iti maibusor kaniak.

¹⁶“Simmurotda kadagiti didiosen nga awan pannakabalinna. Saanda a mapagtalkan a kas iti saan a nairteng a bai ti pana. Mapapatayto iti kampilan dagiti papanguloda gapu kadagiti panagilunlunodda ket katawaanto ida dagiti Egipcio.”