Read Iloko Numbers 17 Bible Online

Numbers 17 - Iloko bible

Numbers 17

¹Kinuna ni Yahweh ken ni Moises,

²“Ibagam kadagiti Israelita nga ikkandaka iti 12 a sarukod, maysa ti aggapu iti pangulo ti tunggal tribu. Isuratmo ti nagan ti tunggal tao iti sarukodna

³ket isuratmo ti nagan ni Aaron iti sarukod a mangibagi iti tribu ti Levi. Iti kasta, adda sarukod ti tunggal pangulo ti tribu.

⁴Ikabilmo dagitoy iti Tolda ti Dios iti sango ti Lakasa ti Tulag a pagkitkitaanta.

⁵Agsaringitto ti sarukod ti tao a piliek. Kastoy ti panangpasardengko kadagiti reklamo dagiti Israelita a maibusor kadakayo.”

⁶Nakisao ngarud ni Moises kadagiti Israelita ket nangted ti tunggal pangulo ti tribu iti maysa a sarukod—sangapulo ket dua amin, agraman ti sarukod ni Aaron.

⁷Inkabil ni Moises dagiti sarukod iti Tolda ti Dios iti sangoanan ti Lakasa ti Tulag ni Yahweh.

⁸Idi sumrek ni Moises iti Tolda iti sumuno nga aldaw, nakitana a nagsaringit ti sarukod ni Aaron a mangibagi iti tribu ni Levi. Malaksid kadagiti bulong, nagsabong pay ket nagbunga iti naluluom nga almendras!

⁹Innala ni Moises dagiti amin a sarukod ket imparangna kadagiti Israelita. Nakitada ti napasamak ket kalpasanna, innala ti tunggal pangulo ti bukodna a sarukod.

¹⁰Kinuna ni Yahweh ken ni Moises, “Isublim ti sarukod ni Aaron iti sangoanan ti Lakasa ti Tulag. Masapul a maidulin a kas ballaag kadagiti nasukir nga Israelita a matayda no dida isardeng ti panagsasaoda iti maibusor kaniak.”

¹¹Tinungpal ni Moises ti imbilin ni Yahweh.

¹²Kinuna dagiti Israelita ken ni Moises, “Daytoyen ti kanibusananmi!

¹³No matay ti umasideg iti Tolda ti Dios, kayatna a sawen a mataytayo amin!”