Read Iloko Numbers 11 Bible Online

Numbers 11 - Iloko bible

Numbers 11

¹Rinugian dagiti tattao ti agreklamo ken ni Yahweh gapu iti rigat a naglasatanda. Idi mangngeg ni Yahweh ti asugda, nakapungtot ket indissuorna ti apuy kadagiti tattao. Rimsua ti uram iti ayanda ket dinadaelna ti maysa a pungto ti kampo.

²Nagpatulong dagiti tattao ken ni Moises, isu a nagkararag ken ni Yahweh ket naiddep ti apuy.

³Gapu ta gimmil-ayab ti apuy ni Yahweh iti ayanda, napanaganan iti Tabera dayta a lugar.

⁴Adda dagiti ganggannaet a simmurot kadagiti Israelita iti panagdaliasatda. Makasidsidada la unay iti karne. Timmulad met kadakuada dagiti Israelita ket inyasugda: “Kaano ngata a makaramantayo iti karne?

⁵Idiay Egipto, agum-umatayo nga agsida iti ikan nga awan baybayadna. Malagipyo dagiti pipino, sandia, pako, lasona ken bawang a kinkinnantayo?

⁶Ita, agkakapsuttayon ket pulos nga awan pay ti makan ditoy! Awan, malaksid iti daytoy mana nga inaldaw-aldaw a kankanentayo.” (

⁷Mayarig ti mana iti babassit a bukel. Puraw a dumuyaw ti kolorna.

⁸No agtinnag ti linnaaw iti kampo iti rabii, agtinnag met dagiti mana. Iti bigat, rummuar dagiti tattao ket agurnongda iti mana. Gilingen wenno baywenda agingga nga agbalin nga arina nga aramidenda a bibingka. Kasla tinapay a nalaokan iti lana ti olibo ti ramanna.)

¹⁰Nangngeg ni Moises ti panagreklamo dagiti amin a tattao bayat ti panagtakderda kadagiti ruangan dagiti toldada. Makaluksaw ni Moises gapu ta nalabes ti pungtot ni Yahweh kadakuada

¹¹ket kinunana kenkuana, “Apay a kastoy ti inaramidmo kaniak? Apay a kaguranak? Apay nga impabaklaymo kaniak daytoy a pagrebbengan nga agpaay kadagitoy a tattao?

¹²Saan a siak ti nangyanak kadakuada! Apay a kiddawem nga agbalinak a paraaw-awir ket ubbaek ida a kas ubbing tapno ipanko ida iti daga nga inkarim nga ited kadagiti kapuonanda?

¹³Sadino ti pangalaak iti karne a maipaay kadagitoy a kaadu ti tattao? Dida sumardeng a mangirengreng a maikkanda iti karne.

¹⁴Diak kabaelan a sisiak ti mangaywan kadagitoy a tattao; nadagsenda unay nga ibaklayko!

¹⁵No kastoy ti pamay-am kaniak, nasaysayaat laengen a patayennak tapno diakon agsagaba iti kinadagsen daytoy a pagrebbengan.”

¹⁶Kinuna ni Yahweh ken ni Moises, “Mangummongka iti pitopulo a panglakayen a mabigbig a pangulo dagiti tattao. Idatagmo kaniak ida iti Tolda ket ibagam kadakuada nga agtakderda sadiay iti abaymo.

¹⁷Bumabaakto sadiay tapno makisaoak kenka. Ikkak ida iti espiritu nga intedko kenka tapno tumulongdanto kenka a mangaywan kadagitoy a tattao ket saanton a siksika ti agbaklay.

¹⁸Ita, ibagam kadagiti tattao, ‘Dalusanyo dagiti bagbagiyo ta addanto karne a sidaenyo inton bigat. Nangngeg ti Apo ti panagas-asugyo ken ti panangibagbagayo iti tarigagayyo nga agsida iti karne ken ti kunkunayo a nasaysayaat ti panagbiagyo idiay Egipto. Ita, ikkannakayo ti Apo iti karne ket masapul a kanenyo.

