Read Iloko Amos 3 Bible Online

Amos 3 - Iloko bible

Amos 3

¹Tattao ti Israel, denggenyo daytoy sao ti Apo maipapan kadakayo, ti entero a nasion nga inruarna idiay Egipto:

²“Kadagiti amin a nasion ditoy daga, dakayo laeng ti binigbigko ken tinaripatok. Iti kasta, dusaenkayo gapu kadagiti amin a basolyo.”

³Agkuyog kadi ti dua a tao no dida agtulag nga umuna?

⁴Agngernger kadi ti leon iti bakir no awan makitana a tiliwenna? Agngernger kadi ti urbon a leon iti rukibna no awan natukmaanna?

⁵Matiliw kadi ti tumatayab iti palab-og nga awan appanna? Agpangato kadi ti silo no awan masiloanna?

⁶No aguni ti trumpeta a mangipakaammo iti gubat, saan aya nga agbuteng dagiti tattao iti siudad? Adda kadi nakaal-aliaw a mapasamak iti maysa a siudad a di aramid ti Apo?

⁷Saan nga aramiden ni Apo Dios ti panggepna no dina ipakaammo nga umuna kadagiti babaonenna a profeta.

⁸No agngernger ti leon, adda aya saan a mabuteng? No agsao ni Apo Dios, siasino ti di mangipakaammo iti mensahena?

⁹Ipakdaaryo kadagiti agnaed kadagiti palasio ti Asdod ken ti Egipto: “Aguummongkayo kadagiti bambantay iti lawlaw ti Samaria ket saksianyo ti dakkel a riribuk sadiay ken dagiti kinadakes a maar-aramid iti siudad.”

¹⁰Kuna ni Yahweh, “Saan nga ammo dagitoy a tattao ti agaramid iti nalinteg. Agipempenda kadagiti palasioda kadagiti tinaktakawda ken innalada babaen iti panagranggas.

¹¹Ngarud, addanto kabusor a manglikmut kadakuada iti dagada. Rebbaendanto dagiti sarikedkedda ket agsamsamdanto kadagiti palasioda.”

¹²Kuna ni Yahweh, “Kas iti agpaspastor a ti laeng dua a saka wenno maysa a lapayag ti karnero ti maagawna iti ngiwat ti maysa a leon, kastanto met ti pannakaispal dagiti tattao ti Samaria nga agid-idda kadagiti agkakapintas a sofa. Manmanonto laeng kadakuada ti maisalakan.

¹³Dumngegkayo, ket ballaaganyo dagiti kaputotan ni Jacob,” kuna ni Apo Dios a Mannakabalin-amin.

¹⁴“Iti aldaw ti panangdusak kadagiti Israelita gapu kadagiti basolda, dadaelekto dagiti altar ti Betel. Putdekto dagiti sara iti tunggal altar ket matnagdanto iti daga.

¹⁵Dadaelekto dagiti balay a taengda iti tiempo ti lam-ek ken dagiti balayda iti kalgaw. Marakrakto dagiti balay a marfil ket marbanto ti amin a dadakkel a balay.”