Read Iloko Jonah 2 Bible Online

Jonah 2 - Iloko bible

Jonah 2

¹Kalpasanna, iti uneg ti tian ti ikan, nagkararag ni Jonas ken ni Yahweh a Diosna:

²“Iti rigatko, O Apo, immawagak kenka, ket impangagnak. Immasugak manipud iti tukot ti lubong dagiti natay, ket nangngegmo ti timekko.

³Intappuaknak ngamin iti kaadalman, wen, iti lansad ti taaw. Nalawlawak iti danum, ket sinabbuagandak dadakkel a dalluyonmo.

⁴Impagarupko a napagtalawak iti imatangmo, ket diakton makita ti nasantoan a Templom.

⁵Linikmutnak ti danum ket maangsanakon; namimpinsan a linapunosnak ti taaw, ket nakumotan ti ulok iti ruot.

⁶Naipanak iti mismo a puon dagiti bantay, iti daga a ti ruanganna naibalunet iti agnanayon. Ngem iti daytoy a yuyeng, inaonmo ti biagko, O Apo a Diosko!

⁷“Idi mariknak a matayakon, nagkararagak kenka, O Apo, ket manipud iti nasantoan a Templom nangngegmo ti asugko.

⁸Tinallikudandaka dagiti agdaydayaw kadagiti awan serserbina a didiosen.

⁹Ngem siak, agkantaakto iti pagdaydayaw kenka; mangidatagakto kenka iti daton, ket tungpalekto ti karik kenka. Aggapu iti Apo ti pannakaisalakan!”

¹⁰Kalpasanna, binilin ni Yahweh ti ikan, ket impugsona ni Jonas iti kadaratan iti igid ti baybay.