Read Iloko Numbers 15 Bible Online

Numbers 15 - Iloko bible

Numbers 15

¹Inted ni Yahweh ken ni Moises

²dagitoy nga alagaden nga annuroten dagiti Israelita iti daga nga itedna kadakuada.

³Mabalin a maidatag iti Apo ti toro a baka, kalakian a karnero, maysa nga urbon ti karnero wenno kalding, a kas daton a mapuoran wenno daton a pagtungpal iti kari wenno daton nga agtaud iti bukod a nakem wenno kas daton kadagiti naituding a nasantoan a fiestayo. Nabanglo dagitoy a daton iti Apo.

⁴Siasinoman a mangidatag iti karnero wenno kalding a kas daton a mapuoran iti Apo, masapul a pakuyoganna ti tunggal animal iti sangakilo nga arina a nalaokan iti maysa a litro a lana ti olibo kas daton a makan, agraman sangalitro nga arak.

⁶No kalakian a karnero ti maidatag, dua a kilo nga arina a nalaokan iti 1 1/2 a litro a lana ti olibo ti masapul a maidatag a kas daton a makan,

⁷agraman sangalitro ket gudua nga arak. Nabanglo dagitoy a daton iti Apo.

⁸No toro a baka ti idatag iti Apo a daton a mapuoran wenno kas daton a pagtungpal iti kari wenno kas daton a pakikappia,

⁹masapul a maidatag a daton a makan ti tallo a kilo nga arina a nalaokan iti dua a litro a lana ti olibo

¹⁰agraman dua a litro nga arak. Nabanglo daytoy a daton iti Apo.

¹¹Dagitoyto ti maidatag a maipakuyog iti tunggal toro a baka, kalakian a karnero, urbon ti karnero wenno kalding.

¹²No nasursurok ngem maysa ti animal a maidatag, manayonan met dagiti maipakuyog a makan ken inumen.

¹³Kastoy ti aramiden ti tunggal puro nga Israelita no mangidaton iti makan, maysa a daton a nabanglo iti Apo.

¹⁴Kastoy met ti annuroten ti ganggannaet a makipagnaed kadakayo, iti apagbiit man wenno agnanayon, a mangidatag iti daton a mapuoran kas daton a nabanglo iti Apo.

¹⁵Iti amin a panawen, isu met laeng nga alagaden ti masapul nga annurotenyo ken dagiti ganggannaet a makipagnaed kadakayo. Agpapadakayo iti imatang ti Apo.

¹⁶Maymaysa laeng a linteg ti annurotenyo, nayanak man nga Israelita wenno ganggannaet.

¹⁷Inted ni Yahweh ken ni Moises

¹⁸dagiti sumaganad nga alagaden nga annuroten dagiti Israelita iti daga nga itedna kadakuada.

¹⁹Tunggal mangankayo iti taraon a maapit sadiay, masapul nga adda mailasin nga agpaay a naisangsangayan a sagut iti Apo.

²⁰No agaramidkayo iti tinapay, ilasinyo ti umuna a tinapay kadagiti naaramid iti baro nga apit ket idatagyo a kas naisangsangayan a sagut iti Apo. Maidatag daytoy a kas iti panangidatagyo iti naisangsangayan a sagut nga aramidenyo iti trigo nga irikenyo.

²¹Iti amin a panawen, maited daytoy naisangsangayan a sagut iti Apo nga aggapu iti tinapay nga aramidenyo.

²²Ngem no adda saan a mangannurot iti uray ania kadagiti alagaden nga inted ni Yahweh ken ni Moises,

²³aniaman a bilin ti Apo kadakayo manipud idi damo,

²⁴ken no naaramid ti biddut gapu ta saan nga ammo ti gimong, masapul a mangidatag dagiti tattao iti toro a baka a kas daton a mapuoran, daton a nabanglo iti Apo, agraman dagiti tumutop a daton a makan ken daton nga arak. Malaksid kadagitoy, mangidatagda pay iti kalakian a kalding a daton gapu iti basol.

²⁵Aramiden ti padi ti seremonia ti pannakadalus nga agpaay iti gimong ket mapakawandanto agsipud ta dida inggagara ti naaramid a biddut ket indatagda ti daton gapu iti basol a kas daton a makan nga agpaay iti Apo.

²⁶Mapakawanto ti entero a gimong ti Israel ken dagiti ganggannaet nga agnaed iti dagada agsipud ta nairamanda amin iti biddut.

²⁷No adda makabasol a dina ammo, masapul a mangidaton iti kabayan a kalding a maysa ti tawenna.

²⁸Iti altar, aramiden ti padi ti seremonia ti pannakadalus tapno madalusan ti tao iti basolna ket mapakawanto.

²⁹Agpada nga alagaden ti annuroten ti amin nga agbasol a dina igagara, puro man nga Israelita wenno ganggannaet nga agnaed iti dagayo.

³⁰Ngem mapapatay ti siasinoman a mangigagara nga agbasol, puro man nga Israelita wenno ganggannaet, ta maipakita ti panangbusorna iti Apo.

³¹Linaksidna ti sao ti Apo ken sinalungasingna ti maysa kadagiti bilinna. Isu ti akimbasol iti ipapatayna.

³²Iti naminsan, idi adda pay laeng dagiti Israelita iti let-ang, adda lalaki a mangaykayo iti Aldaw a Panaginana.

³³Indatag dagiti nakasarak kenkuana kada Moises, Aaron ken iti entero a gimong.

³⁴Saan nga ammo no ania ti maipatay a dusana, isu a naipupok pay laeng.

³⁵Kinuna ni Yahweh ken ni Moises, “Masapul a mapapatay; iruaryo iti kampo ket kalpasanna batoen ti sangkagimongan agingga a matay.”

³⁶Iti kasta, naipan ti lalaki iti ruar ti kampo ket binato ti sangkagimongan agingga a natay, kas imbilin ni Yahweh.

³⁷Imbilin ni Yahweh ken ni Moises

³⁸nga ibagana daytoy kadagiti Israelita: “Ikkanyo iti baruyboy ti gayadan dagiti pagan-anayyo; masapul nga adda asul a lubid iti tunggal baruyboy. Aramidenyo daytoy iti agnanayon.

³⁹Agpaay a palagip dagitoy a baruyboy; tunggal makitayo ida, malagipyo ti amin a bilinko ket tungpalenyo ida. Iti kasta, didakto tallikudan tapno surotenyo dagiti pagayatan ken tarigagayyo.

⁴⁰Palagip kadakayo dagitoy a baruyboy tapno tungpalenyo dagiti bilinko ket agbalinkayo a nasantoan nga agpaay kaniak.

⁴¹Siak ni Yahweh a Diosyo; inruarkayo idiay Egipto tapno agbalinak a Diosyo. Siak ni Yahweh.”