Read Iloko Numbers 10 Bible Online

Numbers 10 - Iloko bible

Numbers 10

¹Kinuna ni Yahweh ken ni Moises,

²“Agpaaramidka iti dua a trumpeta iti napitpit a pirak nga aramatem no ummongem dagiti tattao wenno umalisda iti pagkampoan.

³No mabayag ken aggiddan ti pannakapuyot dagiti dua a trumpeta, masapul a dumatag kenka ti entero a gimong iti pagserkan ti Tolda.

⁴Ngem no maysa laeng a trumpeta ti mapuyot, dagiti laeng pangulo dagiti kapuonan ti umay kenka.

⁵No mabiit ti pannakapuyot ti trumpeta, agrubbuat a magna dagiti tribu a nagkampo iti daya.

⁶No mabibiit ti pannakapuyot dagiti trumpeta iti kapamindua, agrubbuat a magna dagiti nagkampo iti abagatan. Ngarud, ababbaba a pannakapuyot ti trumpeta ti pagilasinan a pumanawda iti lugar a nagkampoanda

⁷ngem mabayag ti uni ti trumpeta a mangipakdaar iti panaguummong ti entero a gimong.

⁸Dagiti papadi nga annak ni Aaron ti para-trumpeta. “Masapul a matungpal daytoy nga alagaden iti agnanayon.

⁹No adda dagiti mangraut kadakayo iti dagayo, puyotenyo ti pagilasinan ti kaadda ti gubat kadagitoy a trumpeta. Siak, ni Yahweh a Diosyo, ti tumulong ken mangispal kadakayo kadagiti kabusoryo.

¹⁰Iti met panagrarambakyo a kas iti Fiesta ti Lutuad ken kadagiti dadduma a nasantoan a fiesta, puyotenyo dagiti trumpeta no idatagyo dagiti daton a mapuoran ken dagiti daton a pakikappia. Iti kasta, tulongankayto. Siak ni Yahweh a Diosyo.”

¹¹Iti maikadua a tawen iti maika-20 nga aldaw ti maikadua a bulan kalpasan ti ipapanaw dagiti Israelita idiay Egipto, nagpangato ti ulep manipud iti Tolda ti Dios.

¹²Intuloy dagiti Israelita ti panagdaliasatda ket pimmanawda idiay Let-ang ti Sinai. Nagdisso ti ulep idi dumtengda iti let-ang ti Paran.

¹³Nangrugida a nagna kas imbilin ni Yahweh ken ni Moises.

¹⁴Tunggal umalisda, isu met la nga urnos ti pannagnada. Umuna a magna dagiti adda iti babaen ti wagayway ti bunggoy nga ipanguloan ti tribu ti Juda. Nabunggo-bunggoyda ket ni Naason nga anak ni Aminadab ti panguloda.

¹⁵Ni Netanel nga anak ni Suar ti pangulo ti tribu ti Issacar

¹⁶ket ni Eliab nga anak ni Helon ti pangulo ti tribu ti Zabulon.

¹⁷No maakasen ti Tolda, sumaruno nga agrubbuat dagiti kaputotan ni Gerson ken Merari a para-awit iti Tolda.

¹⁸Sumaruno nga agrubbuat dagiti adda iti babaen ti wagayway ti bunggoy nga ipanguloan ti tribu ti Ruben. Nabunggo-bunggoyda ket ni Elizur nga anak ni Sedeur ti panguloda.

¹⁹Ni Selumiel nga anak ni Zurisadai ti pangulo ti tribu ti Simeon

²⁰ket ni Eliasaf nga anak ni Deuel ti pangulo ti tribu ti Gad.

²¹Kalpasanna, agrubbuat dagiti Levita a nagtaud iti kapuonan ni Coat. Awitda dagiti nasagradoan nga alikamen. Sakbay a dumtengda iti sumaruno a pagkampoan, nabangon manen ti tolda.

²²Sumaruno nga agrubbuat dagiti adda iti babaen ti wagayway ti bunggoy nga ipanguloan ti tribu ti Efraim. Nabunggobunggoyda ket ni Elisama nga anak ni Amiud ti panguloda.

²³Ni Gamaliel nga anak ni Pedasur ti pangulo ti tribu ti Manases

²⁴ket ni Abidan nga anak ni Gideoni ti pangulo ti tribu ti Benjamin.

²⁵Kamaudianna, agrubbuat dagiti adda iti babaen ti wagayway ti bunggoy nga ipanguloan ti tribu ti Dan. Isuda ti adda iti likud a pannakasalaknib dagiti amin a bunggoy iti sangoanan. Nabunggo-bunggoyda ket ni Ahiezer nga anak ni Amisadai ti panguloda.

²⁶Ni Pagiel nga anak ni Okran ti pangulo ti tribu ti Aser

²⁷ket ni Ahira nga anak ni Enan ti pangulo ti tribu ti Neftali.

²⁸Kastoy ti urnos ti pannagna dagiti Israelita a nabunggo-bunggoy tunggal umalisda.

²⁹Kinuna ni Moises ken ni kayongna a Hobab nga anak ni Jetro a Midianita, “Agrubbuatkami a mapan iti lugar nga inkari ti Apo nga ited kadakami. Inkarina a parang-ayen ti Israel, isu a sumurotka kadakami ket ibingayandakanto iti kinabaknangmi.”

³⁰“Saanak a sumurot,” insungbat ni Hobab, “Agsubliak iti nakayanakak a daga.”

³¹“Pangngaasim ta dinakam panawan,” kinuna ni Moises. “Ammom ti mabalin a pagkampoan iti let-ang ket sika ti mangidalan kadakami.

³²No kumuyogka, ibingayandakanto iti amin nga iparabur kadakami ti Apo.”

³³Pimmanaw dagiti tattao iti Sinai, ti nasantoan a bantay, ket nagdaliasatda iti tallo nga aldaw. Immun-una ti Lakasa ti Tulag ni Yahweh tapno mangbirok iti lugar a pagkampoanda.

³⁴Tunggal umalisda iti pagkampoanda, adda iti ngatoenda ti ulep ni Yahweh iti aldaw.

³⁵Tunggal mairubbuat ti Lakasa ti Tulag, kuna ni Moises, “Tumakderka, O Apo; warawaraem dagiti kabusormo ket parmekem dagiti gumurgura kenka!”

³⁶Tunggal agsardengda, kuna ni Moises, “Agsublika, O Apo, kadagiti rinibribu a familia dagiti Israelita.”