Read Iloko Amos 6 Bible Online

Amos 6 - Iloko bible

Amos 6

¹Nakabutbutengto ti pagbanaganyo, dakayo a nanam-ay ti biagna dita Sion ken dakayo a mangipagarup a natalgedkayo dita Samaria—dakayo a papangulo iti daytoy agdindinamag a pagilian ti Israel, dakayo a kamangan dagiti tattao no masapulda ti tulong!

²Inkayo kitaen ti siudad ti Calne sakayto mapan iti agdindinamag a siudad ti Hamat. Kalpasanna, agtaruskay idiay Gat a siudad dagiti Filisteo. Nasaysayaat kadi dagitoy a pagarian ngem dagiti pagarian ti Juda ken ti Israel? Nalawlawa kadi ti dagada ngem ti dagayo?

³Diyo kayat nga annugoten nga addanto dumteng nga aldaw ti didigra ngem dagiti aramidyo yas-asidegna dayta nga aldaw!

⁴Asikayo pay, dakayo nga agid-idda kadagiti napipintas ken nalamuyot a sofa ken agsidsida iti karne ti urbon a karnero ken baka.

⁵Pagay-ayatyo ti agputar iti kanta a kas ken ni David idi, ket tokarenyo iti arpa.

⁶Aginumkayo iti binurburnay nga arak, ket sapsapoanyo ti bagiyo kadagiti kanginaan a bangbanglo, ngem saankayo nga agladingit iti pannakadadael ti Israel.

⁷Ngarud, dakayto ti umuna a maitalaw a maipan iti sabali a daga. Aggibuston dagiti parambak ken padayayo.

⁸Ti Apo Dios a Mannakabalin-amin ti nangisapata iti daytoy: “Kagurak ti kinatangsit dagiti Israelita. Busorek dagiti palasioda. Yawatkonto iti kabusor ti siudadda ken amin a linaonna.”

⁹No sangsangapulo la a tao ti nabati iti maysa a familia, mataydanto amin.

¹⁰No umay ti kabagian ti maysa kadagiti natay tapno iruarna dagiti bangkay, ipukkawna iti siasinoman a nabati pay iti balay, “Adda pay kadi tao dita?” Adda sumungbat, “Awan!” Iti kasta, kunanto ti kabagian ti natay, “Agulimekka! Alluadanta ta dita balbaliksen ti nagan ti Apo.”

¹¹Inton agbilin ti Apo, mawarwaranto dagiti balay, dadakkel man wenno babassit.

¹²Makataray kadi dagiti kabalio kadagiti dadakkel a batbato? Pagaradoen kadi ti baka iti taaw? Saan! Apay ngarud a pinagbalinyo ti hustisia a sabidong? Apay a pinagbalinyo a dakes ti naimbag?

¹³Kasta unay ti panangipasindayagyo iti panangsakupyo iti ili ti Lodebar. Itangtangsityo a pinarmekyo ti Karnaim iti bukodyo a pigsa?

¹⁴Ti met laeng Apo a Dios a Mannakabalin-amin ti agkuna: “Tattao ti Israel, mangibaonakto iti ganggannaet a pagilian a mangsakup iti pagilianyo. Parigatendakayto manipud iti Bessang ti Hamat iti amianan agingga iti waig ti Araba iti abagatan.”