Read Iloko Joel 1 Bible Online

Joel 1 - Iloko bible

Joel 1

¹Daytoy ti imbaga ni Yahweh ken ni Joel nga anak ni Petuel.

²Dakayo a lallakay, dumngegkayo; denggendak, dakay amin nga agnaed iti Juda. Adda kadin kastoy a napasamak iti panagbiagyo wenno idi tiempo dagidi ammayo?

³Ibagayo daytoy kadagiti annakyo; ibagadanto met kadagiti annakda a mangibaganto met iti kaputotan a sumaruno kadakuada.

⁴Nagsasaruno a pangen ti dudon ti immay ket nagdissoda kadagiti mulmula; ti tinedda ti maysa a pangen, inibus ti simmaruno a pangen.

⁵Agriingkayo, dakayo a mammartek; agsangitkayo, dakayo a managinum iti arak; nadadaelen dagiti ubas a maaramid nga arak.

⁶Adda pangen ti dudon a nangraut iti dagatayo; nabilegda ket di mabilang ti kaaduda. Natadem ti ngipenda a kas kadagiti leon.

⁷Inkisapda dagiti mulatayo nga ubas; kinibkibanda dagiti kayotayo nga igos. Inukkisanda ida a namimpinsan; uray la pimmuraw dagiti sangada.

⁸Agdung-awkayo a kas iti balasang a mangdung-aw iti ipapatay ti pakayasawaanna.

⁹Awan ti trigo wenno arak a maidaton iti Templo. Agladingit dagiti papadi ta awanen ti maidatonda iti Apo.

¹⁰Langalang dagiti taltalon. Agladingit ti daga ta nadadael dagiti dawa, kimbet ti bunga dagiti ubas ken nalaylay dagiti kayo ti olibo.

¹¹Agsangitkayo, dakayo a mannalon; agladingitkayo, dakayo nga agay-aywan kadagiti kaubasan. Ngamin, nadadael ti trigo ken ti sebada, kasta met dagiti amin a mula.

¹²Nagango dagiti ubas ken dagiti kayo ti igos; nalaylay amin a kayo nga agbunga iti makan, ket natayda. Awanen ti rag-o dagiti tattao.

¹³Dakayo a papadi nga agserserbi iti altar, agkaweskayo iti nakersang a lupot ket agsangitkayo. Inkay iti Templo ket agpatpatnag nga agsangsangitkayo. Awanen ti trigo wenno arak a maidaton iti Diosyo.

¹⁴Ibilinyo ti panagayunar dagiti tattao; mangangaykayo iti gimong nga agdaydayaw. Ayabanyo dagiti papangulo ken dagiti amin a taga-Juda. Ummongenyo ida iti Templo ti Apo a Diosyo, ket umasugkayo kenkuana.

¹⁵Asidegen ti aldaw ti Apo; ti aldaw a panangyeg ti Mannakabalin-amin iti didigra. Nakabutbutengto dayta nga aldaw!

¹⁶Buybuyaentayo ngem awan maaramidantayo, bayat ti pannakadadael dagiti mulatayo; awan ti rag-o iti Templo ti Diostayo.

¹⁷Matay dagiti bukel iti natikag a daga; awan ti trigo a maipempen, iti kasta, agrakaya dagiti sarusar nga awan nagyanna.

¹⁸Aguga dagiti baka gapu iti bisinda, ta awan ti pagarabanda; agsagaba met ti arban dagiti karnero.

¹⁹Umasugak kenka, O Apo, agsipud ta nagango dagiti karuotan ken dagiti kayo, a kasla ketdin inda nauram.

²⁰Uray dagiti atap nga animal umasugda kenka, ta nagmagan dagiti waig.