Read Iloko Numbers 18 Bible Online

Numbers 18 - Iloko bible

Numbers 18

¹Kinuna ni Yahweh ken ni Aaron, “Sika, dagiti annakmo ken dagiti Levita masapul a dakay ti agsagaba iti dusa iti aniaman a basol a maaramid iti panagserbi iti Tolda; ngem sika ken dagiti annakmo laeng ti agsagaba no adda pakabasolanyo iti panagserbi a kas padi.

²Alaem dagiti kabagiam, ti tribu ni Levi, a tumulong kadakayo bayat ti panagserbiyo iti Tolda.

³Aramidenda ti pagrebbenganda kadakayo ken iti Tolda ngem di maipalubos nga umasidegda kadagiti nasagradoan nga alikamen iti santuario wenno iti altar. No aramidenda ti kasta, agpapadakayo amin a mapapatay.

⁴Masapul a makipagtrabahoda kadakayo ket tungpalenda dagiti annongenda iti amin a panagserbi iti Tolda. Saan a makipagtrabaho kadakayo dagiti saan a mapalubosan a tattao.

⁵Dakay laeng kadagiti annakmo ti mangannong kadagiti trabahoyo iti Nasantoan a Lugar ken iti altar tapno saan nga agdissuor ti pungtotko kadagiti Israelita.

⁶Pinilik dagiti kabagianyo a Levita kadagiti Israelita a sagutko kadakayo. Naidatonda kaniak tapno mabalinda ti agannong iti Tolda.

⁷Ngem dakayo laeng kadagiti annakmo ti mangaramid kadagiti pagrebbengan ti padi iti altar ken kadagiti alikamen iti Kasasantoan a Lugar. Dagitoy dagiti annongenyo agsipud ta intedko kadakayo ti sagut a kinapadi. Mapapatay ti siasinoman nga awan karbenganna nga umasideg kadagiti nasagradoan nga alikamen.”

⁸Kinuna ni Yahweh ken ni Aaron, “Itedko kadakayo ken kadagiti kaputotanyo ti amin a naisangsangayan a sagut a maidatag kaniak a di mapuoran, kas bingayyo iti agnanayon.

⁹Kadagiti nasagradoan a daton a saan a mapuoran iti altar, dagitoy ti kukuayo: dagiti daton a makan, dagiti daton a maipaay iti basol, ken dagiti daton a pagsupapak. Agpaay kenka ken dagiti annakmo ti amin a maidatag kaniak a nasagradoan a daton.

¹⁰Ibilangyo a nasagradoan dagitoy ket iti laeng nasantoan a lugar ti pangananyo. Dagiti laeng lallaki ti mabalin a mangan kadagitoy a taraon.

¹¹“Kukuayo pay dagiti dadduma a naisangsangayan a daton dagiti Israelita kaniak. Itedko ida kenka ken kadagiti annakmo a lallaki ken babbai iti agnanayon. Mapalubosan a mangan ti tunggal kameng ti familiam a nadalus iti imatang ti linteg.

¹²“Itedko kadakayo ti amin a kasayaatan nga umuna a maapit nga ited kaniak dagiti Israelita iti tunggal tawen: lana ti olibo, arak ken trigo.

¹³Kukuayo amin dagitoy ket mabalin a kanen ti tunggal kameng ti familiam a nadalus iti imatang ti linteg.

¹⁴“Agpaay kadakayo ti amin a maidaton kaniak iti Israel.

¹⁵“Kukuayo amin nga inauna nga anak ti tao wenno animal nga idaton kaniak dagiti Israelita. Ngem masapul a subboten ti inauna nga anak ti tao ken ti inauna nga anak ti animal a narugit iti imatang ti linteg.

¹⁶Lima a bagi ti pirak, segun ti naituyang a pagtimbangan, ti pangsubbot kadagiti ubbing nga adda makabulandan.

¹⁷Ngem saan a mabalin a subboten ti inauna nga anak ti baka, karnero ken kalding; kukuak ida ket masapul a maidatonda. Ibuyatyo ti darada iti altar ket puoranyo ti tabada a daton nga agpaay kaniak.

¹⁸Kukuayo ti karne, agraman ti barukong ken kannawan a luppo ti naisangsangayan a daton.

¹⁹“Itedko kenka ken kadagiti annakmo, lallaki man wenno babbai, ti amin a naisangsangayan a daton dagiti Israelita kaniak, kas bingayyo iti agnanayon. Saan a mawaswas daytoy a nakitulagak kadakayo ken kadagiti kaputotam.”

²⁰Kinuna ni Yahweh ken ni Aaron, “Awan ti sanikua a mabalinmo a tawiden ket awan met bingaymo iti daga ti Israel. Siak, ni Yahweh, ti bingay ken tawidmo.”

²¹Kinuna ni Yahweh, “Intedko kadagiti Levita ti amin nga apagkapullo nga idatag dagiti Israelita kaniak. Daytoy ti tangdanda iti panagserbida iti Tolda.

²²Saanen a mapalubosan dagiti gagangay nga Israelita nga umasideg iti Tolda tapno dida agbasol a pakaigapuan ti pannakapapatayda.

²³Manipud ita, dagiti Levita laeng ti mangaywan iti Tolda ket isuda ti makaammo iti aniaman a maaramid iti unegna. Agnanayon daytoy nga alagaden a masapul a tungpalen dagiti amin a kaputotam. Awan ti daga a tawiden dagiti Levita iti Israel.

²⁴Kukuada ti apagkapullo nga idatag kaniak dagiti Israelita a naisangsangayan a sagut, isu nga imbagak kadakuada nga awan permanente a dagada iti Israel.”

²⁵Binilin ni Yahweh ni Moises

²⁶nga ibagana daytoy kadagiti Levita: “No awatenyo ti apagkapullo nga ited dagiti Israelita, masapul nga idatagyo ti apagkapullona kas naisangsangayan a sagut iti Apo.

²⁷Maibilang daytoy naisangsangayan a sagut a kaibatogan ti daton a naggapu iti baro a trigo ken baro nga arak ti mannalon.

²⁸Kastoy met ti panangidatagyo iti naisangsangayan a sagut a kukua ti Apo kadagiti amin nga apagkapullo nga awatenyo kadagiti Israelita. Manipud kadagiti awatenyo, masapul nga itedyo ti naisangsangayan a sagut ti Apo ken ni Aaron a padi.

²⁹Masapul nga itedyo dagiti kasayaatan iti awatenyo.

³⁰Inton naidatagyon ti kasayaatan, mabalinyo nga alaen ti natda a kas iti panangala ti mannalon ti nabati iti sagutna nga idatagna.

³¹Mabalinyo a kanen a sangafamiliaan iti sadinoman a lugar gapu ta dagitoy ti tangdanyo iti panagserbiyo iti Tolda.

³²Saankay a makabasol no kanenyo, no la ketdi idatagyo ti kasayaatan iti Apo. No saanyo pay nga idatag daytoy, kayatna a sawen a matulawan ti sagut ket mapapataykayo.”