Read Iloko Jonah 3 Bible Online

Jonah 3 - Iloko bible

Jonah 3

¹Nagsao manen ni Yahweh ken ni Jonas.

²Kinunana, “Inka iti dayta agdindinamag a siudad ti Nineve, ket ipakaammom kadagiti tattao ti insaok kenka.”

³Nagtungpal a dagus ni Jonas ket napan idiay Nineve. Nalawa daytoy a siudad. Tallo nga aldaw a sursoren ti masakupanna.

⁴Rinugian ni Jonas a sinursor ti siudad. Kalpasan ti agmalmalem a pannagnana, impakdaarna: “Uppat a pulo nga aldaw manipud ita, madadaelto ti Nineve!”

⁵Namati dagiti taga-Nineve iti mensahe ti Dios. Ngarud, inkeddengda a masapul nga agayunar ti tunggal maysa ket nagkawes dagiti amin a tao iti nakersang a lupot, natan-ok man wenno nanumo, a mangipakita iti panagbabawida.

⁶Idi madamag daytoy ti ari ti Nineve, timmakder iti tronona sana inuksob ti pagan-anayna. Nagkawes met iti nakersang a lupot ket nagtugaw iti nabunton a dapu.

⁷Kalpasanna, impakaammona kadagiti tattao ti Nineve, “Daytoy ti bilin ti ari ken dagiti ofisialesna: Awan ti mangan iti uray ania. Maiparit a mangan wenno uminum ti amin a tao, animal ken karnero.

⁸Masapul nga agkawes amin a tattao ken animal iti nakersang a lupot. Masapul nga agkararag ti tunggal maysa iti Dios. Nasken a laksiden ti tunggal maysa ti dakes a kababalin ken kinaranggasna.

⁹Nalabit a baliwan ti Dios ti panunotna, ket saanen nga agpungtot tapno ditay matay!”

¹⁰Nakita ti Dios ti inaramidda. Nakitana ti panangtallikudda kadagiti dakes nga ugalida. Isut' gapuna a nagbaliw ti panunotna ket dina dinusa ida a kas iti imbagana.