Read Iloko Jonah 1 Bible Online

Jonah 1 - Iloko bible

Jonah 1

¹Iti maysa nga aldaw, nagsao ni Yahweh ken ni Jonas nga anak ni Amittai.

²Kinunana, “Inka idiay Nineve, ket ballaagam dayta agdindinamag a siudad, ta naipadamag kaniak ti kinadakes dagiti tattao.”

³Ngem nagrubbuat ketdi ni Jonas ket sabali ti tinurongna tapno itarayanna ni Yahweh. Napan idiay Joppe ket nakasarak iti barko nga agturong idiay Tarsis. Kalpasan ti panagbayadna iti pletena, limmugan a kaduana dagiti tripulante tapno mapan sadiay, ket iti kasta, maadaywanna ni Yahweh.

⁴Ngem imbulos ni Yahweh ti napigsa nga angin iti taaw. Napigsa ti bagio ket kasla marba ti barko.

⁵Nagbuteng dagiti tripulante ket immawag ti tunggal maysa iti diosna. Tapno lumag-an ti barko, intappuakda dagiti karga. Ngem adda ni Jonas iti akimbaba a kadsaaran ti barko iti maysa a suli, ket nargaan ti turogna.

⁶Sadiay ti nakasarakan kenkuana ti kapitan ti barko. “Apay a matmaturogka?” kinuna ti kapitan. “Bumangonka ketdi ket agpatulongka iti diosmo bareng no kaasiannatayo ket saantayo a matay.”

⁷Iti kasta, kinuna dagiti tripulante iti tunggal maysa, “Agbibinnunottayo tapno maammoantayo no siasino ti mapabasol iti daytoy didigra a dimteng kadatayo.” Nagbibinnunotda ket rimmuar ti nagan ni Jonas.

⁸Kinunada kenkuana, “Ita, ibagam kadakami no siasino ti mapabasol iti daytoy! Ania ti ar-aramidem ditoy? Taga-anoka? Ania ti ilim ken ania a tribu ti nagtaudam?”

⁹Kinuna ni Jonas, “Maysaak a Hebreo. Agdaydayawak iti Apo a Dios ti langit a namarsua iti taaw ken iti daga.”

¹⁰Imbaga ni Jonas kadakuada nga itartarayanna ni Yahweh. Idi naammoanda daytoy, nagbuteng dagiti tripulante ket kinunada, “Nakabutbuteng daytoy nga inaramidmo!”

¹¹Idi dumawel latta ti taaw bayat ti panaglabas ti oras, kinuna dagiti tripulante ken ni Jonas, “Ania ti aramidenmi kenka tapno sumardeng ti bagio?”

¹²“Itappuakdak tapno agkalma,” insungbat ni Jonas. “Ammok a siak ti nakaigapuan ti idadateng kadakayo daytoy nadawel a bagio.”

¹³Nupay kasta, kayat dagiti tripulante nga ipaigid ti barko. Inkabilda ti amin a kabaelanda nga aggaud ngem awan ti maaramidda ta pumigpigsa ti angin.

¹⁴Isut' gapuna nga immasugda ken ni Yahweh, “O Apo, dawatenmi kenka a dinakami patayen a kas dusami gapu ta patayenmi daytoy a tao! Sika, O Apo, ti makaammo iti daytoy. Sika ti akin-aramid.”

¹⁵Kalpasanna, binagkatda ni Jonas sada intappuak iti taaw. Nagkalma a dagus ti bagio.

¹⁶Kasta unay ti panagbuteng dagiti tripulante ken ni Yahweh ket nagidatagda iti daton ken nagkarida nga agserbi kenkuana.

¹⁷Binilin ni Yahweh ti maysa a dakkel nga ikan a mangalun-on ken ni Jonas. Tallo nga aldaw ken tallo a rabii nga adda ni Jonas iti tian ti ikan.