Read Iloko Numbers 1 Bible Online

Numbers 1 - Iloko bible

Numbers 1

¹Iti umuna nga aldaw ti maikadua a bulan iti maikadua a tawen kalpasan ti ipapanaw dagiti Israelita idiay Egipto, nagsao ni Yahweh ken ni Moises iti Tolda ti Dios idiay Let-ang ti Sinai. Kinunana,

²“Bilangenyo ken ni Aaron dagiti Israelita segun ti familia ken kapuonan a nagtaudanda. Ilistayo ti nagan ti amin a lallaki

³nga agtawen iti duapulo wenno nasursurok a mabalin nga agsoldado.

⁴Agpatulongkayo iti pangulo ti kapuonan ti tunggal tribu.”

⁵Dagitoy dagiti napili iti entero a gimong para iti daytoy a trabaho. Papanguloda iti kapuonan ken turayen dagiti tribu: Tribu Pangulo ti Kapuonan Ruben Elizur nga anak ni Sedeur Simeon Selumiel nga anak ni Zurisadai Juda Naason nga anak ni Aminadab Issacar Netanel nga anak ni Suar Zabulon Eliab nga anak ni Helon Efraim Elisama nga anak ni Amiud Manases Gamaliel nga anak ni Pedasur Benjamin Abidan nga anak ni Gideoni Dan Ahiezer nga anak ni Amisadai Aser Pagiel nga anak ni Okran Gad Eliasaf nga anak ni Deuel Neftali Ahira nga anak ni Enan

¹⁷Babaen iti tulong dagitoy sangapulo ket dua a lallaki, inummong da Moises ken Aaron ti entero a gimong iti umuna nga aldaw ti maikadua a bulan ket inrehistroda dagiti amin a tattao segun ti kapuonan ken familia a nagtaudanda. Nailista ti nagan ken nabilang dagiti agtawen iti duapulo ken nasursurok

¹⁹kas imbilin ni Yahweh. Idiay Let-ang ti Sinai ti nangsensusan ni Moises kadagiti tattao.

²⁰Nailista ti nagan dagiti lallaki a mabalin nga agsoldado nga agtawen iti duapulo wenno nasursurok kas mayannurot iti familia a nagtaudanda. Nangrugi ti listaan iti tribu ni Ruben nga inauna nga anak ni Jacob. Dagitoy ti dagupda: Tribu Bilang Ruben 46,500 Simeon 59,300 Gad 45,650 Juda 74,600 Issacar 54,400 Zabulon 57,400 Efraim 40,500 Manases 32,200 Benjamin 35,400 Dan 62,700 Aser 41,500 Neftali 53,400 Dagup: 603,550

²¹Saan a nairaman dagiti Levita a nailista kadagiti dadduma a tribu

²²gapu ta kinuna ni Yahweh ken ni Moises,

²³“Inton sensusem dagiti mabalin nga agsoldado, dimo iraman ti tribu ni Levi.

²⁴Dutokam ketdi dagiti Levita nga agaywan iti Tolda ti Dios ken amin nga alikamenna. Isuda ti para-bagkat iti tolda ken kadagiti alikamenna. Agserbida iti unegna ket agkampoda iti lawlawna.

²⁵Tunggal yalisyo ti kampoyo, lasangenda ti tolda sadanto man met laengen sangalen iti baro a pagkampoanyo. Mapapatay ti siasinoman a saan a Levita nga umasideg iti tolda.

²⁶Agkampo dagiti dadduma nga Israelita a nabunggo-bunggoy a kas iti armada, tunggal tao iti grupona ken iti babaen ti banderana.

²⁷Ngem agkampo dagiti Levita iti lawlaw ti Tolda ti Dios tapno guardiaanda ket iti kasta awan ti umasideg a pakaigapuan ti panagdissuor ti pungtotko iti gimong ti Israel.”

²⁸Inaramid ngarud dagiti Israelita dagiti amin nga imbilin ni Yahweh ken ni Moises.