Read Iloko Amos 9 Bible Online

Amos 9 - Iloko bible

Amos 9

¹Nakitak ti Apo nga agtaktakder iti abay ti altar. Imbilinna: “Masoem ti tuktok dagita nga adigi ti Templo agingga a magunggon dagiti fondasion. Duprakem ida ket bay-am a matupakan dagiti tattao. Papatayekto iti gubat dagiti natda kadakuada. Awanto ti makalibas. Awanto ti makalisi.

²Uray no agkalida iti dalanda a mapan iti lubong dagiti natay, tiliwekto ida. Uray no umulida sadi langit, ibabakto ida.

³No aglemmengda iti tapaw ti Bantay Carmel, birokekto ida ket tiliwek ida. No ilemmengandak iti lansad ti taaw, bilinekto ti dragon ti taaw a mangalun-on kadakuada.

⁴No italaw ida a kas balud dagiti kabusorda, papapataykonto ida iti kampilan. Diak tulongan ida, ket inkeddengkon a patayen ida.”

⁵Ni Apo Dios a Mannakabalin-amin sagidenna ti daga ket agginggined; agdung-aw ti amin nga agnaed sadiay. Kas iti Karayan Nile, dumakkel ken ages-es ti entero a lubong.

⁶Agaramid ni Yahweh iti balayna idiay langit; ikabilna ti tangatang iti ngatoen ti daga. Ayabanna dagiti danum iti taaw, ket ibuyatna ida iti rabaw ti daga. Ni Yahweh ti naganna.

⁷Kuna ti Apo, “Dakayo nga Israelita, agpada ti pannakilangenko kadakayo ken kadagiti taga-Etiopia. Inruarko dagiti Filisteo idiay Creta ken dagiti taga-Siria idiay Kir, kas iti panangiruarko kadakayo idiay Egipto.

⁸Siak, ti Apo a Dios, sipsiputak daytoy managbasol a pagarian ti Israel; pukawekto iti rabaw ti daga. Ngem saankonto a dadaelen amin a kaputotan ni Jacob.

⁹“Ibilinko a mayakayak ti Israel a kas iti bukel. Wen, yakayakekto ida iti ayan dagiti nasion tapno maikkat ti amin nga awan serserbina kadakuada.

¹⁰Matayto iti paggugubatan ti amin a managbasol kadagiti tattaok—wen, amin nga agkuna, ‘Dinto ipalubos ti Dios a maan-anotayo.’”

¹¹Kuna ti Apo, “Umayen ti aldaw a bangonek manen ti pagarian ni David a mayarig iti narba a balay. Tarimaanekto dagiti bakudna, ket patakderekto manen. Bangonekto a kas met la iti kasasaadna idi.

¹²Tagikuaento dagiti Israelita ti nabati a daga ti Edom ken ti amin a pagilian a kukuak idi.” Kastoy ti sao ti Apo a mangibanagto iti daytoy.

¹³Kuna ti Apo, “Umayen dagiti aldaw a madama pay la ti ani, ngem tiempo manen ti panagarado. Madama pay laeng ti panagaramid iti arak, tiempo manen ti panagpurruak. Agtedtedto dagiti bantay iti nasam-it nga arak ket agayusto kadagiti turod.

¹⁴Isublikto dagiti tattaok iti dagada. Bangonendanto manen dagiti nadadael a siudadda ket agnaeddanto sadiay. Agmuladanto iti ubas, ket inumendanto ti arakna. Agmuladanto kadagiti minuyongan, ket kanendanto ti apitda.

¹⁵Ipasdekkonto dagiti tattaok iti daga nga intedko kadakuada, ket didanto maipanawen.” Ti Apo a Diosyo ti nagsao iti daytoy.