Read Iloko Numbers 12 Bible Online

Numbers 12 - Iloko bible

Numbers 12

¹Gapu ta nangasawa ni Moises iti maysa a Cusita, binabalaw da Miriam ken Aaron.

²Kinunada, “Ni la Moises aya ti kinasao ti Apo? Saan kadi a nakisao met kadata?” Nangngeg ti Apo ti kinunada. (

³Napakumbaba ni Moises. Kinapudnona, napakpakumbaba ngem ti uray siasinoman a tao ditoy daga.)

⁴Kellaat nga imbaga ni Yahweh kada Moises, Aaron ken Miriam, “Inkay idiay Tolda.” Ket napanda a tallo.

⁵Bimmaba ni Yahweh iti monmon ti ulep ket nagtakder iti ruangan ti Tolda. Inayabanna da Aaron ken Miriam. Idi makaasideg dagiti dua,

⁶kinuna ni Yahweh, “Denggenyo ti ibagak. No adda profeta kadakayo agpakitaak kadakuada iti parmata, ket kasaok ida iti tagtagainep.

⁷Ngem saan a kasta ti pannakisaok ken ni Moises nga adipenko. Dinutokak a mangaywan kadagiti amin a tattaok nga Israelita.

⁸Iti kasta, makisaoak kenkuana iti rupanrupa. Nalawag ti pannakisaok kenkuana ket saan a kadagiti burburtia. Nakitana payen ti langak! Nagturedkayo ketdin a mangbabalaw ken ni Moises nga adipenko?”

⁹Kasta unay ti pungtot ni Yahweh kadakuada. Idi pumanaw,

¹⁰nagpukaw ti ulep iti Tolda, dagus a nalapunos ni Miriam iti kukutel ket nagbalin a puraw a kasla kapas ti kudilna. Nakita ni Aaron a nalapunos ni Miriam iti sakit,

¹¹isu a kinunana ken ni Moises, “Pangngaasim, apo, ta dinakam dusaen gapu iti minamaag nga inaramidmi.

¹²Dimo koma ipalubos a maipada ni Miriam iti natay a nayanak a narunot ti kagudua ti bagina.”

¹³Iti kasta, immawag ni Moises ken ni Yahweh ket kinunana, “O Dios, paimbagem kadi ni Miriam.”

¹⁴Simmungbat ni Yahweh, “No tinupraan ni amana ti rupana, masapul a sagabaenna ti pannakaibabainna iti las-ud ti pito nga aldaw. Ngarud, ipanyo ni Miriam iti ruar ti kampo ket agyan sadiay iti pito nga aldaw. Kalpasanna, mabalinnanto ti agsubli iti kampo.”

¹⁵Napapanaw ngarud ni Miriam ket pito nga aldaw a nagyan iti ruar ti kampo. Saan a nagluas dagiti tattao agingga a nagsubli iti kampo.

¹⁶Idi nagsubli, pimmanawda iti Hazerot, ket napanda nagkampo iti let-ang ti Paran.