¹⁹Saan la a para iti maysa, dua, lima, sangapulo wenno uray duapulo nga aldaw ti maited kadakayo

²⁰no di ket makabulan. Pasigto a karne ti kankanenyo agingga a rummuar kadagiti agongyo ken agingga a marurusokkayo. Mapasamak daytoy gapu ta linaksidyo ti Apo nga adda kadakayo. Ket nagasugkayo kenkuana a dikay la koma pimmampanawen idiay Egipto.’”

²¹Kinuna ni Moises ken ni Yahweh, “Aganay nga 600,000 a tattao ti idauloak ket kunam ketdin nga ikkam ida iti karne nga umanay a taraonda iti makabulan.

²²Umdas kadi dagiti baka ken karnero a maparti para kadakuada? Umdas kadi ti amin nga ikan ti baybay nga agpaay kadakuada?”

²³“Adda kadi saanko a mabalin nga aramiden?” insungbat ni Yahweh. “Makitamto iti mabiit no mapasamak ti imbagak wenno saan.”

²⁴Rimmuar ngarud ni Moises ket imbagana kadagiti tattao ti sao ni Yahweh. Nangayab iti 70 a pangulo ket pinagtakderna ida iti likmut ti Tolda ti Dios.

²⁵Ket bimmaba ni Yahweh iti maysa nga ulep. Nagsao ken ni Moises, nangala iti espiritu nga intedna idi kenkuana sana inted kadagiti 70 a pangulo. Idi simrek kadakuada ti espiritu, inrugidan ti agipadto ngem saan a nagbayag.

²⁶Dua kadagiti 70 a naayaban a panglakayen, da Eldad ken Medad, ti nagbati iti kampo, ket dida napan iti Tolda ti Dios. Nupay kasta, simrek met kadakuada ti espiritu ket rinugianda met ti nagipadto.

²⁷Nakita ti maysa nga agtutubo a lalaki ti ar-aramiden da Eldad ken Medad, ket nagtartaray a napan nangibaga ken ni Moises ti panagipadtoda iti kampo.

²⁸Kinuna ni Josue, ti anak ni Nun, a tumultulong ken ni Moises sipud pay idi ubing, “Pagsardengem ida, apo.”

²⁹Ngem insungbat ni Moises, “Madanaganka kadi gapu kaniak? Kaykayatko pay ketdi nga ited ti Apo ti espirituna kadagiti tattao tapno agbalinda amin a profeta.”

³⁰Kalpasanna, nagsubli ni Moises ken dagiti 70 a panglakayen ti Israel iti kampo.

³¹Pagammoan, nangibaon ni Yahweh iti angin a nangyeg iti adu a pogo manipud iti baybay. Maysa a metro ti kangato ti panagtayabda manipud iti daga. Nagdissoda iti kampo ket nalawa ti sinaknapanda iti aglikmut ti kampo.

³²Nagmalmalem ken nagpatpatnag a nagtiltiliw dagiti tattao iti pogo. Kasta manen ti inaramidda iti sumuno nga aldaw. Saan a nakurkurang ngem 1,000 a kilo ti naurnong ti tunggal maysa. Pinindangda dagiti pogo sada imbilag iti lawlaw ti kampo.

³³Ngem sakbay a naibusda ti karne ken adu pay la ti sidada, simged ti pungtot ni Yahweh, ket inyegna ti nakabutbuteng a sakit a nagwaras kadagiti tattao.

³⁴Napanaganan dayta a disso iti Kibrot Hattava (wenno “Tantanem ti Panaggartem”) agsipud ta intanemda sadiay dagiti tattao a naggartem la unay iti karne.

³⁵Manipud sadiay, pimmanaw dagiti Israelita ket napanda nagkampo idiay Hazerot.