Read Iloko Amos 1 Bible Online

Amos 1 - Iloko bible

Amos 1

¹Dagitoy dagiti sao ni Amos a maysa nga agpaspastor iti ili ti Tekoa. Impaltiing ti Dios kenkuana dagitoy a banag maipapan iti Israel dua a tawen sakbay daydi ginggined. Ni Uzzias idi ti ari ti Juda ket ni Jeroboam nga anak ni Joas ti ari ti Israel.

²Kinuna ni Amos, “Agungor ti Apo idiay Sion, ket gumluong ti timekna idiay Jerusalem. Gapu iti daytoy, agtikag dagiti pagpastoran ken aglaylay dagiti ruot ti Bantay Carmel.”

³Kuna ni Yahweh, “Kanayon nga agbasol dagiti taga-Damasco, isu nga awan duadua a dusaekto ida. Nakabutbuteng a kinaranggas ti impalak-amda kadagiti taga-Galaad.

⁴Ngarud, mangidissuorakto iti apuy iti palasio ti Siria ket puorakto agingga a dumapu dagiti sarikedked ni Ari Benhadad.

⁵Lasanglasangekto dagiti ruangan ti siudad ti Damasco. Pukawekto dagiti agnanaed iti Tanap ti Aven ken ti pangulo ti Beteden. Maitalawto dagiti tattao ti Siria ket maipanda a kas balud iti daga ti Kir.”

⁶Kuna ni Yahweh, “Kanayon nga agbasol dagiti taga-Gaza, isu nga awan duadua a dusaekto ida. Impanawda ti amin nga umili iti maysa a pagilian ket inlakoda ida a kas tagabu kadagiti taga-Edom.

⁷Ngarud, mangidissuorakto iti apuy kadagiti bakud ti Gaza tapno mapuoran agingga a dumapu dagiti sarikedked ti siudad.

⁸Italawkonto dagiti agtuturay iti siudad ti Asdod ken iti siudad ti Askelon. Dusaekto ti siudad ti Ekron, ket matayto dagiti amin a natda kadagiti Filisteo.”

⁹Kuna ni Yahweh, “Kanayon nga agbasol dagiti taga-Tiro, isu nga awan duadua a dusaekto ida. Impanawda ti amin nga umili iti maysa a pagilian ket inyawatda ida kadagiti taga-Edom. Sinalungasingda ti tulag ti pannakigayyem.

¹⁰Ngarud, mangidissuorak iti apuy kadagiti bakud ti Tiro tapno mapuoran agingga a dumapu dagiti sarikedkedna.”

¹¹Kuna ni Yahweh, “Kanayon nga agbasol dagiti taga-Edom, isu nga awan duadua a dusaekto ida. Kinamatkamatda dagiti kakabsatda nga Israelita, ket pulos a dida nangngaasi. Awan patingga ti pungtotda ket pulos a dida pinagbaaw.

¹²Ngarud, mangidissuorak iti apuy iti siudad ti Teman tapno mapuoran agingga a dumapu dagiti sarikedked ti Bosra.”

¹³Kuna ni Yahweh, “Kanayon nga agbasol dagiti taga-Ammon, isu nga awan duadua a dusaekto ida. Iti pannakigubgubatda tapno makagun-odda iti nalawlawa a daga, binutiakanda dagiti masikog a babbai iti Galaad.

¹⁴Mangidissuorakto ngarud iti apuy kadagiti bakud ti Rabba tapno mapuoran agingga a dumapu dagiti sarikedkedna. Iti dayta nga aldaw, addanto ikkis iti paggugubatan. Nadawelto ti gubat a kas iti napigsa a bagio.

¹⁵Maitalawto ti ari ken dagiti ofisialesna ket maipanda iti sabali a daga.”