Read Iloko Numbers 16 Bible Online

Numbers 16 - Iloko bible

Numbers 16

¹Immalsa ni Kora nga anak ni Izar ken apoko ni Coat nga anak ni Levi a maibusor ken ni Moises. Kaduana ti tallo a kameng ti tribu ti Ruben: da Datan ken Abiram nga annak ni Eliab, ken ni On nga anak ni Pelet agraman 250 nga Israelita a nalalatak a papangulo a pinili dagiti tattao.

³Naguummongda iti sango da Moises ken Aaron ket kinunada kadakuada, “Aglablabeskayon! Kukua ti Apo ti amin a kameng ti gimong ket adda ti Apo kadatay amin. Moises, apay nga insaadyo ti bagiyo a nangatngato ngem ti gimong ti Apo?”

⁴Apaman a nangngeg ni Moises daytoy, nagpakleb iti daga ket nagkararag.

⁵Kalpasanna, kinunana ken ni Kora ken kadagiti pasurotna, “Inton agsapa no bigat, ipakaammonto kadatayo ti Apo no siasino dagiti tattao a pinilina nga umasideg kenkuana iti altar.

⁶Inton agsapa no bigat, mangalakayto kadagiti insensario, kargaanyo iti beggang ken insenso ket ipanyo dagitoy iti altar. Kitaentayto no siasino kadatayo ti pinili ti Apo. Dakayo ketdi a Levita ti aglablabes ti aramidna!”

⁷

⁸Intuloy ni Moises ti nagsao ken ni Kora: “Dumngegkayo, dakayo a Levita!

⁹Saankayo kadi a maragsakan a pinilinakayo ti Dios ti Israel tapno umasidegkayo kenkuana? Pinilinakayo nga agserbi iti Tolda ti Dios, aramidenyo ti pagrebbenganyo iti gimong ket agserbikayo kadakuada.

¹⁰Intedna kenka ken kadagiti dadduma a Levita daytoy a pammadayaw. Ita, kayatyo pay a maisaadkayo a kas padi!

¹¹Iti panagsaoyo iti maibusor ken ni Aaron, ti Apo ti busorenyo, sika ken dagiti pasurotmo.”

¹²Pinaayaban ni Moises da Datan ken Abiram ngem kinunada, “Saanmi a kayat ti umay!

¹³Di pay la kadi umdas ti panangiruarmo kadakami iti nadam-eg a daga ti Egipto tapno papatayennakami ditoy let-ang? Masapul pay kadi nga iturayandakami?

¹⁴Dinakam inyeg iti nadam-eg a daga wenno inikkan kadagiti talon ken kaubasan ket ita, kayatnakami pay nga allilawen. Dimi kayat ti umay!”

¹⁵Nakapungtot ni Moises ket kinunana ken ni Yahweh, “Dimo awaten ti uray ania kadagiti sagut nga idatag dagitoy a tattao. Awan ti rinanggasak kadakuada; awan ti innalak uray la koma ti asno ti siasinoman kadakuada.”

¹⁶Kinuna ni Moises ken ni Kora, “Inton bigat, masapul nga umayka iti Tolda ti Dios agraman dagiti 250 a pasurotmo; addanto met sadiay ni Aaron.

¹⁷Tunggal maysa kadakayo, alaenna ti insensariona, kargaanna iti beggang ken insenso sana idatag iti altar.”

¹⁸Iti kasta, nagitugotda kadagiti insensario a nakargaan iti beggang ken insenso ket napanda iti ruangan ti Tolda a Paguummongan a kaduada da Moises ken Aaron.

¹⁹Kalpasanna, inummong ni Kora ti entero a gimong ket nagtakderda a sisasango kada Moises ken Aaron iti ruangan ti Tolda. Pagammoan, nakita ti entero a gimong ti makapurar a lawag a mangipakita iti kaadda ti Apo.

²⁰Ket kinuna ni Yahweh kada Moises ken Aaron,

²¹“Adaywanyo dagitoy a tattao ta dadaelek ida iti apagdarikmat.”

²²Ngem nagruknoy da Moises ken Aaron ket kinunada, “O Dios, sika ti pagtaudan ti amin a biag. No agbasol ti maysa a tao, apay a kapungtotmo ti entero a gimong?”

²³Kinuna ni Yahweh ken ni Moises,

²⁴“Ibagam kadagiti tattao nga adaywanda dagiti tolda da Kora, Datan ken Abiram.”

²⁵Kalpasanna, napan ni Moises a kaduana dagiti papangulo ti Israel iti ayan da Datan ken Abiram.

²⁶Kinunana kadagiti tattao, “Adaywanyo dagiti tolda dagitoy a managdakdakes! Diyo met sagiden ti aniaman a kukuada amangan no mairamankayo a mapukaw gapu kadagiti basolda.”

