Read Iloko Hosea 8 Bible Online

Hosea 8 - Iloko bible

Hosea 8

¹Kuna ti Apo, “Puyotenyo ti trumpeta! Adda dagiti kabusor a sumiplag iti dagak a kas kadagiti agila nga agam-ampayag. Winaswas ngamin dagiti tattaok ti tulagko, ket sinalungasingda ti pannursurok.

²Uray no bigbigendak a kas Diosda ken kunada a tattaok ida, ket ibagada nga am-ammodak,

³linaksidda met ti naimbag. Daytoy ti gapuna a sunsonento ida dagiti kabusorda.

⁴“Nagisaad dagiti tattaok kadagiti ari nga awan ti pammalubosko. Nangdutok kadagiti agtuturay, agtuturay a diak binendisionan, wenno inanamongan. Innalada dagiti pirak ken balitokda ket nagaramidda kadagiti imahen a puon ti pakadadaelanda.

⁵Kagurak ti balitok a sinan-baka a pagdaydayawan dagiti taga-siudad ti Samaria. Kasta unay ti pungtotko kadakuada. Kasano pay kabayag a gibusanda ti panagdaydayawda kadagiti imahen? Saan a Dios dayta a didiosen; aramid laeng ti tao. Maburburakto ti balitok a sinan-baka a pagdaydayawanda idiay Samaria.

⁷Angin ti imulada, ket alipugpogto ti apitenda! Nadadael dagiti mulada, awan ti bungada. Ngem uray no adda bungada, kanento dagiti ganggannaet.

⁸Nagbalin ti Israel a kas iti dadduma a pagilian ket awanen serserbina a kas iti nabuong a banga.

⁹Ngamin, nasubeg dagiti tattao ti Israel kas iti atap nga asno a mapan iti kaykayatna. Nagkamang iti Asiria ket nagbayad iti sumagmamano a pagilian tapno salaknibanda.

¹⁰Iti saan a mabayag, agtiritirda iti ut-ot inton idadanes ida ti emperador ti Asiria.

¹¹“Uray mangbangon dagiti tattao ti Israel iti adu nga altar a pangikkat iti basol, umadu met ti lugar a pagbasolanda!

¹²“Uray no isuratko dagiti adu a lintegko nga agpaay kadakuada, ibilangda dagitoy nga awan serserbina.

¹³Magustoanda ti agidatag iti sakrifisio, ket kanenda ti karne dagiti idatonda. Ngem siak, ni Yahweh, diak maragsakan kadakuada, ket ita malagipko ti basolda ket dusaek ida. Isublikto ida idiay Egipto.

¹⁴“Nagipatakder dagiti tattao ti Israel kadagiti palasio, ngem nalipatanda ti Namarsua kadakuada. Adu a nasarikedkedan a siudad ti binangon dagiti tattao ti Juda. Ngem mangyegakto iti apuy a mangpuor kadagiti palasioda ken dagiti siudadda.”