Read Iloko Amos 8 Bible Online

Amos 8 - Iloko bible

Amos 8

¹Daytoy ti parmata nga impakita kaniak ti Apo a Dios: Nakitak ti maysa a basket a napno iti frutas.

²Sinaludsod ti Apo, “Amos, ania ti makitam?” “Sangabasket a frutas,” insungbatko. Kinuna ti Apo, “Dimtengen ti panungpalan dagiti tattaok nga Israelita. Dusaekon ida. Saankon a baliwan ti pangngeddengko.

³Iti dayta nga aldaw, agbalinto a dung-aw dagiti kankanta iti palasio. Agkaiwaranto dagiti bangkay. Maibellengdanto iti ruar nga awan arimekmek.”

⁴Denggenyo daytoy, dakayo a mangilupitlupit kadagiti marigrigat ken agpanggep a mangdadael kadagiti napanglaw iti pagilian.

⁵Kunayo iti bagiyo, “Kaano nga agtapos ti luttuad tapno mailakomi dagiti bukbukel? Kaanonto ti panaggibus ti Aldaw a Panaginana tapno mailakomi dagiti trigomi? Nanginanto ti panagilakomi. Usarenminto dagiti saan a husto a pagsukatan, ket padagsenanminto dagiti timbangan tapno masaur dagiti aggatgatang.

⁶Nanginanto ti pangilakoanmi iti awan serserbina a trigo. Agbirokkaminto iti napanglaw a tao, daydiay saan a makabayad iti utangna, uray gatad la ti sangaparis a sapatos, ket gatangenmi a kas tagabu.”

⁷Insapata ti Apo a Dios ti Israel, “Pulos a diakto malipatan dagiti dakes nga aramidda.

⁸Iti kasta, aggingginedto, ket agdanagto ti amin a tattao iti pagilian. Agkintayegto ti entero a pagilian; ngumato ken bumaba a kas iti Karayan Nile.

⁹Iti dayta nga aldaw, palnekekto ti init iti agmatuon, ket agsipngetto ti daga iti aldaw. Siak, ti Apo a Dios, ti nangibaga iti daytoy.

¹⁰Pagbalinekto a pagdudung-awan dagiti pagrarambakanyo. Pagbalinekto met a sangsangit dagiti naragsak a kankantayo. Pagkawesenkayto iti nakersang a lupot ket kuskosanyonto dagiti uloyo. Mayarigkayto kadagiti nagannak a mangdungdung-aw iti kakaisuna nga anakda. Nasaemto dayta nga aldaw agingga iti kamaudianan.

¹¹“Umayen ti tiempo a panangyegko iti bisin iti daga. Saanto a tinapay ti pakabisinan dagiti tattao. Saanto a danum ti pakawawanda. Mabisin ken mawawdanto iti mensahe nga aggapu ken ni Yahweh. Siak, ti Apo a Dios ti nangibaga iti daytoy.

¹²Agkalkallautangto dagiti tattao manipud iti Natay a Baybay agingga iti Taaw Mediterranean, sa aglikmut manipud iti daya agingga iti laud. Sapulendanto a sipapasnek ti sao ni Yahweh, ngem didanto masarakan.

¹³Iti dayta nga aldaw, matalimudawto iti waw uray pay dagiti napipintas a babbalasang ken napipigsa a babbaro.

¹⁴Dagiti agsapata iti sangoanan dagiti didiosen ti Samaria, isuda nga agkuna, ‘Iti nagan ti dios ti Dan’ ken ‘Iti nagan ti dios ti Beerseba’—matumbanto dagitoy a tattao ket saandanton a makabangon.”