²⁷Ngarud, inadaywanda dagiti tolda da Kora, Datan, ken Abiram. Nakaruaren da Datan ken Abiram ken dagiti assawa ken annakda ket agtatakderda iti ruangan dagiti toldada.

²⁸Kinuna ni Moises kadagiti tattao, “Maammoanyo ita nga imbaonnak ti Apo tapno aramidek amin nga impaaramidna kaniak a saan ket a ti bukodko a pagayatan.

²⁹No matay dagitoy a tattao iti kadawyan nga ipapatay, kayatna a sawen a dinak imbaon ti Apo.

³⁰Ngem no adda naidumduma nga aramiden ti Apo, no agungap ti daga ket alun-onenna ida a sibibiag agraman amin a kukuada, ket mapanda iti lubong dagiti natay, kayatna a sawen a sinukir dagitoy a tattao ti Apo.”

³¹Apaman a nalpas ti panagsao ni Moises, nagungap ti daga iti batog da Datan ken Abiram

³²ket inalun-onna ida ken dagiti familiada, agraman ti amin a pasurot ni Kora ken amin a sanikuada.

³³Iti kasta, sibibiagda a nagpababa iti lubong dagiti natay, agraman dagiti sanikuada. Nagkaem ti daga ket saanen a nakita ida dagiti tattao.

³⁴Nagtataray dagiti amin nga Israelita a nakangngeg iti ikkisda ket impukkawda, “Umadayotayo amangan no alun-onennatayo met ti daga!”

³⁵Kalpasanna, nangyeg ni Yahweh iti apuy a gimmil-ayab ken nangikisap kadagiti 250 a lallaki a nagpuor iti insenso.

³⁶Kinuna ni Yahweh ken ni Moises,

³⁷“Ibagam ken ni Eleazar nga anak ni Aaron a padi nga alaenna dagiti bronse nga insensario kadagiti bangkay dagiti napuoran a lallaki ket ibellengna dagiti beggang iti sabali a lugar.

³⁸Nagbalin a nasagradoan dagiti insensario idi naidatagda iti altarko. Alaenna ngarud dagiti insensario dagitoy a lallaki a napapatay gapu iti basolda ket pitpitenna agingga nga umingpis sana aramiden a kalub ti altar. Agserbi daytoy a ballaag kadagiti Israelita.”

³⁹Innala ni Eleazar a padi dagiti insensario. Pinapitpitna iti naiingpis ket inaramidda a kalub ti altar.

⁴⁰Ballaag daytoy kadagiti Israelita nga awan ti mapalubosan nga agpuor iti insenso iti imatang ni Yahweh no saan a padi wenno agtaud iti kaputotan ni Aaron. No saan, mapapatay a kas ken ni Kora ken dagiti tattaona. Inaramid amin dagitoy ni Eleazar kas imbilin ti Apo ken ni Moises.

⁴¹Iti sumuno nga aldaw, nagsaosao manen ti entero a gimong iti maibusor kada Moises ken Aaron. Kinunada, “Pinapatayyo ti sumagmamano a tattao ti Apo.”

⁴²Nagmaymaysada a bumusor kada Moises ken Aaron, ngem idi kumitada iti Tolda ti Dios, naimatanganda ti ulep a nangkumot iti Tolda ket timpuar ti makapurar a lawag a mangipakita iti dayag ni Yahweh.

⁴³Nagtakder da Moises ken Aaron iti sango ti Tolda.

⁴⁴Kinuna ni Yahweh ken ni Moises,

⁴⁵“Adaywanyo dagitoy a tattao ta pukawek ida iti apagdarikmat!” Nagpaklebda a dua

⁴⁶ket kinuna ni Moises ken ni Aaron, “Alaem ti insensariom, kargaam iti beggang iti altar samo parabawan iti insenso. Dagdagusem nga ipan kadagiti tattao ket annongem ti seremonia ti pannakadalusda. Darasem! Bimtaken ti pungtot ti Apo ket nangrugin ti didigra.”

⁴⁷Nagtungpal ni Aaron. Innalana ti insensariona ket nagtartaray a napan iti tengnga dagiti naummong a tattao. Nakitana nga adun ti natay ta nangrugin ti didigra; inkabilna ti insenso iti beggang sana inaramid ti seremonia tapno mapakawan dagiti tattao.

⁴⁸Simmardeng ti didigra ket natda ni Aaron a sitatakder iti nagbaetan dagiti sibibiag ken dagiti natay.

⁴⁹Agdagup iti 14,700 dagiti natay, malaksid dagiti napapatay iti panagsukir ni Kora.

⁵⁰Idi awanen ti didigra, nagsubli ni Aaron iti ayan ni Moises iti ruangan ti Tolda ti Dios.